Timotheo wa Pele
6 Anke bahlanka bao ba rwelego joko ya bokgoba ba tšwele pele ba hlompha beng ba bona ka dipelo tša bona ka moka,+ e le gore batho ba se ke ba bolela gampe ka leina la Modimo le dithuto tša gagwe.+ 2 Le gona bahlanka bao beng ba bona e lego Bakriste ba se ke ba ba nyatša feela ka gobane beng ba bona e le Bakristegotee le bona. Eupša ba swanetše go ba šomela ka thata, ka gobane batho bao ba holegago ka baka la mošomo wa bona o mobotse ke Bakristegotee le bona ebile ba a ba rata.
Tšwela pele o ba ruta dilo tše le go ba kgothaletša go di dira. 3 Ge e ba motho le ge e le ofe a ruta dithuto tša maaka gomme dithuto tšeo a di rutago di sa dumelelane le dithuto tša nnete+ tšeo di tšwago go Morena wa rena Jesu Kriste goba di sa kgothaletše batho gore ba tshepagalele Modimo,+ 4 motho yo bjalo o ikgogomoša kudu ebile ga a kwešiše selo,+ o rata go phegišana le go ngangišana ka mantšu.+ Dilo tše bjalo di dira gore batho ba be le mona, ditshele, ba senye ba bangwe maina ebile ba se tshepe ba bangwe. 5 Le gona dilo tšeo di dira gore batho bao ba senyegilego menagano+ le bao ba se sa hlwago ba kwešiša nnete, ba dule ba ngangišana le ka dilo tša go se re selo. Ba nagana gore ge ba hlankela Modimo ba tla ikhweletša se sengwe.+ 6 Ka nnete, ge e ba motho a rata Modimo ka pelo ya gagwe ka moka ebile a kgotsofalela seo a nago le sona o tla hwetša ditšhegofatšo tše dintši.+ 7 Ka gobane ge re be re belegwa ga se ra tla le selo lefaseng, ebile ge re hlokofala re ka se tloge le selo.+ 8 Ka gona, ge re na le dijo le diaparo* a re kgotsofaleng.+
9 Eupša bao ba nyakago go huma ba wela molekong le molabeng,+ ebile ba ineela dikganyogong tše dintši tša go se re selo tšeo di dirago gore ba feleletše ba gobetše ebile ba hwile.+ 10 Ka gobane go rata tšhelete ke gona go bakago dilo ka moka tšeo di kwešago bohloko, le gona batho ba bantši ba tlogetše go tshepa Modimo ka baka la go rata tšhelete ebile ba ipaketše mathata a mantši.+
11 Wena mohlanka wa Modimo, tšhaba dilo tše. Eupša o leke ka thata go dira seo se lokilego, o hlankele Modimo ka pelo ka moka, o be le tumelo, lerato, kgotlelelo ebile o be boleta.+ 12 Elwa ntwa e botse ya go šireletša tumelo ya Bokriste. Dula o kakatletše bophelo bjo bo sa felego bjo Modimo a go kgethetšego gore o bo hwetše le bjoo o ilego wa bolela ka bjona gabotse pele ga batho ba bantši.
13 Ke go nea ditaelo pele ga Modimo yo a dulago a dira gore dilo di phele le pele ga Kriste Jesu yo a ilego a bolela gabotse ka Mmušo wa Modimo pele ga Pontio Pilato,+ 14 gore o latele ditaelo tše ka mo go feletšego le ka tsela yeo go ka se bego le motho yo a go swayago diphošo go fihlela Morena wa rena Jesu Kriste a bontšha maatla a gagwe.*+ 15 Ka nako yeo e beilwego, Morena yo yo Maatla le yo a thabilego o tla bonagatša maatla a gagwe. Ke Kgoši ya dikgoši le Morena wa marena.+ 16 Ke yena feela yo a ka se hwego,+ yo a dulago lefelong leo le nago le seetša seo se phadimago kudu+ leo go se nago motho yo a ka le batamelago.+ A a tumišwe ebile a be le maatla go ya go ile. Amene.
17 O botše bao ba humilego gona bjale* gore ba se ke ba ikgantšha le gore ba se ke ba tshepa mahumo ao a ka felago nako e nngwe le e nngwe,+ eupša ba tshepe Modimo yo a re neago dilo ka moka ka bontši. Dilo tšeo di a re thabiša.+ 18 Ba botše gore ba dire dilo tše dintši tše dibotse. Ba se ke ba timana eupša ba rate go fa.+ 19 Ge ba dira bjalo go tla ba bjalo ka ge eka ba kgoboketša mahumo ao a tšwago go Modimo. Se se ra gore ba tla itirela motheo o mobotse wa bokamoso+ e le gore ba dule ba kakatletše bophelo bja nnete.+
20 Wena Timotheo, o se ke wa lahla dilo tšeo Modimo a go filego tšona+ ebile o se ke wa theetša dilo tša go se re selo tšeo Modimo a sa di nyakego tšeo di tšwago go batho bao ba naganago gore bona ba a tseba, le ge dilo tšeo ba di bolelago di ganetšana le nnete.+ 21 Ka ge batho ba bangwe ba latela tšona dithuto tšeo, ba ile ba ba le makoko gomme ba lahla dithuto tša nnete.
Eka Modimo a ka le bontšha botho bjo bogolo.