Ditiro tša Baapostola

10 Bjale kua Kesarea go be go na le monna yo mongwe yo a bego a bitšwa Koronelio, yo e bego e le moetapele wa mašole a sehlopha seo se bitšwago Maitalia. 2 E be e le monna yo a rapelago Modimo, le gona yena le ba lapa la gagwe ka moka ba be ba hlompha Modimo kudu. O be a efa batho dimpho tše dintši ebile a dula a rapela Modimo. 3 Mo e ka bago ka iri ya boraro thapama,*+ o ile a bona morongwa wa Modimo a etla go yena ponong gomme a re: “Koronelio!” 4  Koronelio a mo lebelela a tšhogile gomme a re: “Ke theeditše Morena.” Morongwa a re go yena: “Modimo o kwele dithapelo tša gago ebile o bone dilo tše dibotse tšeo o di direlago badiidi.+ 5 Bjale roma batho gore ba ye Jopa ba yo bitša Simone yo a bitšwago Petro. 6 Monna yoo ke moeng ntlong ya Simone yo a šomago go šoga matlalo a diphoofolo, yoo ntlo ya gagwe e lego kgauswi le lewatle.” 7 Ge morongwa yo a bego a bolela le yena a se na go tloga, Koronelio o ile a bitša ba babedi ba bahlanka ba gagwe le lešole leo le bego le mo hlankela leo le bego le hlompha Modimo. 8 O ile a ba botša dilo ka moka tšeo di diragetšego, gomme a ba roma Jopa.

9 Letšatšing le le latelago ge ba dutše ba sepela gomme ba le kgauswi le go fihla motseng, Petro o ile a ya ka godimo ga ntlo mo e ka bago ka iri ya bo-12 mosegare* go yo rapela. 10  Petro o be a nyaka dijo ka gobane o be a swerwe ke tlala kudu. Ge ba sa dutše ba apea dijo, o ile a bona pono,+ 11 gomme o ile a bona legodimo le bulega ke moka go ile gwa theoga selo seo se swanago le lešela le legolo la linene se swerwe ka dikhona tša sona tše nne. 12 Ka gare ga sona go be go na le diphoofolo tša mehuta ka moka tša maoto a mane, digagabi le dinonyana. 13 Ke moka gwa kwagala lentšu la re go yena: “Petro, tsoga o hlabe o je!” 14 Eupša Petro a re: “Morena, nka se tsoge ke dirile selo sa mohuta woo, ka gobane ga sa nka ka ja selo le ge e le sefe seo se šilafetšego le se se sa hlwekago.”+ 15 Lentšu leo la bolela le yena la bobedi la re: “Tlogela go bolela gore dilo tšeo Modimo a di hlwekišitšego di šilafetše.” 16 Lentšu leo le ile la kwagala la boraro gomme selo seo Petro a se bonego se ile sa bušetšwa legodimong.

17 Bjale ge Petro a sa makaditšwe ke gore pono yeo a e bonego e ra goreng, o ile a bona banna ba bararo bao ba bego ba romilwe ke Koronelio ba eme keiting ba botšiša gore ntlo ya Simone e kae.+ 18 Ba ile ba goeletša mong wa ntlo gomme ba botšiša ge e ba Simone yo a bitšwago Petro a etetše moo. 19 Ge Petro a sa naganišiša ka pono yeo, moya o mokgethwa o ile wa re go yena:+ “Tseba gore banna ba bararo ba nyakana le wena. 20 Ka gona theogela lebatong la ka tlase o sepele le bona. O se ke wa belaela le ganyenyane ka gobane ke nna ke ba romilego.” 21 Ke moka Petro a theogela lebatong la ka tlase go banna bao, a re: “Ke nna motho yo le mo nyakago. Le ntshwaretše ditaba dife?” 22 Bona ba re: “Re romilwe ke moetapele wa mašole yo a bitšwago Koronelio,+ e lego monna wa go loka, yo a hlomphago Modimo le yo a bolelwago gabotse ke setšhaba ka moka sa Bajuda. Modimo o ile a roma morongwa wa gagwe gore a botše Koronelio gore a romele batho ba tle ba go bitše gore o tle ntlong ya gagwe gomme a tle a kwe ditaba tšeo o tlago go di bolela.” 23 Ka gona, o ile a re ba tsene gomme ya ba baeng ba gagwe.

