Bakorinthe ba Pele
2 Ka gona banabešo, ge ke be ke etla go lena gore ke le botše sephiri se sekgethwa+ sa Modimo ga se ka diriša mantšu ao a tlago go le kgahla+ goba mantšu a ba bohlale. 2 Ke kgethile go le botša ka Jesu Kriste feela, le gore o ile a kokotelwa koteng.+ 3 Ge ke be ke etla go lena ke be ke se na maatla ebile ke boifa, ke thothomela kudu. 4 Ge ke be ke le ruta ga se ka diriša mantšu ao a tlago go le kgahla, eupša dilo tšeo ke bego ke le ruta tšona di be di bontšha gore moya wa Modimo o na le maatla.+ 5 Ke dirile se e le gore le dumele go maatla a Modimo go e na le go dumela go bohlale bja batho.
6 Re bolela mabapi le bohlale+ ge re le gare ga bao ba nago le tumelo e tiilego, eupša ga re bolele ka bohlale bja batho goba bja babuši ba lefase le bao ba tlago go fedišwa.+ 7 Re bolela ka bohlale bja Modimo bjo bo utilwego sephiring se sekgethwa,+ bjo Modimo a ilego a bo rulaganya e sa le pele gore a tle a re nee maemo a godimo. 8 Ga go na mmuši le ge e le ofe mo lefaseng yo a ilego a tseba ka bohlale bjo,+ ka gobane ge nkabe ba ile ba tseba ka bohlale bjo ba be ba ka se bolaye Morena Jesu. 9 Go etša ge mangwalo a re: “Dilo tšeo Modimo a di lokišeleditšego batho bao ba mo ratago, ga go na motho yo a ilego a di bona, go di kwa goba go di kwešiša.”+ 10 Eupša Modimo o re utolletše+ tšona a diriša moya o mokgethwa+ ka gobane moya woo o utolla dilo ka moka le dilo tšeo di tseneletšego tša Modimo.+
11 Ke mang yo a tsebago dilo tše motho yo mongwe a di naganago? Ga a gona ge e se motho yoo feela. Le dilo tšeo Modimo a di naganago ga go na motho yo a ka di tsebago ntle le ge e ba Modimo a diriša moya wa gagwe go mo thuša. 12 Ga re hlahlwe ke moya wa lefase, eupša re hlahlwa ke moya wo o tšwago go Modimo,+ e le gore re kwešiše dilo tšeo Modimo a re rutilego tšona. 13 Ga re bolele dilo tše ka mantšu ao a rutwago ke batho ba bohlale,+ eupša re bolela dilo tše ka mantšu ao a rutwago ke moya o mokgethwa+ go hlalosa nnete yeo e tšwago go Modimo.
14 Eupša motho yo a hlahlwago ke tsela yeo batho ba naganago ka yona,* ga a amogele dilo tšeo di utolotšwego ke moya wa Modimo ka gobane o nagana gore ke bošilo, ebile a ka se kgone go di kwešiša ka gobane gore motho a kgone go di kwešiša, o swanetše go thušwa ke moya o mokgethwa. 15 Motho yo a hlahlwago ke moya* o hlahloba dilo ka moka,+ eupša yena ga a hlahlobje ke motho. 16 “Ke mang yo a tsebago dilo tšeo Jehofa* a di naganago le yo a ka mo eletšago?”+ Ge e le rena re nagana go swana le Kriste.+