Tito
2 Eupša wena dula o bolela dilo tšeo di dumelelanago le thuto ya nnete.+ 2 Anke banna bao ba godilego ba be le mekgwa e mebotse, ba hlomphege, ba nagane gabotse, ba be le tumelo e tiilego, ba rate batho ebile ba be le kgotlelelo. 3 Le basadi bao ba godilego le bona ba be le mekgwa e mebotse, ba se ke ba senya batho maina, ba se ke ba laolwa ke beine ebile ba rute dilo tšeo di lokilego, 4 e le gore ba tle ba kgone go eletša* basadi ba baswa gore ba rate banna ba bona, ba rate bana ba bona, 5 ba nagane gabotse, ba itshware gabotse, ba hlokomele malapa* a bona, ba be le mekgwa e mebotse, ebile ba ikokobeletše banna ba bona,+ e le gore lentšu la Modimo le se ke la bolelwa gampe.
6 Le gona o dule o eletša banna ba baswa gore ba nagane gabotse.+ 7 O bee mohlala o mobotse dilong ka moka le medirong e mebotse. Ge o ruta batho nnete* o ba hlomphe,+ 8 o šomiše polelo yeo batho ba ka se e solego,+ e le gore bao ba re ganetšago ba hlabje ke dihlong ka ge ba tla be ba se na selo se sebe seo ba ka se bolelago ka rena.+ 9 Anke bahlanka ba ikokobeletše beng ba bona dilong ka moka,+ ba leke go ba kgahliša, ebile ba se ke ba ngangišana le bona, 10 ba se ke ba ba utswetša,+ eupša ba ba tshepagalele ka mo go feletšego, e le gore dilong ka moka ba dire gore thuto ya Modimo, yena Mophološi wa rena, e kgahliše.+
11 Ka gobane Modimo o bontšhitše botho bja gagwe bjo bogolo bjo bo dirago gore batho ba mehuta ka moka ba phološwe.+ 12 Botho bjoo bo re ruta gore re gane go dira dilo tšeo Modimo a sa di nyakego,+ le dilo tše mpe tšeo batho ba lefase le ba kganyogago go di dira. Le gona bo re ruta gore re phele ka tsela yeo e bontšhago gore re nagana gabotse, re dire dilo tšeo di lokilego, le go hlankela Modimo ka dipelo tša rena ka moka mo nakong ye,*+ 13 ge re dutše re letile gore dilo tšeo re di holofetšego le tšeo di kgahlišago di phethagale.+ Ebile re letile gore Modimo wa rena yo maatla, le Mophološi wa rena Jesu Kriste, ba bontšhe letago la bona. 14 Jesu yo ke yena a re hwetšego+ gore a re lokolle*+ gore re se sa dira selo le ge e le sefe se sebe, le gore a re hlwekiše gore re tle re be batho ba gagwe bao ba kgethegilego, bao ba dirago dilo tše dibotse ka dipelo ka moka.+
15 Dula o ruta dilo tše gomme o kgothatše, o be o kgaleme ka ge o na le maatla a go dira bjalo.+ O se ke wa dumelela motho a go nyatša.