Bakorinthe ba Bobedi
8 Banabešo, re nyaka go le botša ka botho bjo bogolo bja Modimo bjo a bo bontšhitšego diphuthego tša Matsedonia.+ 2 Batho ba diphuthegong tšeo, ba ile ba tlaišega kudu ge ba be ba lekwa. Go sa šetšwe gore ba be ba diila ba ile ba neela ka lethabo, se se ile sa bontšha gore ba be ba na le seatla se se bulegilego. 3 Ba neelane ka sohle seo ba ka se kgonago+ le go feta kamoo ba ka kgonago.+ Nka hlatsela seo. 4 Ba ile ba re kgopela gantši gore re ba dumelele gore ba neele le go dira modiro wa tlhakodišo bakeng sa bakgethwa.+ 5 Ba dirile mo gontši go feta kamoo re bego re naganne ka gona. Ba ile ba hlankela Morena ka dipelo tša bona ka moka le go re thuša go ya le kamoo Modimo a ratago. 6 Ka gona re ile ra kgothaletša Tito+ gore a phethe modiro wo a o thomilego, ka go kgoboketša mpho yeo le e ntšhitšego go tšwa pelong. 7 Dilo ka moka le di dira gabotse, le na le tumelo e tiilego, le na le bokgoni bja go bolela, tsebo ya lena e a oketšega, le šoma ka thata go dira selo se sengwe le se sengwe ebile le rata batho ba bangwe ka tsela yeo le rena re le ratago ka yona. Ka gona tšwelang pele le fana go tšwa pelong.+
8 Ga ke le beele molao, eupša ke nyaka gore le tsebe gore batho ba bangwe ba šoma ka thata ebile ke nyaka go bona ge e ba le tloga le rata ba bangwe. 9 Le tseba kamoo Morena wa rena Jesu Kriste a ilego a bontšha botho bjo bogolo, ka gobane le ge a be a na le dilo ka moka o ile a ba modiidi ka baka la lena,+ gore le kgone go ba le dilo ka moka ka baka la bodiidi bja gagwe.
10 Ka gona ke le eletša+ ka gore le tlo hwetša moputso ka go dira mošomo wo, ka gobane le thomile go o dira ngwageng o fetilego la ba la bontšha gore le thabela go o dira. 11 Bjale fetšang seo le bego le thomile go se dira, ke moka seo le tlago go se nea go ya le kamoo le ka kgonago ka gona, se tla bontšha gore le ikemišeditše go fa. 12 Modimo o amogela mpho yeo motho a e neago ka go rata, ka gobane o letetše gore motho a mo nee seo a nago le sona,+ e sego seo a se nago sona. 13 Ka gobane ga ke nyake go le thatafišetša maphelo mola maphelo a ba bangwe a le bonolo. 14 Ke nyaka gore le ba thuše ka dilo tše dintši tšeo le nago le tšona mo ba hlaelelwago gona, gore le bona ba le thuše ka dilo tše dintši tšeo ba nago le tšona mo le hlaelelwago gona, gore mafelelong go se be le yo a hlaelelwago ke selo. 15 Mangwalo a re: “Yo a nago le dilo tše dintši o be a sa fetiše tekanyo, yo a nago le dilo tše dinyenyane o be a sa hlaetše.”+
16 Re leboga Modimo ka gore o ile a dira gore Tito a tshwenyege ka lena go swana le ge le rena re tshwenyegile ka lena,+ 17 ka gobane o ile a dira dilo tšeo re bego re mo kgopetše gore a di dire, ebile o ile a ithaopela go tla go lena ka gobane o be a tloga a nyaka go le thuša. 18 O tlo felegetšwa ke ngwanabo rena yoo diphuthego ka moka di bolelago gabotse ka yena, ka baka la mošomo wo a o dirago wa go bolela ditaba tše dibotse. 19 Ebile diphuthego di be di mo kgethile gore a sepele le rena go iša meneelo yeo e kgobokeditšwego. Meneelo yeo e tlo dira gore Morena a tumišwe le go bontšha gore re ikemišeditše go thuša ba bangwe. 20 Ka gona ga re nyake gore motho le ge e le ofe a re bone molato ka baka la meneelo yeo le e ntšhitšego ka go rata gore e thuše ba bangwe.+ 21 Ka gobane re “tshepega dilong ka moka pele ga Jehofa* le batho.”+
22 Ebile re ba romela le ngwanabo rena yo a bontšhitšego gantši gore o a tshepega le gore o ikemišeditše go šoma ka thata dilong tše dintši. Gona bjale o nyaka go le thuša le go feta ka gobane o a le tshepa. 23 Ge e ba motho a ka le botšiša ka Tito, le mmotše gore Tito ke mogwera wa ka ebile re šoma mmogo gore re le thuše. Yo a le botšišago ka banababo rena ba, le mmotše gore ba romilwe ke diphuthego ebile ba dira gore Kriste a retwe. 24 Ba bontšheng gore le a ba rata,+ le bontšhe le diphuthego gore ke ka baka lang re ikgantšha ka lena.