Ebangedi ya Mareka

14 Bjale go be go šetše matšatši a mabedi+ gore e be Paseka+ le Monyanya wa Dinkgwa tše di sa Omelwago.+ Baperisita ba bagolo le ditsebi tša molao ba be ba mo logela maanomabe a gore ba mo sware le go mmolaya,+ 2 ka gobane ba be ba re: “A re se keng ra mo swara monyanyeng ka gobane mohlomongwe batho ba ka tsoša mpherefere.”

3 Bjale ge Jesu a be a le Bethania ka ntlong ya Simone yo a kilego a ba le lephera, mosadi yo mongwe o ile a tla le lepotlelwana la alapasetere leo le bego le na le makhura ao a nkgago bose ao a bego a dirilwe ka nareda* ya nnete ebile a tura kudu. O ile a bula lepotlelwana leo ke moka a thoma go tšhela Jesu hlogong.+ 4 Ge ba bangwe ba bona seo ba galefa ba re: “Ke ka baka la eng makhura a a sentšwe? 5 Ka gobane makhura ao nkabe a rekišitšwe ka ditenariase* tše fetago tše 300 gomme tšhelete yeo ya fiwa badiidi!” Mosadi yoo o be a ba tenne kudu. 6 Eupša Jesu a re: “Mo tlogeleng. Ke ka baka la eng le mo tshwenya? O ntiretše selo se sebotse.+ 7 Ka gobane le dula le na le badiidi ka mehla+ ebile le ka ba direla dilo tše dibotse nako e nngwe le e nngwe ge le nyaka go ba direla tšona, eupša nna le ka se dule le na le nna.+ 8 O dirile se a ka se kgonago. O tšhetše mmele wa ka ka makhura ao a nkgago bose e le go ntokišeletša ge ke tlo bolokwa.+ 9 Ruri ke le botša gore kae le kae mo ditaba tše tše dibotse di tlago go bolelwa gona lefaseng ka moka,+ se mosadi yo a se dirilego le sona se tla bolelwa e le go mo gopola.”+

10 Judase Isikariote, e lego yo mongwe wa baapostola ba 12, a ya go baperisita ba bagolo e le gore a ba thuše go swara Jesu.+ 11 Ge ba ekwa seo ba thaba, gomme ba mo tshepiša go mo fa tšhelete ya silifera.+ Ka gona a thoma go dula a nyaka sebaka se sebotse sa gore a ba thuše gore ba mo sware.

12 Bjale ge letšatši la mathomo la Monyanya wa Dinkgwa tše di sa Omelwago+ le fihla, leo ba bego ba tlwaetše go neela sehlabelo sa Paseka+ ka lona, barutiwa ba gagwe ba ile ba re go yena: “O nyaka gore re go lokišeletše go ja Paseka kae?”+ 13 Ke moka a roma barutiwa ba gagwe ba babedi a re go bona: “Eyang motseng gomme monna yo a rwelego nkgo ya go dirwa ka letsopa yeo e nago le meetse o tlo gahlana le lena. Le mo latele,+ 14 gomme kae le kae mo a tsenago gona le botše mong wa ntlo le re: ‘Morutiši o re: “E kae phapoši ya baeng yeo nka jelago Paseka le barutiwa ba ka go yona?”’ 15 O tla le bontšha phapoši e kgolo ya ka godimo yeo e nago le dilo tšeo re di hlokago, le re lokišeletše gore re tle re keteke Paseka moo.” 16 Ka gona barutiwa ba tsena motseng, ba hwetša dilo di le ka mokgwa woo a ba boditšego ka gona, ke moka ba lokišetša Paseka.

17 Ge e šetše e le mantšiboa, o ile a tla a na le baapostola ba gagwe ba 12.+ 18 Ge ba be ba dutše tafoleng ba eja, Jesu o ile a re: “Ruri ke le botša gore yo mongwe wa lena o tla dira gore manaba a ka a ntshware.”+ 19 Ba thoma go kwa bohloko gomme yo mongwe le yo mongwe wa bona a re: “Akere ga se nna?” 20 A re go bona: “Ke yo mongwe wa baapostola ba 12 yo a tsenyago seatla ka sebjaneng gotee le nna.+ 21 Morwa wa motho o a tloga bjalo ka ge go ngwadilwe ka tsela ye ka yena, eupša yo madimabe ke motho yoo Morwa wa motho a tlago go swarwa ke manaba a gagwe ka lebaka la gagwe!+ Go ka be go bile kaone ge nkabe motho yoo a se a belegwa.”+

