Bakorinthe ba Pele

11 Nkekišeng, go swana le ge le nna ke ekiša Kriste.+

2 Ke a le reta ka gobane le dula le nkgopola, ebile le diriša dilo tšeo ke le rutilego tšona. 3 Ke nyaka gore le tsebe gore hlogo ya monna yo mongwe le yo mongwe ke Kriste,+ hlogo ya mosadi ke monna+ gomme hlogo ya Kriste ke Modimo.+ 4 Ge monna a rapela goba a porofeta a rwele hlogong, o leša yo e lego hlogo ya gagwe dihlong. 5 Le gona ge mosadi a rapela goba a porofeta+ a se a rwala hlogong, o leša yo e lego hlogo ya gagwe dihlong, ka gobane go swana le ge eka o kotile letwadi. 6 Ge e ba mosadi a sa rwala hlogong, gona a a kote hlogo ya gagwe, eupša ge e ba go leša dihlong gore mosadi a kote moriri wa gagwe goba gore a kote letwadi, gona a a rwale hlogong.

7 Monna ga se a swanela go rwala hlogong, ka gobane Modimo o mmopile gore a swane le yena,+ ebile o kgona go bonagatša letago la gagwe. Eupša mosadi yena o dira gore monna a be le letago. 8 Ka gobane monna ga se a tšwa go mosadi, eupša mosadi ke yena a tšwilego go monna.+ 9 Le gona monna ga se a bopelwa mosadi, eupša ke mosadi a bopetšwego monna.+ 10 Ka baka la ge mosadi a bopetšwe monna le ka baka la barongwa,+ o swanetše go rwala hlogong go bontšha gore o ikokobeletša bohlogo.

11 Ka phuthegong, monna o hloka mosadi, le mosadi o hloka monna. 12 Go etša ge mosadi a bopilwe go tšwa go monna,+ monna le yena o belegwa ke mosadi, eupša dilo ka moka di tšwa go Modimo.+ 13 Na go swanetše gore mosadi a rapele a se a rwala hlogong? Itireleng phetho ka bolena. 14 Na ga le tsebe gore ka tlhago ge monna a na le moriri o motelele o a nyatšega? 15 Eupša ge e ba mosadi a na le moriri o motelele, o a kgahliša ka gobane o filwe moriri wa gagwe go e na le selo sa go rwala hlogong. 16 Le ge go le bjalo, ge e ba motho a nyaka go ganetša taba ye, le mmotše gore rena le diphuthego tša Modimo ga re na tsela e nngwe yeo re dirago dilo ka yona ka ntle le ye.

17 Ge ke le nea ditaelo tše ga ke le rete, ka gobane ge le bokana le kwešana bohloko go e na le go thušana. 18  Sa pele, ke kwa ba re ge le bokana go na le dikarogano gare ga lena, ebile ke dumela tše dingwe tša dilo tšeo ke di kwago. 19 Go tlo ba le dihlotswana gare ga lena,+ eupša se se tlo dira gore batho bao Modimo a ba amogelago ba bonagale.

20 Ge le kopana gotee gore le je Selalelo sa Morena,+ ga le dire seo ka tsela ya maleba. 21 Ka gobane ge le eja Selalelo sa Morena, ba bangwe ba thoma ka go ja dijo tša bona tša go lalela, ba bangwe ba tla ba swerwe ke tlala mola ba bangwe ba etla ba tagilwe. 22 Na ga le na dintlo moo le ka jelago gona le go nwela gona? Goba na le nyatša phuthego ya Modimo, gomme la dira gore bao ba se nago selo ba jewe ke dihlong? Ke le botše ke reng? Na ke le rete? Nka se le rete tabeng ye.

23 Ka gobane dilo ka moka tšeo ke le rutilego tšona, ke ithutile tšona go Morena. Bošegong bjoo+ a bego a tlo ekwa ka bjona, Morena Jesu o ile a tšea senkgwa, 24 ka morago ga go rapela o ile a se ngwathaganya a re: “Senkgwa se se swantšhetša mmele wa ka+ wo o tlago go dirwa sehlabelo ka baka la lena. Dulang le dira se go bontšha gore le a nkgopola.”+ 25 Ka morago ga gore ba je selalelo, o ile a dira se se swanago le ka beine,+ a re: “Beine ye e swantšhetša kgwerano e mpsha+ yeo e tlago go thoma ge madi a ka a tla be a tšhollwa.+ Dulang le dira se go bontšha gore le a nkgopola+ nako e nngwe le e nngwe ge le enwa beine ye.” 26 Nako e nngwe le e nngwe ge le tla be le eja senkgwa se le go nwa beine ye, le tla be le botša ba bangwe ka lehu la Morena go fihlela a etla.

27 Ka gona Mokriste yo mongwe le yo mongwe yo a jago senkgwa le go nwa beine ya Morena a se a swanela, o tla ba le molato ka ge a tla be a nyatša mmele wa Morena le madi a gagwe. 28 Pele motho a ka ja senkgwa le go nwa beine, o swanetše go itlhahloba go netefatša gore o a swanelega.+ 29 Mokriste yo mongwe le yo mongwe yo a jago le go nwa a sa kwešiše gabotse gore dilo tše di emela mmele wa Morena, o a ikahlola. 30 Ke ka baka leo ba bantši ba lena ba fokolago, ba lwalago le go hwa tumelong.+ 31 Eupša ge e ba re be re ka itlhahloba gabotse, re be re ka se ahlolwe. 32 Le ge go le bjalo, ge re ahlolwa, se se ra gore Jehofa*+ o a re laya e le gore re se ke ra ahlolwa ke lefase.+ 33 Ka baka leo banabešo, emelang gore batho ka moka ba fihle pele le eja Selalelo sa Morena. 34 Yo a swerwego ke tlala, a je gae, e le gore ge le tla be le bokane le se ke la ahlolwa.+ Ditaba tše dingwe tše di šetšego ke tla di lokiša ge ke fihla moo.