Ebangedi ya Mateo

20 “Mmušo wa magodimo o swana le mong wa ntlo yoo a ilego a tšwa e sa le mesong gore a yo hira bašomi bao ba ka šomago mašemong a gagwe a meterebe.+ 2 Ge a dumelelane le bašomi ba gagwe gore ba tlo gola tenariase* ka letšatši, o ile a ba romela mašemong a gagwe a meterebe. 3 Ge a etšwa gape mo e ka bago ka iri ya bosenyane mesong,* o ile a bona batho ba bangwe gape bao ba sa šomego ba eme mebarakeng, 4 ke moka a re go bona: ‘Le lena eyang mašemong a ka a meterebe, ke tla le fa seo se le swanetšego.’ 5 Ka gona ba ya. Ke moka a tšwa gape mo e ka bago ka iri ya bo-12 mosegare le mo e ka bago ka iri ya boraro thapama,* a hira bašomi ba bangwe gape. 6 Mafelelong, a tšwa mo e ka bago ka iri ya bohlano mantšiboa* a hwetša batho ba bangwe gape ba eme, a re go bona: ‘Ke ka baka la eng le eme mo letšatši ka moka le se na mošomo?’ 7 Ba re go yena: ‘Ke ka gobane ga go na yo a re hirilego.’ Yena a re go bona: ‘Le lena eyang mašemong a meterebe.’

8 “Ge e eba mantšiboa, mong wa mašemo o ile a bitša motho yo a bego a hlokometše bašomi a re go yena, ‘Bitša bašomi gore o tle o ba godiše,+ o thome ka bao ba hirilwego mafelelong gomme o feleletše ka bao ba hirilwego mathomong.’ 9 Ge batho bao ba hirilwego ka iri ya bohlano* ba fihla, yo mongwe le yo mongwe o ile a godišwa tenariase e tee. 10 Ka gona, ge bao ba hirilwego pele ba etla, ba ile ba ipotša gore ba tla godišwa ditenariase tše dintši, eupša le bona ba ile ba godišwa tenariase e tee. 11 Ge ba se na go amogela tenariase yeo, ba ile ba thoma go ngunanguna ka seo mong wa mašemo a se dirilego, 12 ba re go yena: ‘Banna ba bao ba hirilwego mafelelong ba šomile iri e tee feela, le ge go le bjalo o ba godišitše mogolo wa go lekana le wa rena bao re šomilego ga boima letšatši ka moka ebile re fišwa ke letšatši!’ 13 Eupša mong wa mašemo a botša yo mongwe wa banna bao ba bego ba ngunanguna a re: ‘Wešo, ga ke go fošetše. Nna le wena re dumelelane ka tenariase e tee, na ga go bjalo?+ 14 Tšea mogolo wa gago o sepele. Ke nyaka go godiša bašomi bao ba hirilwego mafelelong mogolo wa go lekana le wa gago. 15 Kgane ga ke na tshwanelo ya go dira seo ke se nyakago ka dilo tša ka? Goba na o na le mona* ka gobane ke ba diretše dilo tše dibotse?’*+ 16 Ka tsela ye, bao e lego ba mafelelo e tla ba ba mathomo gomme bao e lego ba mathomo ya ba ba mafelelo.”+

17 Ge Jesu le barutiwa ba gagwe ba 12 ba be ba eya Jerusalema, o ile a ba iša ka thoko gomme a re go bona:+ 18 “Gona bjale re ya Jerusalema, gomme Morwa wa motho o tla išwa go baperisita ba bagolo le barutiši ba molao. Ke moka bona ba tla phetha ka gore a bolawe,+ 19 gomme ba mo iša go batho ba ditšhaba tše dingwe gore ba mo kwere, ba mo otle ba be ba mo kokotele koteng+ gomme ka letšatši la boraro o tla tsošwa bahung.”+

20 Ke moka mmago barwa ba Tsebedeo+ a batamela Jesu a na le barwa ba gagwe, a mo khunamela gomme a mo kgopela se sengwe.+ 21 Jesu a re go mosadi yoo: “O nyaka eng?” Mosadi yoo a re: “Ke kgopela gore barwa ba ka ba babedi ba dule le wena Mmušong wa gago, yo mongwe ka letsogong la gago le letona, gomme yo mongwe ka go le letshadi.”+ 22 Ge Jesu a araba a re: “Ga le tsebe se le se kgopelago. Na le ka nwa seo ke lego kgauswi le go se nwa?”+ Ba re go yena: “Ee, re ka se nwa.” 23 Jesu a re go bona: “Ka nnete le tla nwa seo ke se nwago,+ eupša ga se nna ke dirago phetho ya gore ke mang a tlago go dula ka letsogong la ka le letona goba le letshadi, ka gobane Tate ke yena a kgethago gore ke bomang bao ba swanetšego go dula ka letsogong la ka le letona goba le letshadi.”+

24 Ge barutiwa ba bangwe ba lesome ba ekwa ka seo, ba ile ba galefela barwa bao ba Tsebedeo.+ 25 Eupša Jesu a bitša barutiwa ba bangwe gomme a re go bona: “Le a tseba gore babuši ba ditšhaba tše dingwe ba buša ditšhaba tšeo ka tsela yeo ba ratago ka yona, ebile bao ba nago le maatla a go laola ba diriša maatla a bona go laola batho ba bangwe.+ 26 Ga se gwa swanela go ba bjalo gare ga lena,+ eupša yo mongwe le yo mongwe yoo a nyakago go ba yo mogolo gare ga lena o swanetše go ba mohlanka wa lena,+ 27 gomme yo mongwe le yo mongwe yo a nyakago go ba wa pele gare ga lena e swanetše go ba mohlanka wa lena,+ 28 go no swana le ge Morwa wa motho a se a tlela go hlankelwa, eupša a tletše go hlankela+ le go nea bophelo bja gagwe e le topollo bakeng sa batho ba bantši.”+

29 Ge ba be ba etšwa Jeriko, lešaba le legolo le ile la mo latela. 30 Ge banna ba babedi ba difofu bao ba bego ba dutše ka thoko ga tsela, ba ekwa gore Jesu o a feta, ba ile ba goeletša ba re: “Morena, re šokele wena Morwa wa Dafida!”+ 31 Eupša lešaba la ba kgalemela gore ba homole. Le ge go le bjalo bona ba goeletša le go feta ba re: “Morena, re šokele wena Morwa wa Dafida!” 32 Ka gona, Jesu a ema a ba bitša a re: “Le nyaka gore ke le direle eng?” 33 Ba re go yena: “Morena, re kgopela o dire gore mahlo a rena a bone.” 34 Ka ge Jesu a be a ba kwela bohloko, o ile a kgwatha mahlo a bona,+ gomme gateetee ba bona ke moka ba mo latela.