Ebangedi ya Luka

12 Ka nako yeo, batho ba bantši kudu ba be ba kgobokane ebile ba gatana. Jesu o ile a thoma ka go bolela le barutiwa ba gagwe pele a re: “Le hlokomeleng komelo ya Bafarasei, e lego boikaketši.+ 2 Eupša ga go na selo seo se utilwego ka kelohloko seo se ka se utollwego, ebile ga go na sephiri seo se ka se kego sa tsebja.+ 3 Ka gona, dilo tšeo le di bolelago le le leswiswing di tla kwewa seetšeng ebile dilo tšeo le di bolelago ka lentšu la tlasana le le ka sephiring di tla bolelwa godimo ga dintlo. 4 Go oketša moo, ke re go lena bagwera ba ka,+ le se ke la boifa bao ba bolayago mmele gomme ka morago ba palelwa ke go le dira selo se sengwe gape.+ 5 Eupša ke tla le bontšha yoo le swanetšego go mmoifa. Le swanetše go boifa Modimo yo a ka kgonago go bolaya motho ke moka a mo lahlela Gehenna.*+ Ruri ke a le botša ke re, ‘boifang yena yoo.’+ 6 Na dithaga tše hlano ga di rekišwe ka ditšhelete tša tšhipi tše pedi tša theko e nyenyane?* Eupša ga go le e tee ya tšona yeo Modimo a e lebalago.*+ 7 Gaešita le meriri yeo e lego dihlogong tša lena, o a tseba gore ke e mekae.+ Le se ke la boifa, le tloga le le bohlokwa go feta dithaga tše dintši.+

8 “Bjale ke re go lena, motho yo mongwe le yo mongwe yo a ipolelago pele ga batho gore ke yena morutiwa wa ka,+ Morwa wa motho le yena o tla bolela ka yena pele ga barongwa ba Modimo gore ke morutiwa wa gagwe.+ 9 Eupša motho le ge e le ofe yo a rego ga a ntsebe pele ga batho, le nna ke tla re ga ke mo tsebe pele ga barongwa ba Modimo.+ 10 Motho yo mongwe le yo mongwe yo a rogakago Morwa wa motho o tla lebalelwa, eupša mang le mang yo a rogakago moya o mokgethwa, a ka se lebalelwe.+ 11 Ge ba le sekiša makgotleng a batho bohle,* pele ga bahlankedi ba mmušo le balaodi, le se ke la tshwenyega ka gore le tlo bolela bjang ge le itwela goba la reng,+ 12 ka gobane moya o mokgethwa o tla le hlahla gore le bolele seo le swanetšego go se bolela ka yona nako yeo.”+

13 Ke moka motho yo mongwe lešabeng a re go yena: “Morutiši, botša ngwanešo gore a nkarolele dilo tšeo tate a re tlogeletšego tšona.” 14 Jesu a re go yena: “Wena monna, ke mang yo a mpeilego gore ke be moahlodi goba motho wa go arolela batho dithoto?” 15 Ke moka a re go barutiwa ba gagwe: “Dulang le ntšhitše mahlo dinameng gomme le pheme mohuta o mongwe le o mongwe wa megabaru,+ ka gobane le ge motho a na le dilo tše dintši, dilo tšeo a nago le tšona di ka se mo fe bophelo.”+ 16 Ka morago ga moo a ba botša papišo a re: “Monna yo mongwe wa mohumi o ile a buna dilo tše dintši mašemong a gagwe. 17 Ka gona, a thoma go ipotšiša a re: ‘Ke swanetše go dira eng gona bjale ka gobane ga go na mo nka kgobokeletšago dilo tšeo ke di bunnego?’ 18 Ke moka a re: ‘Gona ke tla dira se:+ Ke tla phušola dintlo tšeo ke bolokelago dilo ka gare ga tšona ka aga tše dikgolo, gomme ka kgobokeletša mabele a ka ka moka kamoo gotee le dilo tša ka ka moka.’ 19 Ke moka a ipotša a re: ‘O na le dilo tše dintši tše dibotse tšeo o di bolokilego tšeo o tlago go di thabela mengwageng e mentši yeo e tlago. Ka gona iketle, o je, o nwe o be o ipshine.’” 20 Eupša Modimo a re go yena: ‘Wena motho wa go hloka kwešišo, bošegong bjo o tlo hwa.* Bjale dilo tšeo o di kgobokeditšego e tla ba tša mang?’+ 21 Go bjalo le ka motho yo a ikgobokeletšago dilo tše dintši tše bohlokwa eupša e le modiidi pele ga Modimo.”+

