Genesi

22 Ka morago ga dilo tše Modimo wa nnete a leka Aborahama.+ A re go yena: “Aborahama!” Yena a re: “Ke nna yo!” 2 Ke moka Modimo a re: “Hle tšea morwa wa gago, yena morwa wa gago o tee feela yo o mo ratago,+ e lego Isaka.+ O ye nageng ya Moria+ gomme ge o fihla moo o dire sehlabelo ka yena thabeng yeo ke tlago go go bontšha yona.”

3 Ke moka Aborahama a tsoga ka masa a beakanya tonki ya gagwe, gomme a tšea bahlanka ba gagwe ba babedi le Isaka morwa wa gagwe. A phapha dikgong tša go dira sehlabelo ke moka a swara tsela ya go ya lefelong leo Modimo wa nnete a mo kgethetšego gore a ye go lona. 4 Ka letšatši la boraro ya re ge Aborahama a lebelela, a bona lefelo leo le le kgojana. 5 Bjale Aborahama a re go bahlanka ba gagwe: “Lena šalang mo le tonki ye, eupša nna le mošemane yo re nyaka go ya kua pejana go yo rapela, gomme re tla boa go lena.”

6 Bjale Aborahama a tšea dikgong tša go dira sehlabelo, a di rweša Isaka morwa wa gagwe, ke moka yena a tšea mollo le thipa gomme ba sepela ka moka. 7 Isaka a re go Aborahama tatagwe: “Tate!” Yena a re: “Ke nna yo ngwanaka!” Ke moka a re: “Mollo le dikgong šidi, eupša nku ya go dira sehlabelo e kae?” 8 Aborahama a re: “Modimo o tla re nea nku ya go dira sehlabelo+ ngwanaka.” Ke moka bobedi bja bona ba sepela mmogo.

9 Mafelelong ba fihla lefelong leo Modimo wa nnete a bego a mmoditše gore a ye go lona. Ke moka Aborahama a aga aletare moo gomme a paka dikgong godimo ga yona, a tlema Isaka morwa wa gagwe maoto le matsogo a mmea aletareng godimo ga dikgong.+ 10 Aborahama a tšea thipa gomme o be a šetše a le kgauswi le go bolaya morwa wa gagwe.+ 11 Eupša morongwa wa Jehofa a mmitša a le magodimong a re: “Aborahama, Aborahama!” Yena a araba a re: “Ke nna yo!” 12 Ke moka Modimo a bolela a diriša morongwa wa gagwe a re: “O se ke wa bolaya mošemane yo, le gona o se ke wa ba wa mo gobatša. Bjale gona ke a tseba gore o a nkwa ebile o ntlhompha kudu, ka gobane ga se wa nkgana ka morwa wa gago, e lego yena morwa wa gago a nnoši.”+ 13 Ka yona nako yeo, Aborahama a emiša mahlo gomme a bona nku e tona pele ga gagwe e tantšwe ka dinaka mehlašaneng. Ke moka Aborahama a tšea nku yeo a dira sehlabelo ka yona go e na le go se dira ka morwa wa gagwe. 14 Aborahama a reela lefelo leo leina a re ke Jehofa-jire.* Ke ka baka leo le lehono batho ba sa tlwaetšego go bolela gore: “Jehofa o tla nea dilo tšeo di nyakegago thabeng ya gagwe.”+

15 Morongwa wa Jehofa a bitša Aborahama ka lekga la bobedi a le magodimong 16 a re: “Jehofa o re: ‘Ke ena ka leina la ka,+ ke re ka ge o dirile se gomme o se wa nkgana ka morwa wa gago, e lego yena morwa wa gago a nnoši,+ 17 ke tla go šegofatša gomme ka dira gore o be le bana ba bantši go swana le dinaledi tša magodimong le go swana le santa ya lebopong la lewatle.+ Le gona, ngwana wa gago o tla tšea metse ya manaba a gagwe gomme ya ba bohwa bja gagwe.+ 18 Ebile ditšhaba ka moka tša lefase di tla šegofatšwa ka yena+ ka ge o ile wa ntheetša.’ ”+

19 Ka morago ga moo, Aborahama a boela go bahlanka bale ba gagwe, ba sepela ka moka ba ya Beresheba+ gomme Aborahama a tšwela pele a dula gona moo Beresheba.

20 Bjale ka morago ga moo Aborahama a botšwa gore: “Milika mosadi wa Nahoro morwarrago,+ le yena o na le barwa. Wa leitšibulo ke 21 Utsi, gwa latela Busi morwarragwe, gomme ba bangwe ke Kemuele tatago Arama, 22 Kesede, Haso, Pilidashe, Jidilafo le Bethuele.”+ 23 Bethuele e ile ya ba tatago Rebeka.+ Milika o belegetše Nahoro morwarrago Aborahama bana ba ba seswai. 24 Le gona o be a na le mosadi wa serethe yoo leina la gagwe e bego e le Reuma. Ka morago le yena o ile a belega barwa ba bangwe e lego Teba, Gahama, Tahashe le Maaka.