Bakorinthe ba Bobedi
3 Na go sa nyakega gore re le hlalosetše gape gore ke rena bomang? Le gona na re hloka mangwalo a go re bolelela bjalo ka ge batho ba bangwe ba a hloka? Goba na go hlokega gore lena le re ngwalele mangwalo ao? 2 Lena le mangwalo a rena+ ao a ngwadilwego dipelong tša rena, ao batho ka moka ba a tsebago le go a bala. 3 Ka gobane le a bontšha gore le mangwalo a Kriste ao a ngwadilwego ke rena bahlanka ba Modimo.+ Ka dipelong tša lena le ngwadilwe ka moya wa Modimo yo a phelago,+ e sego ka enke godimo ga maswika.+
4 Re kgona go bolela dilo tše re kgodišegile pele ga Modimo ka baka la Kriste. 5 Re ka se bolele gore re kgona go dira mošomo wo ka borena, eupša ke Modimo a re thušago gore re o dire.+ 6 Modimo ke yena a re thušago go ba bahlanka ba kgwerano e mpsha+ e sego ba molao wo o ngwadilwego,+ ka gobane molao o dira gore motho a ahlolelwe lehu+ eupša moya wa Modimo o dira gore motho a phele.+
7 Molao wo o bego o dira gore motho a ahlolelwe lehu le wo o bego o ngwadilwe maswikeng+ o tlile ka letago le legolo leo le ilego la dira gore Baisiraele ba palelwe ke go lebelela sefahlego sa Moshe,+ ka baka la ge se be se phadima eupša letago leo le ile la fedišwa. 8 Bjale na dilo tšeo moya o mokgethwa+ o tlago go di dira di ka se dire gore go be le letago le legolo le go feta?+ 9 Ge e ba molao woo o bego o ahlola+ batho o be o na le letago,+ gona modiro wa go bolela gore batho ba lokile+ o tla ba le letago le legolo kudu. 10 Letago la molao ga se selo ge le bapišwa le letago la kgwerano e mpsha.+ 11 Ge e ba molao wo o ngwadilwego wo o bego o tlo fedišwa o tlile o na le letago,+ gona kgwerano e mpsha yeo e tlago go dula e le gona e tla ba le letago le legolo le go feta.+
12 Re bolela re lokologile ka ge re na le kholofelo,+ 13 le gona ga re dire seo Moshe a ilego a se dira ge a be a ikhupetša sefahlego ka lešela+ e le gore Baisiraele ba se ke ba bona letago la molao wo o bego o tlo fedišwa. 14 Ga ba kgone go kwešiša.+ Go fihla gona bjale go bjalo ka ge eka menagano ya bona e khupeditšwe ke lešela, ka gobane ga ba kgone go kwešiša kgwerano ya kgale,+ lešela leo le ka tlošwa feela ka thušo ya Kriste.+ 15 Ge e le gabotse, go fihla gona bjale dipelo tša bona di khupeditšwe ka lešela,+ ka baka leo ga ba kgone go kwešiša mangwalo a Moshe.+ 16 Eupša ge e ba motho a fetoša bophelo bja gagwe e le gore a hlankele Jehofa,* lešela leo le a tlošwa.+ 17 Jehofa ke Moya,+ le gona moo moya wa Jehofa o lego gona go na le tokologo.+ 18 Rena ka moka bao re tlošitšwego lešela difahlegong, re swana le diipone tšeo di bonagatšago letago la Jehofa. Re dirwa gore re swane le Modimo e le gore re bonagatše letago la gagwe kudu go swana le kamoo Jehofa yo e lego Moya+ a nyakago ka gona.