Ebangedi ya Luka

22 Bjale go be go šetše matšatši a sego kae+ gore go be le Monyanya wa Dinkgwa tše di sa Omelwago woo o bitšwago Paseka.+ 2 Le gona, baperisita ba bagolo le ditsebi tša molao ba be ba nyaka sebaka se sebotse sa gore ba bolaye Jesu,+ ka gobane ba be ba tšhaba batho.+ 3 Ke moka Sathane a hlohleletša Judase Isikariote, e lego yo mongwe wa baapostola ba 12,+ 4 gomme yena a ya a bolela le baperisita ba bagolo le balaodi ba tempele a ba botša gore a ka ba thuša go swara Jesu.+ 5 Seo se ile sa ba thabiša kudu gomme ba dumelelana ka gore ba tla mo fa tšhelete ya silifera.+ 6 Ka gona o ile a dumela, ke moka a thoma go nyakana le sebaka se sebotse sa go ba thuša gore ba mo sware. Eupša o be a sa nyake go dira seo pele ga batho.

7 Bjale letšatši la gore go ketekwe Monyanya wa Dinkgwa tše di sa Omelwago le ile la fihla, e lego letšatši leo sehlabelo sa Paseka se swanetšego go neelwa ka lona.+ 8 Ke moka Jesu a roma Petro le Johane a re: “Sepelang le yo re lokišeletša Paseka gore re tle re je.”+ 9 Ba re go yena: “O nyaka gore re e lokišeletše kae?” 10 A re go bona: “Ge le tsena motseng, monna yo a tlabego a rwele nkgo ya go rwala meetse yeo e dirilwego ka letsopa, o tla tla a gahlana le lena. Le mo latele ntlong yeo a yago go tsena go yona.+ 11 Ke moka le botšiše mong wa ntlo le re: ‘Morutiši o re: “E kae phapoši ya baeng yeo nka jelago Paseka le barutiwa ba ka go yona?”’ 12 Ka gona, monna yoo o tla le bontšha phapoši e kgolo ya ka godimo yeo e nago le dilo tšeo re di hlokago, gomme le lokišeletše Paseka moo.” 13 Ka gona ba tloga ba hwetša dilo di le ka mokgwa woo a bego a ba boditše ka gona, ke moka ba lokišeletša Paseka.

14 Ge nako e fihla, a dula tafoleng le baapostola ba gagwe.+ 15 Ke moka a re go bona: “Ke tloga ke kganyoga go ja Paseka ye le lena pele ke tlaišega, 16 ka gobane ke le botša gore: Nka se sa eja gape go fihlela ge morero wa yona o phethagaditšwe Mmušong wa Modimo.” 17 A amogela beine yeo a e filwego, a rapela ke moka a re: “Tšeang beine ye le nwe ka go šiedišana, 18 ka gobane ke le botša gore: Go tloga gona bjale nka se sa nwa beine ye go fihlela Mmušo wa Modimo o etla.”

19 Le gona a tšea senkgwa,+ a rapela, a se ngwathaganya a ba fa sona a re: “Senkgwa se se swantšhetša mmele wa ka+ woo o tlago go dirwa sehlabelo ka baka la lena.+ Dulang le dira se go bontšha gore le a nkgopola.”+ 20 Ka morago ga gore ba je selalelo, o ile a dira se se swanago le ka beine yeo e bego e le ka komiking, a re: “Beine ye e swantšhetša kgwerano e mpsha+ yeo e tlago go thoma ge madi a ka+ a tla be a tšhollwa ka baka la lena.+

21 “Eupša tsebang gore motho yo a tlago go nthekiša, o dutše le nna mo tafoleng.+ 22 Ke nnete gore Morwa wa motho o a tloga go ya ka seo se boletšwego e sa le pele,+ eupša yo madimabe ke motho yoo Morwa wa motho a tlago go swarwa ke manaba a gagwe ka baka la gagwe!”+ 23 Ke moka ba thoma go botšišana gore ge e le gabotse ke mang mo gare ga bona yoo a bego a le kgauswi le go dira seo.+

