Ebangedi ya Johane
17 Ge Jesu a boletše dilo tše o ile a lebelela legodimong ke moka a re: “Tate, nako e fihlile. Efa morwa wa gago maemo a phagamego, e le gore morwa wa gago a go tagafatše.+ 2 O mo file maatla a go laola batho ka moka.+ O dirile se e le gore a tle a dire gore batho ka moka bao o mo filego bona+ ba tle ba phele go ya go ile.+ 3 E le gore batho ba tle ba hwetše bophelo bjo bo sa felego,+ ba swanetše go tseba wena Modimo a nnoši wa nnete,+ ba tsebe le yo o mo romilego, e lego Jesu Kriste.+ 4 Ke go hlomphile lefaseng+ ka go dira mošomo wo o mphilego wona gore ke o dire.+ 5 Bjale Tate, mphe maemo a phagamego ao ke bego ke na le wona ge ke be ke na le wena pele lefase le eba gona.+
6 “Ke dirile gore batho bao o mphilego bona bao e bego e le karolo ya lefase ba tsebe leina la gago.+ E be e le ba gago, wa mpha bona gomme ba kwa lentšu la gago. 7 Bjale ba a tseba gore dilo ka moka tšeo o mphilego tšona di tšwa go wena 8 ka gobane ke ba boditše dilo tšeo o mpoditšego tšona+ gomme ba di amogetše, ba ba ba tseba gore ke tlile mo ke romilwe ke wena+ ebile ba dumela gore o nthomile.+ 9 Ke kgopelela bona, e sego lefase. Ke kgopelela bao o mphilego bona ka gobane ke ba gago. 10 Le gona dilo tša ka ka moka ke tša gago gomme dilo tša gago ke tša ka,+ ebile ke filwe maemo a phagamego gare ga bona.
11 “Nna ga ke sa le lefaseng eupša bona ba lefaseng,+ ebile ke tla go wena. Wena Tate yo Mokgethwa, hle ba šireletše+ ka baka la leina la gago leo ke ba utolletšego lona, e le gore e be batee go swana le ge nna le wena re le batee.+ 12 Ge ke be ke na le bona, ke be ke fela ke ba šireletša+ ka baka la leina la gago leo ke ba utolletšego lona. Ebile ke ba šireleditše. Ga go le o tee wa bona yo a fedišitšwego,+ eupša go fedišitšwe morwa wa tshenyego feela.+ Ke dirile se e le gore seo lengwalo le se boletšego se phethege.+ 13 Gona bjale ke tla go wena ebile ke bolela dilo tše ke sa le lefaseng, e le gore batho ba tle ba thabe kudu go swana le nna.+ 14 Ke ba boditše lentšu la gago, eupša lefase le ba hloile, ka gobane ga se karolo ya lefase+ go swana le ge nna ke se karolo ya lefase.
15 “Ga ke go kgopele gore o ba tloše lefaseng, eupša ke go kgopela gore o ba šireletše go Sathane.*+ 16 Bona ga se karolo ya lefase+ go swana le ge le nna ke se karolo ya lefase.+ 17 Ba dire gore e be ba bakgethwa o diriša nnete+ ya lentšu la gago, ka gobane lentšu la gago ke nnete.+ 18 Ke ba romile lefaseng go swana le ge le wena o nthomile lefaseng.+ 19 Ke dula ke le yo mokgethwa ka baka la bona, e le gore le bona nnete e ba thuše gore ba dule e le ba bakgethwa.
20 “Ga ke kgopelele ba feela, eupša ke kgopelela le bao ba dumelago go nna ka morago ga gore ba dumele seo ba ba ba rutago sona, 21 e le gore ka moka ga bona e be batee,+ go no swana le ge wena Tate o le boteeng le nna gomme le nna ke le boteeng le wena,+ gore le bona ba be boteeng le rena, e le gore lefase le dumele gore o nthomile. 22 Ke ba bontšhitše gore ke a ba hlompha bjale ka ge le wena o ntlhomphile, e le gore e be batee go swana le ge nna le wena re le batee.+ 23 Nna ke be boteeng le bona gomme le wena o be boteeng le nna, e le gore ba be boteeng ka mo go feletšego gore lefase le tsebe gore o nthomile le gore o ba rata ka tsela yeo o nthatago ka yona. 24 Tate, ke kgopela gore bao o mphilego bona le bona ba tle ba be moo ke tlago go ba gona+ e le gore ba tle ba bone maemo a phagamego ao o mphilego ona, ka gobane o nthatile pele lefase le ka ba gona.+ 25 Wena Tate yo a lokilego, ruri lefase ga le go tsebe,+ eupša nna ke a go tseba+ ebile ba o mphilego bona ba a tseba gore o nthomile. 26 Ke ba tsebišitše leina la gago ebile ke tla dira gore le tsebje,+ e le gore o ba rate ka tsela yeo o nthatago ka yona gomme nna ke be boteeng le bona.”+