Bakorinthe ba Bobedi
5 Re a tseba gore le ge ntlo ya rena ya mo lefaseng, e lego mmele wa rena wo o swanago le tente o ka senywa,+ Modimo o tlo re nea ntlo kua legodimong yeo e sego ya dirwa ka matsogo,+ yeo e ka se kego ya senyega. 2 Ntlong ye ya lefaseng re kwa bohloko, re fela pelo ya go tlo hwetša* ntlo ya rena yeo re e lokišeleditšwego legodimong,+ 3 ka gobane ge re tsena go yona re ka se hloke mo re dulago.* 4 Nnete ke gore rena bao re lego ka tenteng ye re kwa bohloko, re gateletšegile, ka gobane ga re nyake go tšwa ka tenteng ye, eupša re nyaka go tsena ka tenteng e nngwe+ e le gore re hwetše bophelo le gore re se sa hwa.+ 5 Modimo+ ke yena a re lokišeleditšego bophelo bjo, ebile o re neile moya wa gagwe e le gore re kgodišege gore dilo tše di tlo tla.+
6 Re kgodišegile ebile re a tseba gore ge re sa dutše re phela mmeleng wo, re kgole le Morena,+ 7 ka gobane re hlahlwa ke* tumelo, e sego dilo tšeo re di bonago. 8 Eupša re kgodišegile gore re nyaka go phela le Morena+ go e na le go phela ka gare ga mmele wo. 9 Re nyaka gore a re amogele, go sa šetšwe gore re dula le yena goba re kgole le yena. 10 Ka moka ga rena re tlo ema pele ga setulo sa kahlolo sa Kriste, e le gore re ahlolelwe dilo tšeo re di dirilego ge re be re sa phela ka gare ga mmele wo, go sa šetšwe gore ke tše botse goba ke tše mpe.+
11 Ka ge re tseba gore re swanetše go boifa Morena, re phela re ruta ba bangwe gore ba dumele go yena. Ka ge Modimo a re tseba gabotse, ke holofela gore le lena le re tseba gabotse. 12 Ga re ithete, eupša re bolela dilo tše e le gore re le kgothaletše gore le ikgantšhe ka rena, e le gore le kgone go araba bao ba ikgantšhago ka seo batho ba bangwe ba se bonago+ go bona, e sego ka seo se lego ka dipelong tša bona. 13 Ge re be re ka dira dilo bjalo ka motho yo a se nago tlhaologanyo,+ re tla be re di direla Modimo. Ge e ba go na le dilo tšeo re di dirilego ka bohlale, re di diretše gore di le hole. 14 Lerato leo Kriste a re bontšhago lona le re hlohleletša go mo kwa, ka gobane re a kwešiša gore motho o tee o ile a hwela batho ka moka+ ka ge ka moka ga bona ba be ba hwile. 15 O hwetše batho ka moka e le gore ba se sa hlwa ba iphelela,+ eupša ba phelele yena yo a ba hwetšego a ba a tsošwa.
16 Ka gona, go tloga gona bjale go ya pele ga re sa tseba batho go ya ka tsela yeo batho ba bonago dilo ka yona.+ Le ge ba bangwe ba rena re ile ra tseba Kriste go ya ka pono ya batho, gona bjale re mo tseba ka tsela e fapanego.+ 17 Ge e ba motho a le boteeng le Kriste, Modimo o mmopile leswa.+ Dilo tša kgale di fedišitšwe gomme gwa bopša tše diswa. 18 Dilo ka moka di tšwa go Modimo, ke yena a ilego a dira gore re boele re be le segwera se sebotse le yena a diriša Kriste,+ le go re nea mošomo wa gore re thuše ba bangwe gore ba boele ba be le segwera se sebotse le yena.+ 19 Se se ra gore Modimo o diriša Kriste gore batho ba boele ba be le segwera se sebotse le yena+ le go ba swarela dibe tša bona.+ O re file mošomo wa gore re botše batho gore ba ka boela ya ba bagwera ba gagwe.+
20 Ka gona re baemedi+ ba Kriste+ gomme go bjalo ka ge eka Modimo o re kgopetše gore re yo botša batho gore ba boele ba gwerane le yena. 21 Kriste ga se a ka a dira sebe+ eupša Modimo o mo dirile sehlabelo e le gore re lebalelwe dibe le gore ka yena re be bao ba lokilego pele ga Modimo.+