22 Ke moka a botša barutiwa ba gagwe a re: “Ke ka baka leo ke le botšago gore, tlogelang go tshwenyega ka gore le tla ja eng goba la tshwenyega ka gore le tla apara eng.+ 23 Ka gobane bophelo bo bohlokwa go feta dijo gomme mmele o bohlokwa go feta diaparo. 24 Naganang ka magokobu. Ga a bjale peu ebile ga a bune, ga a na dintlo tšeo a bolokelago dilo go tšona, eupša Modimo o a a fepa.+ Na lena ga le bohlokwa kudu go feta dinonyana?+ 25 Ke mang mo go lena a ka oketšago bophelo bja gagwe ganyenyane* ka baka la go tshwenyega? 26 Ge e ba le ka se kgone go dira bjalo, gona ke ka baka la eng le tshwenyega ka dilo tše dingwe?+ 27 Naganang kamoo matšoba ao a bitšwago dilili a golago ka gona, ga a šome ebile ga a roke,* eupša ke le botša gore gaešita le Kgoši Solomone le ge a be a apara gabotse kudu nakong ya ge a buša, ga se a ka a tšhepha go swana le le lengwe la ona.+ 28 Bjale ge e ba Modimo a botsefatša dimela tša naga ka mokgwa woo, tšeo di lego gona lehono gomme gosasa tša lahlelwa mollong, gona ga go pelaelo gore o tla kgonthišetša gore le hwetše diaparo lena ba tumelo e nyenyane! 29 Ka gona, tlogelang go tshwenyega ka gore le tla ja eng le gore le tla nwa eng, le be le tlogele go tshwenyega kudu.+ 30 Ka gobane dilo tše ka moka ke tšeo batho ba ditšhaba ba di tsomago ka mahlo a makhwibidu. Eupša Tatago lena o a tseba gore dilo tše le a di hloka.+ 31 Go e na le moo, tšwelang pele le tsoma Mmušo wa gagwe gomme dilo tše le tla di okeletšwa.+

32 “Lena mohlatswana,+ le se ke la tšhoga ka gobane Tatago lena o thabišwa ke go le fa Mmušo.+ 33 Rekišang dilo tša lena gomme le fe badiidi dimpho.*+ Dirang dikhwama tša go se senyege tša go swara tšhelete, tšeo di swantšhetšago mahumo ao le ikgobokeleditšego ona magodimong,+ ao a ka se tsogego a fedile. Ga go na motho yoo a ka a utswago ebile a ka se jewe ke mohlwa. 34 Ka gobane moo mahumo a lena a lego gona, ke moo dipelo tša lena le tšona di tlago go ba gona.

35 “Aparang mapanta*+ a lena gomme le dule le le komana madula a bapile ke moka le tšhume mabone a lena.+ 36 Le gona, le swane le banna bao ba letetšego mong wa bona a boa+ lenyalong,+ e le gore ge a fihla gomme a kokota, ba mmulele ka yona nako yeo. 37 Bahlanka bao ba tla thaba ge mong wa bona a ka re ge a fihla a hwetša ba phafogile! Ruri ke re go lena, mong wa bona o tla itokiša,* a ba dudiša tafoleng ke moka a batamela kgauswi le bona a ba hlankela. 38 Ge a ka tla e šetše e le kgauswi le go ba gare ga bošego,* le ge a ka tla ka morago ga bošegogare* gomme a ba hwetša ba le komana madula a bapile, ba tlo thaba! 39 Eupša se le swanetšego go se tseba se se, ge nkabe mong wa ntlo a be a tsebile gore lehodu le be le tlo tla nako mang, o be a ka se dumelele gore ntlo ya gagwe e thubje.+ 40 Le lena le dule le le komana madula a bapile ka gobane Morwa wa motho o tla ka nako yeo le sa naganego gore o tlo tla ka yona.”+

