Bakorinthe ba Pele

7 Bjale e re ke bolele ka dilo tšeo le ngwadilego ka tšona. Go kaone gore monna a se ke a robala le mosadi. 2 Eupša ka ge batho ba bantši ba itshwara gampe ka tša thobalano,* monna yo mongwe le yo mongwe a be le mosadi wa gagwe,+ le mosadi yo mongwe le yo mongwe a be le monna wa gagwe.+ 3 Monna o swanetše go kgotsofatša mosadi wa gagwe ka tša thobalano, le mosadi le yena a dire ka tsela e swanago go monna wa gagwe.+ 4 Mosadi ga a laole mmele wa gagwe, eupša ke monna wa gagwe yo a o laolago. Ka mo go swanago monna ga a laole mmele wa gagwe, eupša ke mosadi wa gagwe yo a o laolago. 5 Monna le mosadi ba se ke ba timana thobalano, ka ntle le ge e ba ba dumelelane ka gore ba ka se be le thobalano ka nako e itšego, e le gore ba iphe nako ya go rapela. Eupša ka morago ga moo ba swanetše go boela ba be le thobalano e le gore Sathane a se ke a ba leka, ba feleletša ba sa tshepagale ka gobane ba se na boitshwaro. 6 Ga ke le beele molao, eupša ke le botša dilo tše gore le tsebe seo le dumeletšwego go se dira. 7 Ke duma okare nkabe batho ka moka ba swana le nna. Eupša motho yo mongwe le yo mongwe o na le mpho ya gagwe+ yeo e tšwago go Modimo. Ke ka baka leo ba bangwe ba nyalago, gomme ba bangwe ba sa nyale.

8 Bjale ke botša batho bao ba sego ba nyala le bahlologadi gore go kaone gore ba se ke ba nyala, ba ekiše nna.+ 9 Eupša ge e ba ba sa kgone go itshwara gona a ba nyale, ka gobane go kaone go nyala go e na le go fišwa ke kganyogo ya thobalano.+

10 Ke fa batho bao ba nyetšego ditaelo tšeo di tšwago go Morena, gore mosadi a se ke a arogana le monna wa gagwe,+ 11 eupša ge e ba a ka arogana le monna wa gagwe, a dule a se a nyalwa goba a boelane le monna wa gagwe. Monna le yena a se ke a tlogela mosadi wa gagwe.+

12 Taelo yeo ke e botšago ba bangwe gona bjale ga e tšwe go Morena,+ eupša e tšwa go nna, ke re: Ge e ba ngwanabo rena a na le mosadi yo e sego Mokriste, gomme mosadi yoo a dumela go tšwela pele a dula le yena, a se ke a mo tlogela. 13 Le gona ge e ba mosadi a na le monna yo e sego Mokriste, gomme monna yoo a dumela go tšwela pele a dula le yena, a se ke a mo tlogela. 14 Modimo o lebelela lenyalo la monna yo e sego Mokriste e le le lekgethwa ka baka la mosadi wa gagwe yo e lego Mokriste. Le gona Modimo o lebelela lenyalo la mosadi yo e sego Mokriste e le le lekgethwa ka baka la monna wa gagwe yo e lego Mokriste. Go sego bjalo bana ba bona e be e ka se be ba bakgethwa, fela gona bjale ke ba bakgethwa. 15 Eupša ge e ba molekane yo e sego Mokriste a kgetha go sepela, mo tlogele a sepele. Ge e ba molekane yoo a sepela, ngwanabo rena goba kgaetšedi yo a nyalanego le yena, ga a gapeletšege go tšwela pele a dula le yena. Modimo o le file khutšo.+ 16 Wena mosadi, go tseba mang gore ge o ka tšwela pele o dula le monna wa gago o tla mo phološa?+ Goba wena monna, go tseba mang gore ge o ka tšwela pele o dula le mosadi wa gago o tla mo phološa?

