Petro wa Pele
5 Ka gona, ka ge ke le mogolo go swana le lena ebile ke bone ge Kriste a be a tlaišwa, gomme go no swana le lena ke tlo hwetša letago leo le tlago go utollwa,+ ke kgopela bagolo bao ba lego gare ga lena ke re: 2 Dišang mohlape wo Modimo+ a le neilego wona gore le o hlokomele le le balebeledi, le sa gapeletšwe ke motho, eupša le dira bjalo ka go rata ka ge e le seo Modimo a se nyakago.+ Le gona le se ke la o hlokomela ka gobane le nyaka go ikhola,+ eupša le dire seo ka mafolofolo. 3 Le se ke la laola batho ba Modimo,+ eupša le beng mehlala e mebotse go mohlape.+ 4 Ge modiši yo mogolo+ a bonagaditšwe, le tla fiwa moputso* wa letago wo o ka se kego wa senyega.+
5 Le lena banna ba baswa, ikokobeletšeng banna ba bagolo.+ Eupša ka moka ga lena le ikokobetšeng* ge le dirišana, ka gobane Modimo o lwa le batho bao ba ikgogomošago, eupša bao ba nago le boikokobetšo o ba bontšha botho bjo bo sa re swanelago.+
6 Ka gona, ikokobeletšeng Modimo wa rena yo a nago le maatla,* e le gore a le godiše ka nako e swanetšego+ 7 ge le dutše le lahlela dipelaelo tša lena ka moka go Modimo,+ ka gobane o na le taba le lena.+ 8 Phafogang le dule le ntšhitše mahlo dinameng.+ Lenaba la lena Diabolo o sepelasepela go swana le tau e rorago, a nyaka yo a ka mo metšago.+ 9 Eupša elwang le yena+ le tiile tumelong, le tseba gore mathata ao a le welago ga a wele lena feela, eupša a wela le banababo lena lefaseng ka moka.+ 10 Eupša ka morago ga gore le tlaišege ka nakwana, Modimo yo a nago le botho bjo bogolo,* yo a le biditšego gore le tle le be balatedi ba Kriste le gore le hwetše letago la go ya go ile,+ o tla le tlwaetša ka mo go feletšego.* O tla le tiiša,+ a le thuša gore le dule le tshepega ebile a le matlafatša.+ 11 Maatla ke a gagwe go ya go ile. Amene.
12 Ke kgopetše ngwanabo rena Silibano*+ yo a tshepegago gore a nthuše go ngwala lengwalo le le lekopana, e le gore ke le kgothatše le gore ke le bontšhe gore ka nnete Modimo o le bontšhitše botho bjo bogolo. Dulang le itshwareletše ka botho bjo bjo bogolo. 13 Yo* a lego Babilona, e lego yena yo a kgethilwego go swana le lena, o a le dumediša, le Mareka+ yo a lego bjalo ka morwa wa ka le yena o a le dumediša. 14 Dumedišanang ka go khisana go bontšha gore le a ratana.*
Eka lena barutiwa ba Kriste ka moka le ka ba le khutšo.