41 Ke moka Petro a re: “Morena, na papišo ye o e botša rena feela goba o e botša le ba bangwe ka moka?” 42 Morena a re: “Ge e le gabotse mohlanka yo a botegago,* yo a nago le temogo* ke mang? Mong wa gagwe o tla mo kgetha gore a hlokomele bahlanka ba gagwe ka moka gore a dule a ba fa dijo tšeo ba di hlokago ka nako yeo e swanetšego.+ 43 Mohlanka yoo o tla thaba, ge e ba ge mong wa gagwe a ka re a fihla a mo hwetša a dira bjalo! 44 Ke le botša nnete ke re: O tla mo kgetha gore a hlokomele dilo tša gagwe ka moka. 45 Eupša ge e ba mohlanka yoo a ka ipotša ka pelong ya gagwe a re: ‘Mong wa ka o diega go tla,’ gomme a thoma go betha bahlanka ba banna le ba basadi, a ja, a nwa a ba a tagwa,+ 46 mong wa mohlanka yoo o tla tla ka letšatši leo a sa mo letelago gore o tla tla ka lona le ka nako yeo a sa e tsebego, gomme o tla mo otla kudu, a mmea le batho bao ba sa botegego. 47 Ke moka mohlanka yoo a ilego a kwešiša seo mong wa gagwe a bego a mo kgopetše gore a se dire, eupša a se itokiše goba a se se dire, o tla bethwa ka dithupa tše dintši.+ 48 Le ge go le bjalo, yoo a sa kago a kwešiša eupša a dira dilo tšeo di dirago gore a swanelwe ke go bethwa, o tla bethwa ka dithupa tše sego kae. Motho yo mongwe le yo mongwe yo a bego a filwe dilo tše dintši, go tla nyakwa dilo tše dintši go yena, le gona motho yo a bego a kgethilwe gore a hlokomele dilo tše dintši, go tla nyakwa dilo tše dintši kudu go yena.+

49 “Ke tletše go gotša mollo lefaseng, ka gona ke eng se sengwe seo nka se dumago ge e ba o šetše o tuka? 50 Ke na le kolobetšo yeo ke swanetšego go kolobetšwa ka yona, ebile ke tla dula ke tshwenyega go fihlela e feta.+ 51 Na le nagana gore ke tletše go dira gore mo lefaseng go be le khutšo? Ruri ga go bjalo, ke tletše go dira gore batho ba arogane.+ 52 Go tloga gona bjale ka lapeng batho ba tlo arogana. Ge e ba go na le batho ba bahlano, ba bararo ba tla lwa le ba babedi gomme ba babedi ba lwa le ba bararo. 53 Tate o tla arogana le morwa wa gagwe gomme morwa a arogana le tatagwe. Mma o tla arogana le morwedi wa gagwe gomme morwedi a arogana le mmagwe. Mmatswale o tla arogana le ngwetši ya gagwe gomme ngwetši ya arogana le mmatswale wa yona.”+

54 Ke moka a botša mašaba a re: “Ge le bona leru le tšwelela ka bodikela, ka yona nako yeo le re: ‘Ledimo le etla,’ gomme ledimo leo la tla. 55 Ke moka ge le bona moya wa go tšwelela ka borwa o foka, le re: ‘Go tla fiša kudu,’ gomme gwa fiša ka nnete. 56 Lena baikaketši, le kgona go hlahloba dilo tšeo le di bonago di direga lefaseng le leratadimeng. Bjale ke ka baka la eng le sa kgone go lemoga dilo tšeo di diregago ka nako ye?+ 57 Ke ka baka la eng le sa kgone go bona gore ke selo sefe seo se lokilego seo le swanetšego go se dira? 58 Ka mohlala, ge o eya go mmuši le motho yo a go latofaditšego, leka ka thata go lokiša ditaba le yena ge le sa le tseleng ya go ya moo, e le gore a se ke a go iša go moahlodi gore a go ahlole, ke moka moahlodi a go iša go mohlokomedi wa kgolego gomme yena a go lahlela ka kgolegong.+ 59 Ruri ke re go wena, o ka se tšwe moo kgolegong go fihlela o patetše tšhelete ya gago ka moka.”*