Bagalatia

6 Banabešo, ge le bona motho a dira selo se sebe a sa lemoge, lena Bakriste bao ba swanelegago bao ba hlahlwago ke moya o mokgethwa, lekang go thuša motho yoo ka tsela e boleta.+ Eupša le lena le itlhokomele+ gore le se ke la lekega go dira selo se sebe.+ 2 Tšwelang pele le thušana ge le na le mathata*+ ka gobane ge le dira bjalo le tla be le ekwa molao wa Kriste.+ 3 Ge e ba motho a nagana gore o bohlokwa kudu go feta batho ba bangwe+ mola go se bjalo, gona o a iphora. 4 Eupša anke motho yo mongwe le yo mongwe a lebeledišiše dilo tšeo a kgonago go di dira,+ ka ge e le tšona di tlago go mo thabiša. A ka se thabišwe ke go ipapetša le batho ba bangwe.+ 5 Motho yo mongwe le yo mongwe o tla rwala morwalo wa gagwe.+

6 Le gona anke motho yo a rutago lentšu la Modimo le yo a rutwago, ba abelane dilo tše dibotse tšeo ba nago le tšona.+

7 Le se ke la iphora, ga go na motho yo a ka forago Modimo.* Motho yo mongwe le yo mongwe o tlo buna seo a se bjetšego.+ 8 Ge e ba motho a bjala nameng ka go dira dilo tše mpe tšeo a di kganyogago, o tlo hwa. Eupša ge motho a bjala moyeng ka go dumelela gore moya o mokgethwa o mo hlahle, o tlo phela go ya go ile.+ 9 A re se keng ra lapa go dira dilo tše dibotse, ka gobane re tlo buna ka nako e swanetšego ge e ba re sa lape.+ 10 Ka gona ge e ba re sa kgona, a re thušeng batho ka moka, kudukudu badumedigotee le rena.

11 Ke le ngwaletše lengwalo le ka seatla sa ka, ebile ke le ngwadile ka ditlhaka tše dikgolo.

12  Batho ka moka bao ba nyakago go kgahliša batho ba bangwe, ke bona ba le gapeletšago gore le bolle, ba dira bjalo ka gobane ga ba nyake go tlaišwa ka ge ba latela Kriste yo a hwetšego koteng ya tlhokofatšo.* 13 Le batho bao ba bolotšego ga ba kwe Molao wa Moshe,+ eupša ba nyaka gore lena le bolle e le gore ba tle ba ikgantšhe ka lena. 14 Ga ke nyake go ikgantšha eupša ke ikgantšha ka Morena wa rena Jesu Kriste+ yo a hwetšego koteng ya tlhokofatšo. Go ya ka nna, ke bona lefase le ahloletšwe lehu ka baka la gagwe, le lefase le bona nna ke ahloletšwe lehu ka baka la gagwe. 15 Ka gobane taba ya gore motho o bolotše goba ga se a bolla ga e bohlokwa,+ eupša sa bohlokwa kudu ke gore Modimo o dirile gore motho e be o moswa.+ 16 Eka batho bohle bao ba phelago ka go dumelelana le taba ye, e lego bona Isiraele ya Modimo, ba ka ba le khutšo ebile Modimo a ba gaugele.+

17 Go tloga gona bjale go ya pele, a go se be le motho yo a ntshwenyago, ka gobane mmele wa ka o na le mabadi ao a bontšhago gore ke morutiwa wa Jesu.+

18 Banabešo, eka Morena wa rena Jesu Kriste a ka le bontšha botho bjo bogolo ka baka la dika tše dibotse tšeo le nago le tšona. Amene.