Bakorinthe ba Pele
4 Re nyaka gore batho ba re bone re le bahlanka bao ba šomelago Kriste bao ba filwego diphiri tše kgethwa tša Modimo.+ 2 Bahlanka ba Kriste ba swanetše go tshepega. 3 Bjale ke bona go se bohlokwa gore ke sekišwe ke lena goba gore ke sekišwe kgorong ya tsheko. Le nna ka noši ga ke itshekiše. 4 Ke a tseba gore ga ke na molato eupša ga se gore ke lokile. Jehofa* ke yena a ntlhahlobago.+ 5 Ka gona le se ke la ahlola+ selo go ba go fihla ka nako e swanetšego. Ge Morena a fihla, o tla utolla dilo tšeo di lego ka sephiring le dilo tšeo di lego ka dipelong tša batho.+ Ke moka Modimo o tla putsa yo mongwe le yo mongwe ka tsela yeo e mo swanetšego.
6 Banabešo, ke le botša dilo tše mabapi le nna le Apollo+ e le gore le holege. Re le beetše mohlala o mobotse e le gore le ithute molao wo o rego: “Le se ke la fetela ka kua ga dilo tšeo di ngwadilwego,” e le gore le se ke la ikgogomoša+ la ba la tšea ba bangwe ba le bohlokwa go feta ba bangwe. 7 Ke eng seo se dirago gore o ipone o le bohlokwa go feta ba bangwe? Na Modimo ga se yena a go filego dilo ka moka tšeo o nago le tšona?+ Bjale ge e ba Modimo e le yena a go filego tšona, goreng o ikgantšha bjalo ka ge eka ga se a go fa tšona?
8 Na le nagana gore le šetše le na le dilo ka moka tšeo le di hlokago? Na le nagana gore le šetše le humile? Na le nagana gore le šetše le thomile go buša bjalo ka dikgoši+ ntle le rena? Ke duma okare nkabe le šetše le thomile go buša e le gore le rena re buše le lena.+ 9 Ke bona eka Modimo o dirile gore rena baapostola re be ba mafelelo ba go ahlolelwa lehu+ pele ga batho ka moka. Ka gobane re fetogile batho bao ba bogelwago ke lefase+ le barongwa. 10 Re lebelelwa re le mašilo+ ka gobane re latela Kriste eupša lena le nagana gore le bohlale ka gobane le latela Kriste. Re bonagala re se na maatla eupša lena le bonagala le na le maatla. Lena le a hlomphiwa eupša rena re a nyatšega. 11 Go ba go fihla gona bjale re sa swerwe ke tlala,+ re nyorilwe,+ ga re na diaparo, re a bethwa+ ebile ga re na magae. 12 Re šoma ka thata ka diatla tša rena.+ Ge batho ba re roga, re ba araba gabotse.+ Ge ba re tlaiša re a kgotlelela.+ 13 Ge ba re senya maina, re bolela le bona gabotse.+ Go fihla gona bjale, batho ba re swara bjalo ka matlakala le ditšhila tša lefase le.
14 Ke le ngwalela dilo tše e le gore ke le lemoše bjalo ka bana ba ka bao ke ba ratago, e sego gore ke le hlabiše dihlong. 15 Le ge le na le barutiši ba 10 000 bao ba le rutago go latela Kriste, eupša ga le na botate ba bantši. Ka gona, ke fetogile tatago lena ka gobane ke le tlišeditše ditaba tše dibotse mabapi le Kriste Jesu.+ 16 Ka baka leo, ke kgopela gore le nkekiše.+ 17 Ke ka baka leo ke romelago Timotheo go lena. Ke morwa wa ka yo ke mo ratago ebile o botegela Morena. O tla le gopotša gore ke dira dilo bjang ge ke šomela Kriste Jesu,+ e lego dilo tšeo ke di rutago diphuthegong ka moka.
18 Ba bangwe ba ikgogomoša ka gobane ba nagana gore nka se tle go lena. 19 Ge e ba Jehofa a rata ke tlo tla go lena e se kgale. Ke tla bona ge e ba batho bao ba ikgogomošago ba tla kgona go emela dilo tšeo ba bego ba di bolela. 20 Dilo tšeo re di bolelago ga se tšona di lego bohlokwa. Dilo tše bohlokwa kudu ke tšeo re di dirago, ka gobane ke tšona di bontšhago gore re bušwa ke Mmušo wa Modimo le gore re na le maatla ao a tšwago go Modimo. 21 Bjale le kgethang? Na ke tle go lena ke swere thupa+ goba ke tle ke ikemišeditše go le bontšha gore ke a le rata?