Timotheo wa Bobedi

2 Ka gona wena Timotheo ngwanaka,+ dula o kgopela Modimo gore a go nee maatla a diriša botho bjo bogolo bjo Kriste Jesu a bo bontšhago, 2 gomme dilo tšeo ke go boditšego tšona pele ga dihlatse tše dintši,+ o di rute banna bao ba tshepegago, bao le bona ka morago ba tlago go swanelega go ruta ba bangwe. 3 Ka ge o le lešole la nnete+ la Kriste Jesu, dula o itokišeleditše mathata ao a tlago go go wela.+ 4 Ga go na lešole leo le ka swaregago ka mešomo e mengwe* ge e ba le nyaka go amogelwa ke motho yo a le ngwadišitšego gore e be lešole. 5 Le motho yo a phadišanago dipapading, a ka se thope sefoka ge e ba a sa latele melao ya phadišano.+ 6 Molemi yo a šomago ka thata o swanetše go ba wa mathomo a jago dienywa. 7 Dula o nagana ka seo ke se bolelago gomme Morena o tla go thuša go kwešiša dilo ka moka.

8 Gopola gore Jesu Kriste o tsošitšwe bahung+ le gore e be e le setlogolo sa Dafida.+ Tše ke tšona ditaba tše dibotse tšeo ke di bolelago.+ 9 Ke a tlaišwa ebile ke išitšwe kgolegong bjalo ka ge eka ke sekebekwa+ ka baka la go bolela ditaba tše. Eupša ge e le lentšu la Modimo lona, le ka se tswalelelwe kgolegong.+ 10 Ka gona ke tla tšwela pele ke kgotlelela mathata ka moka ka baka la bao Modimo a ba kgethilego,+ e le gore le bona ba phološwe ka ge ba le boteeng le Kriste Jesu, ebile ba hwetše le ditšhegofatšo tša go ya go ile. 11 Taba ye ke nnete: Ge e ba re hwile le yena, le go phela re tlo phela le yena.+ 12 Ge e ba re tšwela pele re kgotlelela, le rena re tlo buša le yena re le dikgoši.+ Ge re ka mo hlanogela, le yena o tlo re hlanogela,+ 13 ebile ge e ba re sa tshepege, yena o tla no dula a tshepega, ka gobane a ka se be selo seo a sego sona.

14 Dula o ba gopotša dilo tše, ebile o ba laele pele ga Modimo gore ba se ke ba lwa ka mantšu. Go dira bjalo ga go thuše ka selo ka gobane go gobatša bao ba theeditšego. 15 Dira sohle se o ka se kgonago e le gore Modimo a go amogele, o šome ka thata o sa hlabje ke dihlong, ebile o rute lentšu la Modimo o be o le hlalose gabotse.+ 16 Eupša o gane go theetša dipolelo tšeo di hlokago mohola tšeo di dirago gore Modimo a nyatšege,+ ka gobane batho bao ba bolelago dilo tša mohuta woo ba feleletša ba feteletše ka go dira dilo tše mpe, 17 gomme dilo tšeo ba di bolelago di keka go swana le sešo sa go keka. Himeneo le Fileto ke ba bangwe ba batho bao ba bolelago dilo tša mohuta woo.+ 18 Banna ba ba tlogetše dithuto tša nnete, gomme ba bolela gore batho ba šetše ba tsošitšwe bahung,+ ebile ba senya tumelo ya batho ba bangwe. 19 Eupša Modimo o beile motheo o tiilego wo o dulago o eme, wo o nago le leswao leo le rego: “Jehofa* o tseba batho bao e lego ba gagwe,”+ le leo le rego: “Yo mongwe le yo mongwe yo a bitšago leina la Jehofa+ a tlogele go dira dilo tše mpe.”

20 Ka ntlong e kgolo go na le dibjana tša gauta le tša silifera, ebile go na le tša kota le tša letsopa, gomme tše dingwe di dirišetšwa dilo tše bohlokwa, mola tše dingwe di dirišetšwa dilo tšeo di lešago dihlong. 21 Ka gona motho le ge e le ofe yo a sepelelago kgole le dibjana tšeo di lešago dihlong, o tla swana le dibjana tšeo di dirišetšwago dilo tše bohlokwa. E tla ba yo mokgethwa, ya ba sebjana seo se nago le mohola go mong wa sona, seo se loketšego go dira mošomo o mongwe le o mongwe o mobotse. 22 Ka gona tšhaba dikganyogo tšeo di tlišwago ke go ba moswa, eupša o šome ka thata go dira dilo tše di lokilego, go ba le tumelo, lerato le khutšo. O dire dilo tše o na le bao ba tshepago Morena ka dipelo tše di hlwekilego.

23 Le gona, o se ke wa itsenyatsenya dingangišanong tša bošilo le tša go se re selo,+ ka gore o a tseba gore di baka dintwa. 24 Ka gobane mohlanka wa Morena ga se a swanela go lwa eupša o swanetše go bontšha batho ka moka botho,+ a kgone go ruta, a kgone go itshwara le ge a swarwa gampe,+ 25 ebile a be boleta ge a ruta bao ba sa dumelelanego le seo a se rutago.+ Mohlomongwe Modimo a ka dira gore ba fetoge, gomme seo sa ba dira gore ba tsebe nnete.+ 26 Ka morago ga gore ba tsebe nnete ba tla bulega mahlo, gomme ba bona gore Diabolo o ba tantše ba phela gore ba dire seo a se ratago, ke moka ba phafoga ba ba ba tšhaba le morago ba sa lebelele.+