17 Anke yo mongwe le yo mongwe a tšwele pele a phela go ya ka mpho yeo Jehofa* a mo filego yona le pele e e ba Mokriste.+ Taelo ye ke e fa diphuthego ka moka. 18 Na go na le motho yo e bilego Mokriste a bolotše?+ A a dule a le bjalo. Le gona, na go na le motho yo e bilego Mokriste a se a bolla? A a se ke a bolla.+ 19 Go bolla ga se selo, le go se bolle ga se selo.+ Selo se bohlokwa kudu ke go kwa ditaelo tša Modimo.+ 20 Yo mongwe le yo mongwe a a tšwele pele a le ka mokgwa wo a bego a le ka gona pele e e ba Mokriste.+ 21 Ge e ba o be o le lekgoba pele o e ba Mokriste, o se ke wa tshwenyega.+ Eupša ge o ka hwetša monyetla wa gore o lokologe, gona o diriše. 22 Yo e bego e le lekgoba pele a e ba Mokriste, o fetoga lekgoba leo le lokologilego la Morena,+ ebile motho yo mongwe le yo mongwe yo a bego a lokologile pele a e ba Mokriste, e ba lekgoba la Kriste. 23 Le rekilwe ka theko e kgolo,+ tlogelang go ba makgoba a batho. 24 Banabešo, motho yo mongwe le yo mongwe a dule a le ka mokgwa wo a bego a le ka wona le pele a e ba Mokriste.

25 Go bao ba sego ba nyala, ga ke na molao wo o tšwago go Morena, eupša le ka tshepa dilo tšeo ke le botšago tšona+ ka gobane Morena o nkgaugetše. 26 Ka baka la maemo a thata a gona bjale, ke nagana gore go kaone gore motho a dule a le ka mokgwa wo a lego ka wona. 27 Na o na le mosadi? O se ke wa mo tlogela.+ Ge e ba o se na mosadi, o se ke wa nyaka mosadi. 28 Le ge go le bjalo, ge o nyala o tla be o sa dire sebe. Ge e ba motho yo a sego a nyala a kgetha go nyala, o tla be a sa dire sebe. Eupša bao ba kgethago go nyala ba tlo ba le mathata.* Ke leka go le thuša gore le se ke la welwa ke mathata ao.

29 Banabešo, taba yeo ke nyakago go le botša yona še: Nako yeo e šetšego ke e nyenyane.+ Go tloga gona bjale go ya pele, bao ba nago le basadi ba phele bjalo ka ge eka ga ba nabo. 30 Bao ba llago ba swane le bao ba sa llego, bao ba thabilego ba swane le bao ba sego ba thaba, gomme bao ba rekago ba swane le bao ba se nago selo. 31 Bao ba dirišago dilo tša lefase ba swane le bao ba sa di dirišego ka mo go feletšego, ka gobane maemo a lefase le a a fetoga. 32 Ga ke nyake le tshwenyega. Monna yo a sa nyalago o tshwenyega feela ka go hlankela Morena, le gore a ka dira eng gore a mo thabiše. 33 Eupša monna yo a nyetšego o tshwenyega ka dilo tša lefase le,+ ka gobane o nyaka go thabiša mosadi wa gagwe, 34 o a šitišega. Ka mo go swanago, mosadi yo a sa nyalwago goba yo a sa kago a nyalwa, o tshwenyegile ka go hlankela Morena,+ e le gore e be yo mokgethwa monaganong le mmeleng. Eupša mosadi yo a nyetšwego o tshwenyegile ka dilo tša lefase le, o tshwenyegile ka gore a kgahliše monna wa gagwe. 35 Eupša ke le botša se e le gore le holege, e sego gore ke le thatafišetše bophelo. Ke nyaka gore le dire se se lokilego e le gore le tšwele pele le hlankela Morena go se na seo se le šitišago.

36 Ge e ba motho yo a sa nyalago a sa kgone go laola dikganyogo tša gagwe tša thobalano, ebile e se yo monyenyane kudu,* go kaone gore a nyale.+ O tla be a sa dire sebe. 37 Ge e ba motho a ikemišeditše, a sa bone bohlokwa bja gore a nyale, ebile a kgona go laola dikganyogo tša gagwe tša thobalano, gomme a phethile pelong ya gagwe gore a se ke a nyala, gona o tla holega.+ 38 Yo mongwe le yo mongwe yo a nyalago o dira gabotse, eupša yo a sa nyalego o tla holega kudu.+

39 Mosadi o swanetše go dula a nyalane le monna wa gagwe ge feela monna yoo a sa phela.+ Eupša ge monna wa gagwe a ka hlokofala, o lokologile go nyalwa ke monna yo mongwe le yo mongwe yo a mo ratago, ge feela e le Mokriste.*+ 40 Eupša nna ke re mosadi yoo o tlo thaba kudu ge a ka se nyalwe gape, ebile ke kgodišegile gore le nna ke na le moya wa Modimo.