Ebangedi ya Luka
17 Ke moka a re go barutiwa ba gagwe: “Ga go kgonege gore motho a se ke a kgopša, eupša motho yo a dirago gore batho ba bangwe ba kgopše ke yena wa madimabe! 2 Go tla ba kaone gore go tlemelelwe lwala molaleng wa gagwe gomme a lahlelwe ka gare ga lewatle go e na le gore a kgopiše yo mongwe wa ba banyenyane ba.+ 3 Le itlhokomeleng. Ge e ba ngwaneno a go direla phošo o mo kgalemele,+ gomme ge e ba a ka itshola o mo lebalele.+ 4 Le ge a ka go fošetša gašupa ka letšatši gomme a boa go wena gašupa a re: ‘Ntebalele hle.’ O swanetše go mo lebalela.”+
5 Bjale baapostola ba re go Morena: “Re thuše gore re be le tumelo e tiilego.”+ 6 Ke moka Morena Jesu a re go bona: “Ge nkabe le na le tumelo e lekanago le thoro ya mohlare wa mosetata, gona le be le tla botša mohlare wo wa mmurupei la re: ‘Tloga mo o ye o mele ka lewatleng,’ gomme wona o be o tla le kwa.+
7 “Ke mang go lena yo a ka rego ge a na le mohlanka yo a lemago goba yo a dišago a ka rego ge mohlanka yoo a boa mašemong a re go yena, ‘Etla mo ka pela re je’? 8 Go e na le moo, na a ka se re go yena, ‘Tšhentšha diaparo tša gago, o ntokišetše dijo tša mantšiboa gomme o ntlhankele go fihlela ke fetša go ja le go nwa, ka morago ga moo o tla kgona o eja le go nwa?’ 9 A ka se leboge mohlanka yoo ka gobane o be a dira mošomo woo a bego a swanetše go o dira. 10 Ka gona le lena ge le dirile dilo ka moka tšeo le swanetšego go di dira le re: ‘Ga re bahlanka ba selo. Dilo tšeo re di dirilego ke tšeo re bego re swanetše go di dira.’”+
11 Ge Jesu a be a eya Jerusalema, o ile a feta lefelong leo Samaria le Galelia di kopanago go lona. 12 Ge a be a tsena motsaneng o mongwe, banna ba lesome bao ba bego ba na le bolwetši bja lephera ba ile ba mo hlakanetša eupša ba ile ba emela kgojana le yena.+ 13 Ke moka ba mo goeletša ba re: “Jesu, Morutiši, re šokele hle!” 14 Ge Jesu a ba bona a re go bona: “Eyang go baperisita gore ba le bone.”+ Ke moka ge ba le tseleng ya go ya moo ba fola.+ 15 Ge yo mongwe wa bona a bona gore o fodile o ile a boela morago go Jesu, a tšama a reta Modimo ka lentšu le le hlabošago. 16 A khunama pele ga Jesu sefahlego sa gagwe se kgwathile fase go bontšha gore o a mo hlompha, a mo leboga. Monna yoo e be e le Mosamaria.+ 17 Ke moka Jesu a re: “Go fodišitšwe ba lesome, bjale ba bangwe ba senyane ba kae? 18 Na ba bangwe ba paletšwe ke go boa ba tla ba reta Modimo, ka ntle le motho yo yo e lego wa setšhaba se sengwe?” 19 Ke moka Jesu a re go monna yoo: “Emelela o sepele. Tumelo ya gago e go fodišitše.”+
20 Ge Bafarasei ba mmotšiša gore Mmušo wa Modimo o tla neng,+ o ile a re go bona: “Mmušo wa Modimo o ka se tle ka tsela yeo batho ka moka ba tla o lemogago. 21 Ebile batho ba ka se re: ‘Ke wo’ goba ‘ke wola!’ Ge e le gabotse Mmušo wa Modimo o mo gare ga lena.”+
22 Ke moka Jesu a re go barutiwa ba gagwe: “Go tla tla nako yeo le tlago go duma go bona Morwa wa motho a na le lena eupša le ka se e bone. 23 Batho ba tla re go lena, ‘Bonang šole!’ goba, ‘bonang šo!’ Eupša le se ke la tšwela ka ntle goba la ba šala morago.+ 24 Go ba gona ga Morwa wa motho+ go tlo swana le legadima leo le gadimago go tloga karolong e nngwe ya legodimo go ya karolong e nngwe ya legodimo.+ 25 Le ge go le bjalo, sa pele o swanetše go welwa ke ditlaišego tše dintši gomme a ganwe ke moloko wo.+ 26 Go oketša moo, go no swana le kamoo dilo di bego di le ka gona mehleng ya Noa,+ le mehleng ya Morwa wa motho di tla ba bjalo.+ 27 Mehleng ya Noa batho ba be ba eja, ba enwa, banna ba nyala le basadi ba nyalwa go fihlela letšatšing leo Noa a tsenego ka lona ka arekeng,+ ke moka Meetsefula a tla a ba fediša ka moka.+ 28 Ebile maemo a tla be a swana le a mehleng ya Lota.+ Batho ba mehleng yeo ba be ba eja, ba enwa, ba reka, ba rekiša, ba bjala ebile ba aga. 29 Eupša ka letšatši leo Lota a tšwilego ka lona Sodoma, go ile gwa na mollo le maswika a tukago gomme tša ba fediša ka moka.+ 30 Go tla direga se se swanago letšatšing leo ge Morwa wa motho a utollwa.+
31 “Letšatšing leo, anke motho yo a lego ka godimo ga ntlo, yoo dilo tša gagwe di lego ka ntlong a se ke a fologa go yo di tšea. Ka mo go swanago anke motho yo a lego mašemong a se ke a boela gae gore a yo tšea dilo tšeo a di šiilego. 32 Gopolang mosadi wa Lota.+ 33 Yo mongwe le yo mongwe yo a nyakago go šireletša bophelo bja gagwe,* o tla bo loba. Eupša yo mongwe le yo mongwe yo a bo lobago, o tla bo phološa.+ 34 Ke le botša gore: Bošegong bjoo batho ba babedi ba tla be ba le mpeteng o tee. Yo mongwe o tla tšewa eupša yo mongwe a tlogelwa.+ 35 Basadi ba babedi ba tla be ba šila lwaleng. Yo mongwe o tla tšewa gomme yo mongwe a tlogelwa.” 36* —— 37 Ka gona, ge ba mo araba ba re: “Kae Morena?” A re go bona: “Kae le kae moo go nago le setopo go tla kgobokana dintšhu.”+