Ditiro tša Baapostola

14 Bjale ge Paulo le Baranaba ba be ba le Ikonia, ba ile ba tsena sinagogeng ya Bajuda gomme ba ruta gabotse kudu moo Bajuda ba bantši le Bagerika ba ilego ba fetoga badumedi. 2 Eupša Bajuda bao ba ilego ba se dumele molaetša woo, ba ile ba hlohleletša batho ba ditšhaba gore ba lwe le banababo rena.+ 3 Bjale Paulo le Baranaba ba ile ba fetša nako e ntši ba bolela ka sebete ka gobane Jehofa* o be a ba file maatla. Modimo o ile a ba diriša go dira mehlolo le dilo tše di makatšago le go bolela molaetša wa gagwe wo o lego mabapi le botho bja gagwe bjo bogolo.+ 4 Eupša batho ba mo motseng ba be ba sa kwane, ba bangwe ba be ba thekga Bajuda mola ba bangwe ba thekga baapostola. 5 Bjale batho ba ditšhaba, Bajuda le babuši ba bona ba be ba nyaka go ba tlontlolla le go ba kgatla ka maswika.+ 6 Ge Paulo le Baranaba ba ekwa ka taba ye, ba ile ba tšhabela metseng ya Likaonia, Lisitara, Derebe le metseng ya kgauswi.+ 7 Ge ba fihla moo ba ile ba tšwela pele ba bolela ditaba tše dibotse.

8 Bjale kua Lisitara go be go na le monna yo mongwe yo a bego a golofetše. O belegwe a golofetše ebile o be a se a ka a sepela, gomme o be a dutše fase 9 a theeditše Paulo ge a bolela. Paulo o ile a mo lebelela gomme ge a bona gore o na le tumelo ya gore a ka fodišwa,+ 10 o ile a goeletša a re go yena: “Emelela.” Ke moka monna yoo a taboga gomme a thoma go sepela.+ 11 Ge batho ba bantši ba bone seo Paulo a se dirilego, ba ile ba goeletša ba bolela ka Selikaonia ba re: “Medimo e thomile go swana le batho gomme e tlile go rena!”+ 12 Ke moka ba thoma go bitša Baranaba ba re ke Tseuse, gomme Paulo yena ba mmitša Heremese ka ge e be e le yena a bego a bolela dilo tše dintši. 13 Moperisita wa Tseuse yoo tempele ya gagwe e bego e le keiting ya motse, o ile a tliša dipoo le matšoba dikeiting tša motse ka ge a be a nyaka go dira dihlabelo le batho bao ba bego ba le moo.

14 Eupša ge Baranaba le Paulo ba ekwa seo ba ile ba kgeila diaparo tša bona gomme ba ya go batho bao ba goeletša ba re: 15 “Banna, ke ka baka lang le dira dilo tše? Ga se rena medimo, re no ba batho go swana le lena.+ Ebile re le botša ditaba tše dibotse gore le tlogele go rapela medimo ya maaka, gomme le rapele Modimo yo a phelago, yena yo a bopilego legodimo, lefase, lewatle le dilo ka moka tšeo di lego go tšona.+ 16 Nakong e fetilego o ile a dumelela ditšhaba ka moka di itirela boithatelo,+ 17 eupša o ile a dira dilo tše dibotse gore a bontšhe+ gore ke yena Modimo wa mohuta mang. A le nešetša dipula, a dira gore le bune dienywa tše dintši mašemong a lena,+ ebile a le fa dijo tše dintši gore le je le khore le be le thabe.”+ 18 Le ge ba ile ba bolela dilo tše, ba ile ba swanelwa ke go šoma ka thata go thibela batho bao gore ba se ke ba ba direla sehlabelo.

19 Eupša Bajuda ba ile ba fihla ba etšwa Antiokia le Ikonia gomme ba hlohleletša mašaba gore a hlasele Paulo.+ Ke moka mašaba ao a kgatla Paulo ka maswika, a mo gogela ka ntle ga motse a nagana gore o hwile.+ 20 Le ge go le bjalo, eitše ge barutiwa ba mo dikaneditše, a ema gomme a tsena motseng. Ke moka letšatšing le le latelago o ile a sepela le Baranaba ba ya Derebe.+ 21 Ka morago ga gore ba bolele ditaba tše dibotse motseng woo le go dira gore batho ba bantši e be barutiwa, ba ile ba boela Lisitara, Ikonia le Antiokia. 22 Ge ba le moo, ba ile ba matlafatša barutiwa+ le go ba kgothaletša gore ba dule ba hlankela Modimo. Ba re go bona: “Re tlo ba le mathata a mantši pele re ka tsena Mmušong wa Modimo.”+ 23 Ke moka ba ile ba kgetha bagolo diphuthegong ka moka,+ ba rapela ba ba ba itima dijo,+ ba tshepa gore Jehofa o tla ba hlokomela ka ge ba be ba šetše ba dumela go yena.

24 Ke moka ba ile ba feta Pisidia ba ya Pamfilia.+ 25 Ge ba fetša go bolela ditaba tše dibotse Perega, ba ile ba theogela Atalia. 26 Go tloga moo ba ile ba sepela ka sekepe ba ya Antiokia. Ge ba le moo banababo rena ba ile ba ba rapelela gore Modimo a ba šegofatše ka baka la mošomo wo ba o dirilego.+

27 Ge ba fihlile Antiokia ba ile ba kgoboketša phuthego, gomme ba e hlalosetša dilo tše dintši tšeo Modimo a bego a ba thušitše gore ba di dire. Ba ba hlalosetša le gore ga bjale Modimo o dumeletše batho ba ditšhaba gore le bona e be barutiwa.+ 28 Ka gona ba ile ba fetša nako e ntši ba na le barutiwa ba moo.