Samuele wa Pele
2 Hanna a rapela a re:
Molomo wa ka o bulegile gore ke kgone go araba manaba a ka,
Ke thabela go phološwa ke wena.
2 Ga go yo mokgethwa go swana le wena Jehofa,
Ga go na yo mongwe ge e se wena,+
Ebile ga go leswika leo le swanago le wena Modimo wa rena.+
3 Le se ke la dulela go bolela ka go ikgogomoša,
Tlogelang go ikgantšha ge le bolela,
Ka gobane Jehofa ke Modimo yo a tsebago tšohle,+
Ebile o ahlola ka toka dilo tšeo batho ba di dirago.
5 Batho bao ba bego ba khora, ba swanetše go šoma ka thata gore ba hwetše dijo,
Eupša bao ba swerwego ke tlala, ba ka se sa swarwa ke tlala gape.+
Mosadi wa moopa o belege bana ba šupago,+
Eupša mosadi yo a bego a na le bana ba bantši, o bolawa ke bodutu.
7 Jehofa o kgona go dira gore motho e be modiidi le gore e be mohumi,+
O kgona go kokobetša motho le go mo phagamiša.+
8 O thuša batho ba maemo a tlase gore ba se sa dula leroleng,
E le gore ba dule le bakgomana,
Gomme a ba fa maemo a godimo.
Diphilara tša lefase ke tša Jehofa,+
Ebile o beile lefase godimo ga tšona.
9 O leta ditsela tša batho ba gagwe bao ba tshepegago,+
Eupša batho ba babe ba tla fedišetšwa leswiswing,+
Ka gobane motho ga a atlege ka maatla a gagwe.+
10 Jehofa o tla robaganya bao ba lwago le yena,+
O tla ba galefela bjalo ka modumo wa legadima a le legodimong.+
11 Ke moka Elikana a ya ntlong ya gagwe kua Rama, eupša morwa wa gagwe a dula le moperisita Eli gomme a thoma go hlankela Jehofa.+
12 Barwa ba Eli bona e be e le batho ba babe.+ Ba be ba sa hlomphe Jehofa. 13 Go e na le gore ba tšee dikarolo tša bona dihlabelong tšeo batho ba bego ba di tliša, bona ba be ba dira dilo tše di latelago:+ Ge motho a be a neela sehlabelo, motho yoo a thušago moperisita o be a etla a swere foroko ya meno a mararo. Ge nama e dutše e apeiwa, 14 o be a tsenya foroko yeo ka sebjaneng goba ka pitšeng e nngwe le e nngwe ya go apea. Selo le ge e le sefe seo foroko e tšwago le sona, moperisita o be a itšeela sona. Tše ke dilo tšeo ba bego ba di dira Baisiraele ka moka bao ba bego ba etla Shilo. 15 Le gona, pele motho yo a dirago sehlabelo a ka tšhuma makhura,+ motho yo a thušago moperisita o be a etla go yena gomme a re: “Tliša nama gore e bešetšwe moperisita, e le gore a hwetše nama e tala e sego e apeilwego.” 16 Ge motho yoo a be a ka re: “E re ba tšhume makhura pele,+ ke moka o itšeele yeo o e nyakago,” motho yo a thušago moperisita o be a re: “Aowa, mphe yona gona bjale. Ge e ba o sa dire bjalo, ke tla itšeela yona ka kgang!” 17 Ka gona sebe seo se bego se dirwa ke batho bao ba bego ba thuša baperisita ya ba se segolo kudu pele ga Jehofa+ ka gobane ba be ba swara sebego sa Jehofa ka lenyatšo.