24 Mafelelong ba ile ba ngangišana kudu mabapi le taba ya gore ge e le gabotse ke mang yo bohlokwa kudu magareng ga bona.+ 25 Eupša Jesu a re go bona: “Dikgoši tša ditšhaba tše dingwe di buša ditšhaba tšeo ka tsela yeo di ratago ka yona, gomme bao ba nago le maatla a go buša ba bangwe ba fiwa maina ao a kgethegilego.*+ 26 Eupša lena ga se la swanela go swana le bona.+ Go e na le moo, anke yo mogolo gare ga lena e be yo monyenyane+ gomme yo a etelelago pele a be bjalo ka mohlanka. 27 Ge e le gabotse ke mang yo e lego yo mogolo? Na ke yo a dutšego tafoleng goba ke yo a mo hlankelago? Na ga se yo a dutšego tafoleng? Nna ke gare ga lena, le ge go le bjalo, ke bjalo ka motho yo a le hlankelago.+

28 “Eupša ke lena le ilego la dula le na le nna dilong ka moka+ tšeo ke ilego ka feta go tšona.+ 29 Ke dira kgwerano ya Mmušo le lena go etša ge Tate a dirile kgwerano le nna,+ 30 e le gore le tle le je le be le nwe tafoleng ya ka Mmušong wa ka,+ gomme le dule ditulong tša bogoši+ gore le ahlole meloko e 12 ya Isiraele.+

31 “Simone, Simone, bona! Sathane o nyaka go le fefera ka moka bjalo ka ge motho a fefera korong.+ 32 Eupša ke go kgopeletše go Modimo gore a go thuše gore tumelo ya gago e se ke ya fela.+ Bjale ge tumelo ya gago e boetše e tiile gape, o matlafatše tumelo ya banabeno.”+ 33 Ke moka yena a re go Jesu: “Morena, nna ke ikemišeditše go ya le wena kgolegong, gaešita le go hwa le wena.”+ 34 Eupša Jesu a re: “Wena Petro, ke go botša gore lehono mokoko o ka se lle go fihlela o ntatotše gararo gore ga o ntsebe.”+

35 A buša a re go bona: “Ge ke be ke le roma le se na sekhwama sa tšhelete le mokotlana wa dijo le dieta,*+ na go na le seo le ilego la se hloka?” Bona ba re: “Aowa!” 36 Ke moka a re go bona: “Bjale yo a nago le sekhwama sa tšhelete a se tšee le yo a nago le mokotlana wa dijo a o tšee, gomme yo a se nago sabola, a rekiše seaparo sa gagwe sa ka ntle a e reke. 37 Ka gobane ke le botša gore dilo tšeo di ngwadilwego ka Mangwalong ka nna tšeo di rego: ‘O ile a balwa gare ga batho ba go hloka molao,’+ di swanetše go ntiragalela. Seo se boletšwego ka nna se a phethagala.”+ 38 Ke moka ba re: “Morena, re swere disabola tše pedi.” A re go bona: “Di lekane.”

39 Ge a tloga, a ya Thabeng ya Mehlware ka ge a be a tlwaetše go dira bjalo, gomme barutiwa ba gagwe le bona ba mo latela.+ 40 Ge a fihla moo a re go bona: “Dulang le rapela gore le se wele molekong.”+ 41 Ke moka Jesu a tloga go bona, a ya moo leswika le ka fihlago gona ge le betšwa, a khunama gomme a thoma go rapela, 42 a re: “Tate, ge e ba o rata, tloša komiki* ye go nna. Le ge go le bjalo, anke go se direge thato ya ka eupša go direge thato ya gago.”+ 43 Ke moka morongwa yo a tšwago legodimong a iponagatša go yena gomme a mo matlafatša.+ 44 Eupša o ile a tšwela pele a rapela ka pelo ka moka a dutše a ekwa bohloko kudu+ gomme kudumela ya gagwe ya rotha go swana le madi a rothela fase. 45 Ka morago ga gore a rapele, o ile a emelela a ya go barutiwa ba gagwe gomme a hwetša ba robetše ebile ba lapile ka baka la ge ba be ba kwele bohloko kudu.+ 46 Ke moka a re go bona: “Ke ka baka la eng le robetše? Tsogang le tšwele pele ka go rapela gore le se wele molekong.”+

