Lengwalo la Jakobo
2 Banabešo, le ka se bolele gore le na le tumelo go Morena wa rena Jesu Kriste yo a nago le letago, mola le kgetholla batho ba bangwe.+ 2 Ge e ba mo le bokanego gona go ka tla batho ba babedi, yo mongwe a rwele dipalamonwana tša gauta ebile a tšhepile kudu, yo mongwe e le modiidi yo a aperego diaparo tša ditšhila, 3 na le tla bontšha gore le rata motho yo a tšhepilego kudu gomme la re go yena: “Wena dula mo lefelong le le lebotse,” ke moka la re go modiidi: “Wena e no ema,” goba la re: “Wena dula mo fase kgauswi le dinao tša ka”?+ 4 Ge e ba le dira bjalo, na le tla be le sa kgethollane,+ le gona na le tla be la sa bontšhe gore le ahlola batho gampe?+
5 Theetšang, lena banabešo bao ke ba ratago. Na Modimo ga se a kgetha batho bao go ya ka lefase le ba bonagalago ba diila gore ba be le tumelo e tiilego+ le gore e tle e be bajabohwa ba mmušo woo a o tshepišitšego batho bao ba mo ratago?+ 6 Eupša lena le nyaditše batho bao ba diilago. Na bahumi ga se bona ba le gatelelago+ le go le iša dikgorong tša tsheko? 7 Na bahumi ga se bona ba nyatšago leina leo le hlomphegago leo le bitšwago ka lona? 8 Mangwalo a re: “O rate moagišane wa gago ka mokgwa wo o ithatago ka wona.”+ Bjale ge e ba le ekwa molao wo o mogolo wa kgoši ya rena, gona le dira gabotse kudu. 9 Eupša ge e ba le tšwela pele le kgetholla batho ba bangwe,+ le dira sebe ebile le molao o bontšha gabotse gore le na le molato.+
10 Ge e ba motho a ekwa dilo ka moka tšeo di lego Molaong wa Moshe, eupša a sa kwe molao o tee, go no swana le ge a tshetše melao ka moka.+ 11 Yo a beilego molao wo o rego: “O se ke wa hlotlola,”*+ o beile le wo o rego: “O se ke wa bolaya.”+ Bjale ge o sa hlotlole eupša o bolaya, go no swana, o tshetše Molao. 12 Tšwelang pele le bolela ebile le itshwara go ya ka melao yeo batho bao ba lokologilego ba phelago ka yona, ka gobane Modimo o tla le ahlola go ya ka melao yeo.+ 13 Motho yo a sa gaugelego ba bangwe le yena a ka se gaugelwe ge a ahlolwa.+ Gobane go bontšha kgaugelo go na le maatla go feta go ahlola.
14 Banabešo, go holang ge e ba motho a bolela gore o na le tumelo, eupša dilo tšeo a di dirago di sa bontšhe gore o na le yona?+ Na tumelo yeo e ka mo phološa?+ 15 Ge e ba go na le banababo rena goba dikgaetšedi bao ba se nago diaparo* le bao ba se nago dijo tšeo di ba lekanego letšatšing leo, 16 ke moka yo mongwe wa lena a re go bona: “Sepelang gabotse, eka le ka hwetša dijo le diaparo,” gona mantšu ao ga a na mohola ge e ba le sa ba fe seo ba se hlokago.+ 17 Ka mo go swanago, tumelo le yona ge e sa bontšhwe ka mediro, go no swana le ge e hwile.+
18 Eupša motho yo mongwe a ka re: “Wena o na le tumelo, nna ke na le mediro. Bjale mpontšhe tumelo ya gago yeo e se nago mediro, le nna ke tla go bontšha tumelo ya ka yeo e nago le mediro.” 19 Na o a dumela gore go na le Modimo o tee? Ge e ba o dumela o dira gabotse. Matemona le ona a a dumela ebile a a thothomela.+ 20 Eupša wena motho yo a se nago tlhaologanyo, na ga o tsebe gore tumelo ga e hole ka selo ge e se na mediro? 21 Na Modimo ga se a bolela gore Aborahama tatago rena o lokile ka baka la mediro ya gagwe, ka morago ga gore a bee morwa wa gagwe Isaka aletareng gore a dire sehlabelo ka yena?+ 22 Le a bona gore o ile a bontšha tumelo ya gagwe ka mediro, le gore tumelo ya gagwe e be e sepedišana le mediro.+ 23 Ka gona go ile gwa phethagala lengwalo leo le rego: “Aborahama o ile a ba le tumelo go Jehofa,* gomme Modimo a mmona a lokile,”+ ke moka Jehofa a mmitša mogwera wa gagwe.+
24 Bjale le a bona gore motho o lebelelwa a lokile ge a bontšha mediro, e sego ge a no ba le tumelo feela. 25 Ka mo go swanago, Rahaba wa mogwebakammele, le yena Modimo o ile a bolela gore o lokile ka morago ga gore a bontšhe tumelo ka mediro, ka gore a amogele batho bao ba bego ba tlo hlola naga gomme a ba thuša gore ba tšhabe ba tšwe ka tsela e nngwe.+ 26 Ka nnete, go no swana le ge mmele wo o se nago moya o hwile,+ le tumelo yeo e se nago mediro e hwile.+