Jeremia

52 Tsedekia+ o be a na le mengwaga e 21 ge a thoma go buša, gomme o bušitše Jerusalema mengwaga e 11. Leina la mmagwe e be e le Hamutala+ morwedi wa Jeremia yo a tšwago Libina. 2 O ile a tšwela pele a dira dilo tše mpe mahlong a Jehofa, a dira dilo ka moka go swana le kamoo Jehoyakima a dirilego ka gona.+ 3 Dilo ka moka tšeo di diregilego Jerusalema le Juda, di diregile ka gobane Jehofa a be a galefile moo a ilego a se sa amogela batho ba metseng yeo.+ Tsedekia yena o ile a hlanogela kgoši ya Babilona.+ 4 Ka ngwaga wa bosenyane wa ge Tsedekia a buša, letšatšing la lesome la kgwedi ya lesome, Kgoši Nebukadinetsara wa Babilona o ile a tla le mašole a gagwe ka moka go tlo hlasela Jerusalema. Ba ile ba e dikanetša ka ditente gomme ba aga leboto go e dikologa gore ba lwe le yona.+ 5 Ka gona ba ile ba hloma ditente go dikologa motse woo go fihla ngwageng wa bo-11 wa ge go buša Kgoši Tsedekia.

6 Ka letšatši la bosenyane la kgwedi ya bone,+ go ile gwa wa tlala e kgolo mo motseng, gomme batho ba mo nageng ba be ba se na dijo.+ 7 Mafelelong leboto la motse le ile la thubiwa, gomme mašole ka moka a tšhaba motseng bošego a tšwa ka tsela yeo e lego magareng ga maboto a mabedi yeo e lego kgauswi le serapa sa kgoši, mola Bakaladea ba be ba dikaneditše motse, gomme ba tšwela pele ba sepela ka tsela ya Araba.+ 8 Eupša mašole a Bakaladea a ile a rakediša Kgoši Tsedekia+ a mo swara leganateng la Jeriko, gomme mašole a gagwe ka moka a be a gašane gohle a mo tlogetše. 9 Ke moka mašole a Bakaladea a ile a swara kgoši yeo a e tliša go kgoši ya Babilona kua Ribila nageng ya Hamathi gore a e ahlole. 10 Kgoši ya Babilona e ile ya bolaya barwa ba Tsedekia pele ga mahlo a gagwe, ya ba ya bolaya le dintona ka moka tša Juda kua Ribila. 11 Ke moka kgoši ya Babilona ya foufatša Tsedekia+ gomme ya mo tlema ka diketane tša koporo ya mo iša Babilona, ke moka ya mo golega moo go fihlela letšatšing leo a hwilego ka lona.

12 Ka letšatši la lesome la kgwedi ya bohlano, ngwageng wa bo-19 wa ge go buša Kgoši Nebukadinetsara kgoši ya Babilona, Nebusaradani yo e bego e le molaodi wa baleti, yoo ebile e bego e le mohlanka wa kgoši ya Babilona, o ile a tla Jerusalema.+ 13 O ile a fiša ntlo ya Jehofa,+ ntlo ya kgoši le dintlo ka moka tša Jerusalema. Le gona o ile a fiša dintlo ka moka tše dikgolo. 14 Mašole ka moka a Bakaladea ao a bego a na le molaodi wa baleti a ile a phušola maboto ka moka ao a bego a agilwe go dikologa Jerusalema.+

15 Nebusaradani yo e bego e le molaodi wa baleti o ile a tšea ba bangwe ba batho ba maemo a tlase le batho ka moka bao ba bego ba šetše motseng a ba iša bothopša. O ile a tšea le batho ka moka bao ba bego ba tšhabetše go kgoši ya Babilona le bašomi ka moka bao ba nago le bokgoni.+ 16 Eupša Nebusaradani yo e lego molaodi wa baleti, o ile a tlogela ba bangwe ba batho bao ba diilago nageng gore ba leme mašemo a diterebe ebile ba šome ka go gapeletšwa.+

