Psalme

37 O se ke wa kwatišwa ke batho ba babe

Goba wa hufegela bao ba dirago dilo tše mpe.+

 2 Ba tlo omelela ka pela go swana le bjang,+

Gomme ba pona go swana le bjang bjo botala bjoo bo sa tšwago go mela.

 3 Tshepa Jehofa gomme o dire dilo tše dibotse.+

Dula lefaseng gomme o botege dilong ka moka.+

 4 Thabela go hlankela Jehofa,

Gomme yena o tla go fa tšeo pelo ya gago e di kganyogago.

 5 Dumelela Jehofa a go hlahla,+

Ithekge ka yena, gomme yena o tla go thuša.+

 6 O tla dira gore mediro ya gago ya go loka e phadime bjalo ka seetša sa mosegare,

Gomme dilo tša go loka tšeo o di dirago tša phadima bjalo ka letšatši la mosegare wa sekgalela.

 7 Ikhomolele pele ga Jehofa+

Gomme o mo letele ka go se fele pelo.

O se ke wa kwatišwa ke motho

Yo a atlegago ge a phetha maano a gagwe a mabe.+

 8 Lesa go kwata gomme o tlogele go galefa.+

O se tlale pelo gomme wa feleletša o dirile dilo tše mpe.

 9 Ka gobane batho ba babe ba tla fedišwa,+

Eupša bao ba tshepilego Jehofa e tla ba beng ba lefase.+

10 E se kgale batho ba babe ba tla be ba se gona,+

O tla lebelela moo ba bego ba dula gona,

Gomme ba tla be ba se gona.+

11 Eupša ba boleta e tla ba beng ba lefase,+

Gomme ba tla thaba kudu ka baka la khutšo yeo e sa lekanywego le selo.+

12 Motho yo mobe o logela moloki maanomabe,+

Ebile ge a mmona o a tenega.*

13 Eupša Jehofa yena o tla mo sega,

Ka gobane o a tseba gore letšatši la gore a fedišwe le tla tla.+

14 Batho ba babe ba ntšha disabola tša bona ebile ba nganga bora bja bona,

Gore ba bolaye motho yo a hlokago thušo le modiidi,

Gore ba bolaye bao ba dirago tše di lokilego.

15 Eupša sabola ya bona e tla hlaba dipelo tša bona,+

Gomme bora bja bona bja robja.

16 Dilo tše dinyenyane tšeo moloki a nago le tšona di kaone kudu

Go phala mahumo ao batho ba bantši ba babe ba nago le ona.+

17 Ba babe ba tla amogwa maatla a bona,

Eupša Jehofa o tla thekga baloki.

18 Jehofa o bona seo se diragalelago bao ba se nago molato,

Gomme bohwa bja bona bo tla dula bo le gona.+

19 Go ka se be le seo se ba hlabišago dihlong nakong ya masetlapelo,

Gomme nakong ya tlala ba tla ba le dijo tše dintši.

20 Eupša ba babe ba tlo fedišwa,+

Manaba a Jehofa a tla nyamelela bjalo ka mafulo a matala ao a ponago gabonolo.

Ebile a tla hwelela bjalo ka muši.

21 Yo mobe ge a adimile ga a buše,

Eupša moloki ga a timane ebile o rata go nea.+

22 Bao Modimo a ba šegofaditšego e tla ba beng ba lefase,

Eupša bao a ba rogakilego ba tla fedišwa.+

23 Ge Jehofa a kgahlwa ke tsela yeo motho a phelago ka yona+

O tla mo hlahla.*+

24 Le ge a ka wa a ka se we ka sefahlego,+

Ka gobane Jehofa o swere seatla sa gagwe gore a kgone go tsoga.+

25 Nkile ka ba lesogana, ebile gona bjale ke tšofetše,

Eupša ga sa nka ka bona Modimo a lahlile motho le ge e le ofe yo a lokilego,+

Goba ka bona bana ba moloki ba kgopela dijo.+

26 Moloki o dula a adima batho dilo ka go rata,+

Le gona Modimo o tla šegofatša bana ba gagwe.

27 Tlogela go dira dilo tše mpe o dire tše dibotse,+

Gomme o tla phela go ya go ile.

28 Jehofa o rata toka,

Ebile a ka se tlogele bao ba mmotegelago.+

O tla dula a ba šireletša,+

Eupša ditlogolo tša batho ba babe di tlo fedišwa.+

29 Baloki e tla ba beng ba lefase,+

Ba tla dula mo go lona go ya go ile.+

30 Dilo tšeo moloki a di bolelago di thuša ba bangwe gore ba be bohlale,

Ebile o bolela dilo tše di lokilego.+

31 Molao wa Modimo wa gagwe o ka pelong ya gagwe,+

Ebile o tla dula a o latela.+

32 Motho yo mobe o dula a laletše moloki

Gore a mmolaye.

33 Eupša Jehofa a ka se dumelele motho yo mobe gore a bolaye moloki,+

Goba a mmona molato ge a ahlolwa ke ba babe.+

34 Letela Jehofa ka go se fele pelo gomme o latele tsela ya gagwe,

Le gona o tla dira gore o swanelege go dula lefaseng.

35 Ke bone monna yo mobe le yo šoro

A atlega bjalo ka mohlare wo o bjetšwego mobung wo o nonnego.+

36 Eupša o ile a hlokofala ka pela gomme a se sa ba gona.+

Ke ile ka dula ke mo nyaka eupša ka se mo hwetše.+

37 Šetša motho yo a se nago molato,

Gomme o dule o lebeletše moloki,+

Ka gobane motho yoo o tla phela ka khutšo nakong e tlago.+

38 Eupša batho ka moka bao ba tshelago molao ba tla fedišwa.

Ba babe ba tlo fedišwa.+

39 Jehofa o phološa baloki,+

Ba tšhabela go yena ge ba nyamile.+

O tla ba lamolela go batho ba babe gomme a ba phološa,

Ka gobane ba tšhabetše go yena.+