18 Ka nako yeo, Samuele o be a hlankela+ Jehofa e le mošemanyana, a apere efoda*+ ya lešela la linene. 19 Le gona, mmagwe o be a mo direla seaparo se senyenyane sa go hloka matsogo gomme a mo išetša sona ngwaga o mongwe le o mongwe, ge yena le monna wa gagwe ba be ba etla go tlo dira sehlabelo sa ngwaga le ngwaga.+ 20 Ka morago ga mo, Eli a šegofatša Elikana le mosadi wa gagwe a re: “Eka Jehofa a ka go nea ngwana ka mosadi yo, legatong la morwa yo a mo neilego Jehofa.”+ Ke moka ba boela gae. 21 Jehofa a kwela Hanna bohloko gomme a mo thuša gore a kgone go ima.+ Ke moka a ba le barwa ba bangwe ba bararo le barwedi ba babedi. Le gona mošemanyana Samuele, a tšwela pele a gola pele ga Jehofa.+
22 Eli o be a tšofetše kudu eupša o be a kwele ka dilo ka moka tšeo barwa ba gagwe ba bego ba di dira+ Baisiraele ka moka le kamoo ba bego ba robala le basadi bao ba bego ba hlankela mojakong wa tente ya kopano.+ 23 O be a fela a re go bona: “Ke ka baka la eng le duletše go dira dilo tša go swana le tše? Ka gobane dilo tšeo ke di kwago ka lena bathong ke tše mpe. 24 Aowa barwa ba ka, dilo tšeo ke kwago batho ba Jehofa ba di phatlalatša ga di kgahliše. 25 Ge e ba motho a ka direla yo mongwe sebe, motho yo mongwe a ka mo kgopelela go Jehofa gore a mo thuše.* Eupša ge e ba motho a ka direla Jehofa sebe,+ ke mang yo a ka mo rapelelago?” Eupša ba gana go theetša tatago bona, gomme ka baka leo Jehofa o be a ikemišeditše go ba bolaya.+ 26 Nakong yeo ka moka, mošemanyana Samuele o be a dutše a gola ebile a ratwa kudu ke Jehofa le batho.+
27 Mohlanka wa Modimo a tla go Eli a re go yena: “Se ke seo Jehofa a se boletšego: ‘Na ga se ka iponagatša go rakgolokhukhu wa gago le ba ntlo ya gagwe nakong ya ge e be e le makgoba kua Egepeta ntlong ya Farao?+ 28 Ke ile ka ikgethela rakgolokhukhu wa gago melokong ka moka ya Isiraele+ gore e be moperisita wa ka e le gore a ye aletareng ya ka+ gomme a dire dihlabelo le diorelo* a be a apare efoda pele ga ka gomme nna ka fa ba ntlo ya rakgolokhukhu wa gago dihlabelo ka moka tšeo Baisiraele ba di dirilego ka mollo.+ 29 Ke ka baka la eng le duletše go nyatša sehlabelo sa ka le sebego sa ka tšeo ke laetšego gore di dirwe lefelong leo ke dulago go lona?+ Ke ka baka la eng le duletše go hlompha barwa ba lena go feta nna ka go inontšha ka dikarolo tše dikaonekaone tšeo batho ba setšhaba sa ka sa Isiraele ba ntlišetšago tšona?+
30 “‘Ke ka baka leo Jehofa Modimo wa Isiraele a rego: “Ke ile ka re: Ba ntlo ya gago le ba ntlo ya borakgolokhukhu ba gago, ba tla dula ba sepela pele ga ka.”+ Eupša bjale Jehofa o re: “Ga go sa le bjalo, ka gobane bao ba nkgodišago ke tla ba godiša,+ eupša bao ba nnyatšago ka dira gore ba nyatšege.” 31 Tseba gore go tla matšatši ao ke tlago go tloša maatla a gago le a borakgolokhukhu ba gago, e le gore go se hlwe go e ba le motho yo a phelago go fihlela a tšofala ntlong ya gago.+ 32 O tla bona lenaba le le lefelong leo ke dulago go lona ka gare ga dilo ka moka tše dibotse tšeo di diretšwego Isiraele+ ebile go ka se sa hlwa go e ba le motšofadi ntlong ya gago. 33 Setlogolo sa gago seo nka se se tlogedišego go hlankela aletareng ya ka se tla dira gore mahlo a gago a se sa bona gabotse gomme sa go kweša bohloko kudu, eupša batho ba bantši ba ntlong ya gago ba tla bolawa ka sabola.+ 34 E le gore o tsebe gore dilo ka moka tšeo ke di bolelago ke nnete, ke tla go fa leswao le: Barwa ba gago ba babedi, e lego Hofini le Finease ba tla hwa ka letšatši le letee.+ 35 Ke tla ikgethela moperisita yo a botegago.+ O tla dira seo se dumelelanago le pelo ya ka. Ke tla dira gore ditlogolo tša gagwe di dule di hlankela e le baperisita go ya go ile* gomme o tla dula a sepela pele ga motlotšwa wa ka. 36 Motho yo a ka šalago ntlong ya gago o tla tla a tlo khunamela moperisita yoo gomme a kgopela mošomo e le gore a hwetše tšheletenyana le dijo, gomme o tla re: “Hle ntire gore ke be moperisita e le gore ke be le sa go ja.”’”+