Letšatšing le le latelago o ile a sepela le bona gomme barutiwa ba bangwe bao ba tšwago Jopa ba ile ba sepela le yena. 24 Letšatšing le le latelago leo, Petro o ile a fihla Kesarea. Ka ge Koronelio a be a ba emetše, o be a biditše metswalo ya gagwe le bagwera ba gagwe ba bagolo. 25 Ge Petro a tsena, Koronelio o ile a mo gahlanetša, a wela fase dinaong tša gagwe, a mo khunamela. 26 Eupša Petro a mo emiša, a re: “Ema, le nna ke fo ba motho.”+ 27 Ge ba dutše ba boledišana, Petro o ile a tsena le yena ka ntlong gomme ba hwetša go na le batho ba bantši ka moo. 28 A re go bona: “Le tseba gabotse gore molao ga o dumele gore Mojuda a dirišane le motho wa setšhaba se sengwe,+ goba gore a mmatamele. Eupša Modimo o mpontšhitše gore ke se ke ka bitša motho yo mongwe gore o šilafetše goba gore ga se a hlweka.+ 29 Ka gona ke ile ka tla, ka se gane ge o be o mpitša. Bjale ke kgopela o mpotše gore ke ka baka la eng o mpiditše.”

30 Ke moka Koronelio a re: “Ka yona iri ye matšatši a mane a fetilego, ke be ke rapela ka ntlong ya ka ka iri ya boraro thapama,* ka bona monna yo a bego a apere diaparo tša go phadima a eme pele ga ka 31 gomme a re: ‘Koronelio, Modimo o kwele thapelo ya gago ebile o bone dilo tše dibotse tšeo o di direlago badiidi. 32 Ka gona roma batho Jopa gore ba bitše Simone yo a bitšwago Petro. Monna yo ke moeng ntlong ya Simone yo a šomago go šoga matlalo a diphoofolo, yoo a dulago kgauswi le lewatle.’+ 33 Ka yona nako yeo ke ile ka roma batho gore ba go bitše, gomme o dirile gabotse wa tla. Bjale ka moka ga rena re kgobokane mo pele ga Modimo gore re tle re kwe dilo ka moka tšeo Jehofa* a go laetšego gore o di bolele.”

34 Ke moka Petro a re: “Bjale ke kwešiša gabotse gore Modimo ga a kgetholle motho,+ 35 eupša setšhabeng se sengwe le se sengwe o amogela motho yo a mo hlomphago le go dira dilo tše di lokilego.+ 36 O rometše molaetša go Baisiraele gore a ba botše ditaba tše dibotse tša mabapi le khutšo+ yeo Jesu Kriste a tlago go dira gore e be gona, e lego ditaba tša gore yena yo ke Morena wa batho ba bangwe ka moka.+ 37 Le a tseba gore ka morago ga gore Johane a bolele ka taba ya go kolobetšwa, taba yeo e ile ya phatlalala go tloga Galelia+ go fihla mafelong ka moka a Judea. 38 Taba yeo ke ya mabapi le Jesu yo a bego a etšwa Natsaretha. Modimo o ile a mo kgetha a diriša moya o mokgethwa,+ le gona a mo nea maatla gomme a tšama a dira dilo tše dibotse, a fodiša batho ka moka bao ba bego ba tlaišega ka ge ba be ba gateletšwe ke Diabolo.+ O ile a dira dilo tšeo ka moka ka gobane Modimo o be a na le yena.+ 39 Rena re dihlatse tša dilo ka moka tšeo a di dirilego nageng ya Bajuda le Jerusalema, eupša ba mmolaile ka go mo fega koteng. 40 Modimo o ile a mo tsoša bahung ka letšatši la boraro+ gomme a dira gore a iponagatše go batho, 41 eupša ga se a bonwa ke batho ka moka. O ile a bonwa ke rena dihlatse tšeo Modimo a ilego a di kgetha e sa le pele, e lego rena bao re ilego ra ja le yena le go nwa le yena ka morago ga gore a tsošwe bahung.+ 42 Le gona o ile a re laela gore re botše batho ebile re nee bohlatse bjo bo feletšego+ bja gore yo ke yena yoo Modimo a mo kgethilego gore a ahlole batho bao ba phelago le bao ba hwilego.+ 43 Baporofeta ka moka ba nea bohlatse+ bja gore motho yo mongwe le yo mongwe yo a dumelago go yena, Modimo o tla mo lebalela dibe ka leina la gagwe.”+

44 Ge Petro a sa bolela ka ditaba tše, batho ka moka bao ba kwago lentšu la Modimo ba ile ba hwetša moya o mokgethwa.+ 45 Barutiwa bao ba bego ba boloditšwe bao ba bego ba tlile le Petro ba ile ba makala, ka gobane batho ba ditšhaba le bona ba be ba hwetša mpho ya mahala ya moya o mokgethwa. 46 Ba ile ba ba kwa ba bolela ka maleme a ditšhaba tše dingwe ebile ba tumiša Modimo.+ Ke moka Petro a re: 47 “Na go na le motho le ge e le ofe yo a ka ganago ka meetse e le gore bona batho ba bao ba hweditšego moya o mokgethwa go swana le rena ba kolobetšwe?”+ 48 Ka gona o ile a ba laela gore ba kolobetšwe ka leina la Jesu Kriste.+ Ke moka ba mo kgopela gore a fetše nakonyana a dula le bona.