Ekisodo

3 Moshe ya ba modiši wa diruiwa tša mogwe wa gagwe* Jethero,+ e lego moperisita wa Midiane. Ka letšatši le lengwe ge a be a iša diruiwa ka bodikela bja lešoka, o ile a feleletša a fihlile Thabeng ya Horebe,+ e lego thaba yeo Modimo wa nnete a bego a e kgethile. 2 Ke moka morongwa wa Jehofa a iponagatša go yena a le kgabong ya mollo gare ga mohlare wa meetlwa.+ Ge Moshe a dutše a lebeletše a bona mohlare woo o tuka mollo eupša o sa swe. 3 Bjale Moshe a re: “Se ke semaka! Goreng mohlare wo o tuka eupša o sa swe? E re ke batamele ke o bone.” 4 Ge Jehofa a bona gore Moshe o batametše mohlare woo gore a bone seo se diregago, o ile a mmitša a le gare ga mohlare woo a re: “Moshe! Moshe!” Yena a re: “Ke nna yo.” 5 Ke moka Modimo a re: “O se ke wa batamela mo kudu. Rola dieta* tša gago ka gobane o eme lefelong le lekgethwa.”

6 A tšwela pele a re: “Ke nna Modimo wa borakgolokhukhu ba gago,* Modimo wa Aborahama,+ Modimo wa Isaka+ le Modimo wa Jakobo.”+ Ke moka Moshe a uta sefahlego sa gagwe ka gobane o be a tšhaba go lebelela Modimo wa nnete. 7 Le gona Jehofa a re: “Ruri ke bone gore batho ba ka bao ba lego Egepeta ba a hlaka, ebile ke kwele sello sa bona sa ge ba llela thušo ka ge Baegepeta ba ba gapeletša go šoma mošomo o boima. Ke tseba gabotse bohloko bjo ba bo kwago.+ 8 Ke tla ya go ba hlakodiša go Baegepeta+ le go ba ntšha nageng yeo, ka ba iša nageng e botse le e kgolo yeo e elago maswi le todi ya dinose.+ E lego mo go dulago Bakanana, Bahethe, Baamore, Baperetse, Bahefe le Bajebusi.+ 9 Bjale tseba gore sello sa Baisiraele ke se kwele, ebile ke bone ka tsela yeo Baegepeta ba ba gatelelago ka yona.+ 10 Bjale etla ke go rome go Farao gomme o ntšhe setšhaba sa ka sa Baisiraele kua Egepeta.”+

11 Eupša Moshe a re go Modimo wa nnete: “Ke nna mang nka yago go Farao gomme ka ntšha Baisiraele Egepeta?” 12 Ke moka Modimo yena a re: “Ke tla ba le wena,+ gomme ke tla bontšha ka se gore ke nna ke go romilego: Ka morago ga ge o ntšhitše batho ba ka Egepeta, le tla hlankela nna Modimo wa nnete thabeng yona ye.”+

13 Eupša Moshe a re go Modimo wa nnete: “Bjale a re re ke fihla go Baisiraele gomme ke re go bona: ‘Modimo wa borakgolokhukhu ba lena o nthomile go lena,’ ke moka bona ba re go nna: ‘Leina la gagwe ke mang?’+ Ke tla reng go bona?” 14 Ka gona Modimo a re go Moshe: “Ke tla ba Seo ke Nyakago go ba Sona.”*+ A oketša ka gore: “Se ke seo o tlago go se botša Baisiraele. O tla re: ‘Yoo leina la gagwe le rago gore “Nna yo ke Tlago go ba Seo ke Nyakago go ba Sona,” o nthomile go lena.’”+ 15 Ke moka Modimo a bolela le Moshe gape a re:

“Se ke seo o tlago go se botša Baisiraele: ‘Jehofa Modimo wa borakgolokhukhu ba lena, e lego Modimo wa Aborahama,+ Modimo wa Isaka+ le Modimo wa Jakobo+ o nthomile go lena.’ Le ke lona leina la ka go ya go ile,+ ebile ke tla gopolwa ka lona melokong ka moka. 16 Bjale sepela o yo kgoboketša banna bao ba etelelago pele Baisiraele gomme o re go bona: ‘Jehofa Modimo wa borakgolokhukhu ba lena o iponagaditše go nna, yena Modimo wa Aborahama, Isaka le Jakobo, gomme a re: “Ke bone kamoo le hlakago ka gona,+ ebile ke bone le dilo tšeo Baegepeta ba le dirago tšona. 17 Ka gona ke le tshepiša gore ke tla le thuša ka ge Baegepeta ba le hlakiša+ gomme ka le ntšha moo ka le iša nageng ya Bakanana, Bahethe, Baamore,+ Baperetse, Bahefe le Bajebusi,+ e lego naga yeo e elago maswi le todi ya dinose.”’+

18 “Banna bao ba etelelago Baisiraele pele ba tla theetša seo o se bolelago,+ gomme o tla ya le bona go kgoši ya Egepeta ke moka la e botša la re: ‘Jehofa Modimo wa Baheberu+ o boletše le rena, ka gona re kgopela gore o re dumelele re tšee leeto la matšatši a mararo re ye lešokeng re yo direla Jehofa Modimo wa rena dihlabelo.’+ 19 Eupša ke tseba gabotse gore kgoši ya Egepeta e ka se le dumelele le sepela ntle le gore go be le selo seo se mo gapeletšago go le dumelela le sepela.+ 20 Ke tla diriša maatla a ka go otla Egepeta ka go dira dilo ka moka tše di makatšago nageng yeo. Ka morago ga moo e tla ba gona e le dumelelago le sepela.+ 21 Ke tla dira gore Baegepeta ba le bontšhe botho, gomme ge le tloga moo le ka se tloge le lekeleditše diatla.+ 22 Mosadi yo mongwe le yo mongwe a kgopele moagišane wa gagwe le mosadi wa Moegepeta yo a dulago ntlong ya gagwe dilo tša silifera le tša gauta le diaparo, gomme le di apešeng barwa ba lena le barwedi ba lena. Le gona le tšeeng le mahumo a Baegepeta.”+