Bagalatia
1 Nna Paulo, ga se ka kgethwa ke motho goba batho gore ke be moapostola eupša ke kgethilwe ke Jesu Kriste+ le Modimo Tate,+ yo a ilego a tsoša Jesu bahung. 2 Nna le banabešo ka moka bao ke nago le bona mo re a le dumediša. Ke ngwalela diphuthego ka moka tša Galatia ke re:
3 Eka Modimo Tatago rena le Morena wa rena Jesu Kriste, ba ka le bontšha botho bjo bogolo le go dira gore le be le khutšo. 4 Jesu Kriste o ile a neela ka bophelo bja gagwe gore re lebalelwe dibe,+ le gore a re phološe lefaseng le le lebe.+ O dirile bjalo ka gobane se ke seo Modimo Tatago rena a bego a se nyaka.+ 5 Ke rapela gore re tumiše Modimo go ya go ile. Amene.
6 Ke makatšwa ke gore le hlanogetše Modimo ka pela, gomme la amogela ditaba tše dingwe bjalo ka ge eka ke ditaba tše dibotse. Modimo yo le mo hlanogetšego o le kgethile a diriša botho bjo bogolo bja Kriste.+ 7 Ga se gore go na le ditaba tše dingwe tše dibotse, go no ba go na le batho bao ba nyakago go le timetša+ ka go fetoša ditaba tše dibotse ka Kriste. 8 Ge e ba motho le ge e le ofe, e ka ba rena goba morongwa yo a tšwago legodimong, a ka le botša ditaba tšeo di fapanego le ditaba tše dibotse tšeo re le boditšego tšona, gona motho yoo a ahlolwe. 9 Ke sa bušeletša seo ke se boletšego ke re: Motho yo mongwe le yo mongwe yo a le botšago ditaba tše di fapanego le ditaba tše dibotse tšeo le di amogetšego, a a ahlolwe.
10 Ga ke nyake go kgahliša batho, eupša ke nyaka go kgahliša Modimo. Ge nkabe ke kgahliša batho, ke be nka se kgone go ba mohlanka wa Kriste. 11 Banabešo, ke nyaka gore le tsebe gore ditaba tše dibotse tšeo ke le boditšego tšona ga di tšwe go batho.+ 12 Le nna ga se ka di botšwa ke batho ebile ga go na motho yo a nthutilego tšona, Jesu Kriste ke yena a nkutolletšego tšona.
13 Ka ge le šetše le tseba, ge ke be ke le bodumeding bja Bajuda+ ke be ke tlaiša phuthego ya Modimo kudu, ebile ke nyaka go e fediša.+ 14 Ke be ke tseba dilo tše dintši ka bodumedi bja Bajuda go feta dithaka tša ka tše dintši setšhabeng sa gešo. Le gona ke be ke fišegela go latela setšo sa borakgolokhukhu ba ka.+ 15 Eupša Modimo yo a ilego a dira gore ke belegwe le go mpontšha botho bja gagwe bjo bogolo,+ o ile a bona go swanetše gore 16 ke botše batho ba ditšhaba ditaba tše dibotse e le gore ba tsebe Morwa wa gagwe.+ Ga go na motho yo ke ilego ka ya go yena gore ke mo kgopele maele. 17 Le gona ga se ka ya Jerusalema go yo kgopela maele go bao ba bilego baapostola pele ga ka, eupša ke ile ka ya Arabia ke moka ka morago ka boela Damaseko.+
18 Ka morago ga mengwaga e meraro, ke ile ka ya Jerusalema+ go yo etela Kefase,*+ ka dula le yena matšatši a 15. 19 Eupša ga se ka kgona go bona baapostola ba bangwe, ke bone feela Jakobo+ moratho wa Morena. 20 Ke le kgonthišetša pele ga Modimo gore dilo tšeo ke le ngwaletšego tšona ke nnete.
21 Ge ke tloga moo ke ile ka ya Siria le Tsilitsia.+ 22 Eupša barutiwa ba Kriste diphuthegong tša Judea ba be ba sa ntsebe. 23 Ba be ba fela ba ekwa barutiwa ba bangwe ba Kriste ba re: “Motho yo a bego a re tlaiša,+ a nyaka le go fediša bodumedi bja rena, ga bjale o bolela ditaba tše dibotse.”+ 24 Ka gona ba ile ba thoma go tumiša Modimo ka baka la ka.