22 Ge ba dutše ba eja, a tšea senkgwa, a rapela, a se ngwathaganya a ba fa sona, a re: “Tšeang, senkgwa se se swantšhetša mmele wa ka.”+ 23 A tšea komiki yeo e nago le beine, a rapela gomme a ba fa yona, ke moka ka moka ga bona ba nwa ka yona.+ 24 A re go bona: “Beine ye e swantšhetša ‘madi a ka+ a kgwerano e mpsha,’+ ao a tlago go tšhollwa gore a hole batho ba bantši.+ 25 Ruri ke re go lena: Nka se sa nwa beine ye go fihla letšatšing leo ke tlago go nwa beine e mpsha Mmušong wa Modimo.” 26 Mafelelong, ka morago ga gore ba opele dikoša tša go tumiša Modimo, ba ile ba ya Thabeng ya Mehlware.+

27 Ke moka Jesu a re go bona: “Ka moka ga lena le tlo ntlogela, ka baka la gore Mangwalo a Makgethwa a re: ‘Ke tla hlaba modiši+ gomme dinku tša phatlalala.’+ 28 Eupša ka morago ga ge ke tsošitšwe bahung, ke tla ya Galelia gomme ka le emela moo.”+ 29 Eupša Petro a re go yena: “Le ge ba bangwe ka moka ba ka go tlogela, nna nka se go tlogele.”+ 30 Jesu a re go yena: “Ruri ke go botša gore lehono, bošegong bjona bjo, pele mokoko o lla gabedi wena o tlo ntatola gararo.”+ 31 Eupša Petro a dulela gore go yena: “Le ge nka gapeletšega go hwa le wena, nka se go latole le gatee.” Le ba bangwe ka moka ba bolela se se swanago.+

32 Ke moka ba tla lefelong leo le bitšwago Getsemane gomme Jesu a re go barutiwa ba gagwe: “Dulang mo ke sa ya go rapela.”+ 33 A tšea Petro, Jakobo le Johane a sepela le bona+ gomme a thoma go nyama le go tshwenyega kudu. 34 Ke moka a re go bona: “Ke nyamile kudu,+ ebile ke kwa okare nka hwa. Lena dulang mo le se ke la robala gomme le dule le phafogile.”+ 35 Eitše ge a sepetše sebakanyana, a khunama a thoma go rapela gore ge e ba go kgonega a se ke a diragalelwa ke dilo tšeo di bego di le kgauswi le go mo diragalela. 36 Ke moka a re: “Aba,* Tate,+ dilo ka moka di a kgonega go wena. Tloša komiki* ye go nna. Eupša go direge seo wena o se nyakago e sego seo nna ke se nyakago.”+ 37 Ge a boa o ile a ba hwetša ba robetše, ke moka a re go Petro: “Simone, o robetše? Na ga se wa ba le maatla a go dula o phafogile ka iri e tee feela?+ 38 Dulang le phafogile gomme le dule le rapela, e le gore le se wele molekong.+ Moya o mafolofolo eupša mmele ga o na maatla.”+ 39 A tloga gape a ya go rapela, a bolela dilo tšeo a bego a di boletše mathomong.+ 40 A boa gape a ba hwetša ba robetše, ka gobane mahlo a bona a be a imelwa ke boroko, bjale ba se tsebe gore ba mo arabe bjang. 41 O ile a boa gape la boraro a re go bona: “Ke ka baka la eng le robetše ebile le ikhuditše ka nako e bohlokwa go swana le ye! Go lekane! Nako e fihlile!+ Bonang! Nako ya gore Morwa wa motho a neelwe diatleng tša badiradibe e batametše. 42 Tsogang, a re sepeleng. Bonang! Moeki wa ka o batametše.”+

43 Ka yona nako yeo, ge a sa dutše a bolela go ile gwa tšwelela Judase, e lego yo mongwe wa baapostola ba 12. O be a na le lešaba leo le bego le swere disabola le melamo, leo le bego le romilwe ke baperisita ba bagolo, ditsebi tša molao le banna ba bagolo.+ 44 Bjale Judase yo a bego a tlo mo rekiša o be a ba file leswao. O be a ba boditše gore: “Yo ke tlago go mo khisa, ke yena yo le mo nyakago. Le mo swareng, le sepele le yena le kgonthišetše gore ga a tšhabe.” 45 A tla thwii go Jesu a mmatamela a re: “Rabi!” Ke moka a mo khisa. 46 Ka gona ba mo swara ba sepela le yena. 47 Le ge go le bjalo, yo mongwe wa bao ba bego ba le moo o ile a ntšha sabola ya gagwe mokotleng wa yona gomme a kgaola tsebe ya mohlanka wa moperisita yo a phagamego ka yona.+ 48 Eupša ge Jesu a bona seo a re go bona: “Na ke lehodu moo le tlilego go nna ka melamo le disabola gore le tle le ntshware?+ 49 Ke be ke ehlwa ke dutše ka tempeleng letšatši le lengwe le le lengwe ke ruta,+ eupša ga se la ka la ntshwara. Le ge go le bjalo, dilo tše ka moka di diregile e le gore Mangwalo a phethagale.”+

