Ditiro tša Baapostola
22 “Banabešo le botate, ntheetšeng ge ke le hlalosetša seo se diragetšego.”+ 2 Bjale ge ba ekwa gore o bolela le bona ka Seheberu ba homola ba re tuu! Ke moka yena a re: 3 “Nna ke Mojuda+ yo a belegetšwego Tareso kua Tsilitsia,+ eupša ke tsene sekolo mo Jerusalema ke rutwa ke Gamaliele.+ Ke ile ka rutwa gore ke latele dilo ka moka tšeo di lego Molaong wa Moshe.+ Ke be ke šomela Modimo ka mafolofolo kudu go no swana le ka mokgwa wo le lena le dirago lehono.+ 4 Ke ile ka tlaiša banna le basadi ka moka bao ba latelago Tsela ye ya Bokriste. Ke be ke ba tlema ke ba iša kgolegong ebile ke dira gore ba bolawe.+ 5 Moperisita yo a phagamego le bagolo ka moka ba a tseba gore taba ye ke nnete. Ke bona ba mphilego mangwalo a gore ke ye go Bajuda ba gešo kua Damaseko, le gona ke be ke le tseleng ya go yo tšea barutiwa bao ba golegilwego gore ke ba tliše Jerusalema gore ba tle ba otlwe.
6 “Eupša mosegare wa sekgalela ge ke be ke sa le tseleng ke le kgauswi le go batamela Damaseko, kapelapela go ile gwa tšwelela seetša se segolo go tšwa legodimong sa gadima go ntikologa,+ 7 ka wela fase ka kwa lentšu le re go nna: ‘Saulo, Saulo, o ntlaišetšang?’ 8 Ka araba ka re: ‘Mong wa ka, ke wena mang?’ Yena a re go nna: ‘Ke nna Jesu wa Monatsaretha, yo o mo tlaišago.’ 9 Bjale banna bao ba bego ba na le nna ba ile ba bona seetša eupša ba be ba sa kwe lentšu la yo a bego a bolela le nna. 10 Ka gona nna ka re: ‘Morena, ke direng?’ Morena a nkaraba a re: ‘Emelela o ye Damaseko, gona moo go na le motho yo a tlago go go botša dilo ka moka tšeo o kgethilwego go tlo di dira.’+ 11 Batho bao ke bego ke na le bona ba ile ba ntshwara ka letsogo ba ntlhahla go ba go fihla Damaseko ka gobane ke be ke foufetše ka baka la ge seetša sela se ile sa mphadimela kudu.
12 “Bjale Ananiase, e lego monna yo a bego a latela Molao, a hlompha Modimo kudu ebile a bolelwa gabotse ke Bajuda ka moka bao ba dulago moo, 13 o ile a tla go nna, a ema kgauswi le nna, a re: ‘Saulo ngwanešo, bula mahlo!’ Ke moka ka yona nako yeo mahlo a ka a bulega ka thoma go mmona.+ 14 Yena a re: ‘Modimo wa borakgolokhukhu ba rena o go kgethile gore o tle o tsebe gore yena o nyaka eng le gore o tle o bone yo a lokilego+ le go kwa lentšu la gagwe, 15 ka gobane o swanetše go tlo botša batho ka moka dilo tšeo o di bonego le tšeo o di kwelego.+ 16 Bjale o sa letileng? Ema o kolobetšwe e le gore Modimo a go lebalele dibe tša gago+ leineng la Jesu.’+
17 “Ge ke be ke boetše Jerusalema+ gomme ke rapela ka tempeleng, ke ile ka bona pono. 18 Ka bona Jesu a re go nna: ‘Dira ka pela o tloge mo Jerusalema ka gobane ba ka se amogele dilo tšeo o tlago go ba botša tšona mabapi le nna.’+ 19 Ke moka nna ka re: ‘Batho ba tseba gabotse gore ke be ke tšama ke eya disinagogeng ka moka ke swara batho bao ba dumelago go wena ke ba betha.+ 20 Ge Stefano yo e bego e le hlatse ya gago a be a bolawa ke be ke dumelelana le taba yeo, ebile ke le moo ke hlokometše diaparo tša ka ntle tša batho bao ba mmolayago.’+ 21 Eupša Morena o ile a re go nna: ‘Sepela, ka gobane ke tla go romela ditšhabeng tša kgole.’”+
22 Ba ile ba mo theetša go fihlela a bolela mantšu ao. Ke moka ba goeletša ba re: “Bolayang motho yo, ka gobane ga se a swanela go phela!” 23 Ba be ba goeletša, ba lahlaganya diaparo tša bona tša ka ntle ebile ba thuntšhetša lerole godimo.+ 24 Ka gona moetapele wa mašole o ile a laela gore Paulo a tlišwe mo mašole a dulago gona, a re o swanetše go sekišwa ebile a otlwe, gore a tsebe gabotse gore ke ka baka la eng batho ba goeletša gakaakaa gore a bolawe. 25 Eupša ge ba fetša go mo patlamiša gore ba mmethe ka sefepi, Paulo o ile a botšiša molaodi wa mašole yo a bego a eme moo a re: “Na le dumeletšwe ke molao gore le otle motho yo e lego Moroma a se a ahlolwa?”+ 26 Bjale ge molaodi wa mašole a ekwa taba ye o ile a ya go moetapele wa mašole a re go yena: “Bjale o ikemišeditše go dira eng ka motho yo ka gobane ke Moroma?” 27 Ka gona moetapele wa mašole o ile a batamela Paulo a re go yena: “Mpotše mo, na o Moroma?” Yena a re: “Ee.” 28 Moetapele wa mašole a re: “Ke rekile ditshwanelo tša go ba Moroma ka tšhelete e ntši kudu.” Paulo yena a re: “Eupša nna ke belegwe ke le Moroma.”+
29 Ka yona nako yeo banna bao ba bego ba le kgauswi le go mo sekiša le go mo tlaiša ba ile ba mo tlogela. Moetapele wa mašole o ile a tšhoga kudu ge a ekwa gore Paulo ke Moroma ka ge a be a šetše a mo tlemile ka diketane.+
30 Ka ge a be a nyaka go tseba gore gabotsebotse ke ka baka la eng Bajuda ba mo latofatša, o ile a mo lokolla letšatšing leo le latelago gomme a laela gore baperisita ba bagolo le lekgotla la Sanhedrine ba kopane. Ke moka o ile a tliša Paulo pele ga bona.+