17 Bakaladea ba ile ba pšhatlaganya diphilara tša koporo+ tša ntlong ya Jehofa, dikarikana+ gotee le sebjana se segolo sa koporo seo se bitšwago Lewatle+ seo se bego se le ka ntlong ya Jehofa, gomme ba rwala koporo ya tšona ka moka ba e iša Babilona.+ 18 Ba tšea le ditšhitswana tša go olela molora, digarafo, dilo tša go tima mabone, dibjana,+ dikomiki+ gotee le dilo ka moka tša koporo tšeo di bego di dirišwa ka tempeleng. 19 Molaodi wa baleti a tšea dikotlelo,+ dibjana tša go swara magala, dibjana, ditšhitswana tša go olela molora, dihlomelamabone,+ dikomiki le dibjana tšeo di dirilwego ka gauta ya nnete le silifera ya nnete.+ 20 Go be go sa kgonege go kala boima bja koporo yeo e dirišitšwego go dira diphilara tše pedi, sebjana se segolo seo se bitšwago Lewatle, dipoo tše 12 tša koporo+ tšeo di bego di le ka tlase ga sebjana seo le dikarikana tšeo Kgoši Solomone a bego a di diretše ntlo ya Jehofa.

21 Philara e nngwe le e nngwe ya diphilara tšeo e be e le ya botelele bja dimithara tše seswai,* gomme e be e ka tatetšwa ka thapo ya go meta ya dimithara tše hlano.*+ Bokoto bja yona e be e le disenthimithara tše e ka bago tše šupago,* gomme mo gare e se na selo. 22 Hlogwana ya philara e be e dirilwe ka koporo. Botelele bja hlogwana e tee e be e le dimithara tše pedi.*+ Dilo tša go kgabiša le diswantšho tša digarenate tšeo di bego di le godimo ga yona go e dikologa, ka moka di be di dirilwe ka koporo. Philara ya bobedi e be e swana le ya pele, gomme le digarenate tšeo le tšona di be di swana. 23 Go be go na le digarenate tše 96 ka mahlakoreng, gomme digarenate ka moka tšeo di bego di dikologile mokgabišo woo e be e le tše 100.+

24 Le gona molaodi wa baleti a tšea Seraya+ moperisita yo mogolo le Tsefanya+ e lego moperisita yo a thušago moperisita yo mogolo, gotee le batho ba bararo ba go leta mojako.+ 25 Mo motseng o ile a tšea le mohlanka o tee wa ka mošate yo e bego e le molaodi wa mašole, a tšea le baeletši ba šupago ba kgoši bao ba bego ba le mo motseng gotee le mongwaledi wa molaodi wa mašole yo a bego a kgoboketša mašole ao a yago ntweng. O ile a tšea le banna ba 60 ba maemo a tlasana mo nageng bao ba bego ba sa le mo motseng. 26 Nebusaradani molaodi wa baleti a tšea batho bao a ba iša go kgoši ya Babilona kua Ribila. 27 Kgoši ya Babilona ya ba hlasela gomme ya ba bolaela kua Ribila+ nageng ya Hamathi. Ke moka Bajuda ba ile ba tšewa nageng ya bona ba išwa bothopša.+

28 Ba ke batho bao Nebukadinetsara a ba išitšego bothopša: Ka ngwaga wa bošupa, o išitše Bajuda ba 3 023.+

29 Ka ngwaga wa bo-18 wa ge Nebukadinetsara a buša,+ o ile a thopa batho ba 832 Jerusalema.

30 Ka ngwaga wa bo-23 wa ge Nebukadinetsara a buša, Nebusaradani molaodi wa baleti o ile a iša Bajuda ba 745 bothopša.+

Batho ka moka bao ba ilego ba išwa bothopša e be e le ba 4 600.

31 Ka di-25 tša kgwedi ya bo-12, ngwageng wa bo-37 Kgoši Jehoyakini+ wa Juda a le bothopša, e lego ngwageng woo Kgoši Efila-merodaka wa Babilona a bilego kgoši ka wona, o ile a lokolla Kgoši Jehoyakini wa Juda gomme a mo ntšha kgolegong.+ 32 O ile a mo swara gabotse gomme a mo nea maemo a phagamego go feta a dikgoši tše dingwe tšeo di bego di na le yena Babilona. 33 Ke moka Jehoyakini a apola diaparo tša gagwe tša ka kgolegong, gomme a dula a eja pele ga kgoši bophelo bja gagwe ka moka. 34 O be a dula a newa dijo tšeo di tšwago go kgoši ya Babilona letšatši le letšatši, bophelo bja gagwe ka moka go fihlela a hlokofala.