50 Ke moka barutiwa ba gagwe ka moka ba mo tlogela ba tšhaba.+ 51 Eupša lesogana le lengwe leo le bego le apere seaparo seo se bego se dirilwe ka lešela la go tura la linene le ile la mo latela gomme ba leka go le swara, 52 eupša la tlogela seaparo seo la tšhaba le se la apara selo.*

53 Bjale ba iša Jesu go moperisita yo a phagamego+ gomme baperisita ba bagolo ka moka le banna ba bagolo le ditsebi tša molao ba kgobokana.+ 54 Eupša Petro a mo latela a le kgojana go ba go fihla lapeng la moperisita yo a phagamego. O ile a dula le batho bao ba hlankelago ntlong ya moperisita yoo a oretše mollo.+ 55 Bjale baperisita ba bagolo le batho ka moka ba Sanhedrine ba be ba nyaka batho bao ba ka tlago ba latofatša Jesu e le gore ba kgone go mmolaya, eupša ba be ba sa ba hwetše.+ 56  Batho ba bantši ba be ba nea bohlatse bja maaka ka yena,+ eupša bohlatse bja bona bo be bo sa dumelelane. 57 Le gona ba bangwe ba be ba ema, ba nea bohlatse bja maaka ka yena ba re: 58 “Re kwele a re: ‘Ke tla phušola tempele ye yeo e dirilwego ka diatla gomme ka aga e nngwe yeo e sa dirwago ka diatla ka matšatši a mararo.’”+ 59 Eupša le gona mo, bohlatse bja bona bo be bo sa dumelelane.

60 Ke moka moperisita yo a phagamego a ema gare ga bona a botšiša Jesu a re: “Ke ka baka la eng o sa arabe? Na o a kwa gore banna ba ba go latofatša ka eng?”+ 61 Eupša Jesu a se re selo.+ Moperisita yo a phagamego a mmotšiša gape a re: “Na ke wena Kriste Morwa wa Modimo yo Mokgethwa?” 62 Ke moka Jesu a re: “Ke nna yena, le tla bona Morwa wa motho+ a dutše ka letsogong le letona+ la Ramatlaohle a etla a le godimo ga maru a legodimo.”+ 63 Ge a realo moperisita yo a phagamego a gagola diaparo tša gagwe, a re: “Re sa nyakela eng dihlatse tše dingwe?+ 64 Le ikwetše gore motho yo o rogile Modimo. Le reng ka taba ye?” Ka moka ga bona ba re o swanetšwe ke go hwa.+ 65 Ke moka ba bangwe ba thoma go mo tshwela ka mare+ le go khupetša sefahlego sa gagwe gomme ba mmetha ka difeisi ba re: “Porofeta!” Ka morago ga gore bahlankedi ba kgoro ba mmethe ka dimpama, ba ile ba mo tšea.+

66 Bjale ge Petro a be a le tlase lapeng, yo mongwe wa banenyana bao ba bego ba hlankela moperisita yo a phagamego a tla.+ 67 Ge a bona Petro a oretše mollo, a mo tsepelela a re: “Le wena o be o na le Monatsaretha yo, yena Jesu yo.” 68 Eupša a latola a re: “Ga ke mo tsebe ebile ga ke kwešiše gore o bolela ka eng,” ke moka a tšwela ka ntle tsejaneng yeo e lebilego keiting. 69 Gona moo ngwanenyana yoo wa mohlanka ge a mmona a thoma gape a re go bao ba emego moo: “Yo ke yo mongwe wa bona.” 70 A gana gape. Ka morago ga nakwana, batho bao ba bego ba eme moo ba ile ba thoma go botša Petro ba re: “Ka nnete o yo mongwe wa bona, ebile ge e le gabotse o Mogalelia.” 71 Eupša a thoma go bolela a tiišitše gore ge e ba a sa bolele nnete a rogakwe, a re: “Motho yo yoo le bolelago ka yena ga ke mo tsebe!” 72 Ke moka mokoko wa napa wa lla la bobedi ka yona nako yeo.+ Ka gona Petro a gopola mantšu ao Jesu a bego a mmoditše ona a gore: “Pele mokoko o lla gabedi wena o tla ntatola gararo.”+ A kwa bohloko kudu gomme a thoma go lla.