Ebangedi ya Mateo
11 Ge Jesu a feditše go fa barutiwa ba gagwe ba 12 ditaelo, o ile a ya metseng ya kgauswi gore a yo botša batho ba moo ditaba tše dibotse le go ba ruta.+
2 Ge Johane a be a le kgolegong,+ o ile a kwa ka dilo tšeo Kriste a bego a di dira, ke moka a romela barutiwa ba gagwe go yena+ 3 gore ba mmotšiše gore: “Na ke wena re bego re go emetše, goba na go na le yo a sa tlago?”+ 4 Jesu a ba araba a re: “Eyang le yo botša Johane ka dilo tšeo le di bonago le tšeo le di kwago, le re:+ 5 Batho bao ba bego ba foufetše, gona bjale ba a bona.+ Bagolofadi gona bjale ba kgona go sepela.+ Batho bao ba bego ba na le lephera, gona bjale ba a fodišwa. Difoa gona bjale di a kwa. Bahu ba a tsošwa ebile badiidi ba botšwa ditaba tše dibotse.+ 6 Go thaba yo a sa kgopšego* ka lebaka la ka.”+
7 Ge barutiwa ba Johane ba se na go sepela, Jesu o ile a thoma go bolela le mašaba ka Johane a re: “Le be le ile go bona eng lešokeng?+ Na le be le ile go bona lehlaka leo le tšewatšewago ke phefo?+ 8 Bjale le be le ile go bona eng? Na le be le ile go bona motho yo a aperego diaparo tša maemo? Batho bao ba aperego diaparo tša maemo ba dula dintlong tša dikgoši. 9 Gabotsebotse le be le ile go bona eng? Na le be le ile go bona moporofeta? Ee ke moporofeta, ke a le botša, ebile motho yoo o bohlokwa kudu go feta le baporofeta.+ 10 Yo ke yena yoo Mangwalo a bolelago ka yena a re: ‘Bonang! Ke roma moromiwa wa ka gore a go ete pele, e lego yoo a tlago go go lokišetša tsela pele o etla.’+ 11 Ruri ke le botša gore gare ga batho bao ba belegwego ke basadi ga se gwa ka gwa ba le wa go feta Johane Mokolobetši ka bogolo, eupša motho yo a nago le maemo a tlasana Mmušong wa magodimo, ke yo mogolo go mo feta.+ 12 Go tloga mehleng ya Johane Mokolobetši go fihla gona bjale, batho ba šoma ka thata gore ba hwetše Mmušo wa magodimo, eupša bao ba sa felego maatla ba a o hwetša.+ 13 Gobane dilo ka moka tšeo di ngwadilwego ke baporofeta le tšeo di lego Molaong wa Moshe, di porofetile go fihla ka Johane.+ 14 Go sa šetšwe gore le a dumela goba ga le dumele, Johane ke ‘Eliya yoo baporofeta ba boletšego ka yena gore o tla tla.’+ 15 Anke yo a nago le tsebe a kwe.
16 “Moloko wo ke tla o swantšha le mang?+ O swana le bana bao ba dutšego mebarakeng bao ba goeletšago dithaka tša bona, 17 ba re: ‘Re le leleditše naka gore le bine, eupša la se bine, ra lla gabohloko, eupša lena la se itshetle dihuba go bontšha gore le nyamile kudu.’ 18 Ka mo go swanago, Johane o be a ikona dijo ebile a sa nwe beine, eupša batho ba re: ‘O na le letemona.’ 19 Morwa wa motho o be a eja dijo ebile a enwa beine,+ eupša batho ba re: ‘Bonang motho wa sejagobe, yo a nwago beine ka mo go feteletšego, mogwera wa badiradibe le batho bao ba patedišago ba bangwe motšhelo.’+ Eupša motho o bontšha gore o bohlale ka dilo tšeo a di dirago.”*+
20 Ke moka a thoma go kgalemela batho bao ba bego ba dula metseng yeo a dirilego mehlolo go yona, ka gobane ba be ba sa itshole. A re: 21 “Go madimabe lena badudi ba Koratsina le Betsaida, ka gobane le bone mehlolo yeo e dirilwego metseng ya gabo lena, eupša ge nkabe badudi ba metseng ya Tiro le Sidone ba be ba bone dilo tše, nkabe e le kgale ba itshotše. Ba be ba tla apara diaparo tša go dirwa ka lesaka ba dula meloreng.+ 22 Eupša ke re go lena, seo se tlago go le diragalela Letšatšing la Kahlolo e tla ba se segolo go feta seo se ilego sa diragalela Tiro le Sidone.+ 23 Lena badudi ba Kaperenaume,+ na le tla išwa legodimong? Ga go bjalo. Le tla išwa Lebitleng*+ ka gobane le bone mehlolo yeo e dirilwego motseng wa gabo lena, eupša ge nkabe badudi ba Sodoma ba be ba bone dilo tše, motse wa bona nkabe o sa le gona go fihla le lehono. 24 Eupša ke re go lena, seo se tlago go le diragalela Letšatšing la Kahlolo e tla ba se segolo go feta seo se ilego sa diragalela naga ya Sodoma.”+
25 Ka yona nako yeo Jesu a re: “Tate, wena Morena wa legodimo le lefase, ke go tumiša pele ga batho ka moka, ka gobane o utetše batho ba bohlale le bao ba nago le kwešišo dilo tše gomme wa di utollela bana.+ 26 Wena Tate, o dirile se ka gobane o be o nyaka gore dilo di direge ka tsela ye.” 27 Jesu a tšwela pela a re: “Tate o mphile dilo ka moka, le gona ga go na motho yo a tsebago Morwa gabotse ge e se Tate,+ ebile ga go na motho yo a tsebago Tate gabotse ge e se Morwa+ gotee le motho yo mongwe le yo mongwe yoo Morwa a ratago go mo hlalosetša gore ge e le gabotse Tate ke mang.+ 28 Lena ka moka bao le lapilego le go imelwa, etlang go nna gomme ke tla le lapološa. 29 Rwalang joko ya ka gomme le ithute go nna, ka gobane ke boleta ebile ke ikokobeditše,+ gomme le tla ikwa le lapologile. 30 Ka gobane joko ya ka e rwalega gabonolo,* ebile morwalo wo ke le kgopelago gore le o rwale ga o boima.”