Baefeso

6 Bana, ekwang batswadi ba lena+ go ya ka mokgwa woo Modimo a nyakago le ba kwa ka gona ka gobane se se lokile. 2 Taelo ya pele yeo e rego, “Hlompha tatago le mmago,”+ e na le tshepišo yeo e rego: 3 “E le gore dilo di go sepelele gabotse le gore o phele nako e telele mo lefaseng.” 4 Lena botate, le se ke la kwatiša bana ba lena,*+ eupša tšwelang pele le ba godiša ka go ba laya+ le go ba tlwaetša ka tsela yeo Jehofa* a nyakago ka yona.+

5 Lena bao le šomago, ekwang bao le ba šomelago,+ le ba hlomphe le go ba kwa ka dipelo tša lena ka moka go swana le ge le ekwa Kriste. 6 Le se ke la dira seo ge feela le bonwa ke batho gore le ba kgahliše,+ eupša le ba kwe ka ge le le bahlanka ba Kriste bao ba dirago thato ya Modimo ka pelo ka moka.+ 7 Ba šomeleng ka pelo ka moka bjalo ka ge eka le šomela Jehofa+ e sego batho, 8 ka gobane le tseba gore Jehofa o tla šegofatša motho yo mongwe le yo mongwe yo a šomago ka thata,+ go sa šetšwe gore ke lekgoba goba ga se lona. 9 Le lena beng ba bona, dulang le ba swara ka yona tsela ye, le se ke la ba tšhošetša, ka gobane le a tseba gore Mong wa bona gotee le wa lena o magodimong+ gomme ga a kgetholle.

10  Sa mafelelo, eka Morena a ka le fa maatla+ ka gobane o na le maatla a magolo. 11 Aparang ditlhamo ka moka+ tše di tšwago go Modimo gore le kgone go lwantšha ditiro tša boradia tša Diabolo le tiile, 12 ka gobane ga re lwe+ le batho ba nama le madi, eupša re lwa le matemona+ ao a lego legodimong ao e lego babuši le balaodi ba lefase le la leswiswi. 13 Ka baka leo, aparang ditlhamo ka moka tše di tšwago go Modimo,+ gore le kgone go lwa le yo mobe ge a le hlasela letšatšing le lebe, ke moka ge le dirile dilo tše ka moka, le eme le tiile.

14 Ka baka leo, emang le tiile, le tlemile matheka a lena ka lepanta la therešo,+ le apere toko bjalo ka selo seo se šireletšago sefega,*+ 15 maotong a lena le rwele dieta* gore le itokišeletše go bolela ditaba tše dibotse tša khutšo.+ 16 Go oketša moo, le sware kotse e kgolo ya tumelo,+ yeo ka yona le tla timago mesebe ka moka e tukago ya Sathane.+ 17 Le gona, rwalang kefa ya phološo+ le sware sabola ya moya, e lego lentšu la Modimo.+ 18 Le tšwele pele le rapela Modimo le diriša mohuta o mongwe le o mongwe wa thapelo+ le topo ka go dumelelana le moya o mokgethwa.+ Dulang le phafogile ka mehla le rapelela* bakgethwa bohle, e le gore le kgone go dira dilo tšeo. 19 Le nna le nthapeleleng, gore ke kgone go bolela ka sebete sephiri sa Modimo se sekgethwa sa ditaba tše dibotse+ 20 tšeo Modimo a nthomilego gore ke di bolele,+ ke ka baka leo ke tlemilwego ka diketane. Le nthapelele gore ke bolele ditaba tše dibotse ka sebete ka tsela yeo ke swanetšego go di bolela ka yona.

21  Tigiko+ ngwanabo rena yo a rategago le yo a hlankelago Morena ka go tshepega, o tla le botša dilo ka moka tšeo ke di dirago le gore ke phetše bjang.+ 22 Ke mo romela go lena gore a le botše gore re phetše bjang, le gore a le kgothatše.

23 Ke rapela gore Modimo Tatago rena le Morena Jesu Kriste ba ka dira gore badumedigotee le rena ba be le khutšo, ba rate ba bangwe le go ba le tumelo. 24 Eka Modimo a ka bontšha batho ka moka bao ba tlogago ba rata Morena wa rena Jesu Kriste botho bja gagwe bjo bogolo.