47 Ge a sa dutše a bolela, go ile gwa tšwelela batho ba bantši ba etilwe pele ke monna yo a bitšwago Judase, yoo e bego e le yo mongwe wa baapostola ba 12. O ile a batamela Jesu gore a mo khise.+ 48 Eupša Jesu a re go yena: “Judase, na o rekiša Morwa wa motho ka go mo khisa?” 49 Ge bao ba bego ba le kgauswi le yena ba bona seo se bego se tlo direga, ba re go yena: “Morena, na re lwe le bona ka disabola tša rena?” 50 Ke moka yo mongwe wa bona a ntšha sabola ya gagwe a kgaola tsebe ya lehlakoreng le letona ya mohlanka wa moperisita yo a phagamego.+ 51 Eupša Jesu a re: “Le se ke la dira bjalo.” Ke moka a kgwatha tsebe ya mohlanka yoo, gomme a mo fodiša. 52 Jesu a bolela le baperisita ba bagolo le balaodi ba tempele le banna ba bagolo bao ba bego ba tlile moo go yena a re: “Na ke lehodu moo le tlilego go nna ka disabola le melamo?+ 53 Ge ke be ke na le lena ka tempeleng letšatši le lengwe le le lengwe,+ ga se la ka la ntshwara.+ Eupša ye ke nako ya lena le ya bao ba bušago leswiswing.”+

54 Ke moka ba mo swara, ba sepela le yena+ gomme ba mo iša ntlong ya moperisita yo a phagamego. Ka nako yeo Petro o be a ba šetše morago eupša a le kgojana.+ 55  Batho ba bangwe ba be ba goditše mollo gare ga lapa ba o oretše gotee, gomme Petro a dutše le bona.+ 56 Eupša ge ngwanenyana yo mongwe wa mohlanka a bona Petro a oretše mollo, o ile a mo lebeledišiša gomme a re: “Monna yo le yena o be a sepela le Jesu.” 57 Eupša a latola a re: “Ga ke mo tsebe.” 58 Ka moragonyana, motho yo mongwe le yena o ile a mmona a re: “Le wena o yo mongwe wa bona.” Eupša Petro a re: “Mohlomphegi, ga se nna yo mongwe wa bona.”+ 59 Ka morago ga ge go fetile mo e ka bago iri, monna yo mongwe a thoma go bolela a tiišitše ka ganong a re: “Le ge ba re batho ba a swana, monna yo le yena o be a na le Jesu, ka gobane ke Mogalelia!” 60 Eupša Petro a re: “Mohlomphegi, ga ke tsebe gore o bolela ka eng.” Eitše ge a sa bolela, mokoko wa lla. 61 Ke moka Morena a retologa a lebelela Petro, gomme Petro a gopola seo Morena a bego a mmoditše sona ge a be a re: “Pele mokoko o lla lehono, o tla ntatola gararo.”+ 62 A tšwela ka ntle a lla gabohloko.

63 Bjale banna bao ba bego ba swere Jesu ba thoma go dira metlae ka yena,+ ba mmetha,+ 64 ke moka ba mo khupetša sefahlego, gomme ba dulela gore go yena: “Porofeta! Ke mang yo a go bethilego?” 65 Ke moka ba bolela dilo tše dintši tše mpe ka Jesu go bontšha gore ba roga Modimo.

66 Ge letšatši le hlaba, sehlopha sa banna ba bagolo ba setšhaba, e lego baperisita ba bagolo le ditsebi tša molao, se ile sa kgobokana+ gomme sa iša Jesu holong ya sona ya Sanhedrine, sa re: 67 “Re botše ge e ba o le Kriste.”+ Eupša yena a re: “Le ge nkabe ke le boditše gore ke yena le be le ka se tsoge le tshepile. 68 Le gona, ge nkabe ke botšišitše lena le be le ka se arabe. 69 Le ge go le bjalo, go tloga gona bjale Morwa wa motho+ o tla be a dutše ka letsogong le letona la Modimo yo maatla.”+ 70 Ge a realo, ka moka ga bona ba re: “Na o ra gore o Morwa wa Modimo?” Yena a re go bona: “Lena ka noši le re ke nna Morwa wa Modimo.” 71 Ba re: “Re sa nyakela eng dihlatse tše dingwe ka gobane rena ka noši re ikwetše ka ditsebe tša rena?”+