Ebangedi ya Mateo

6 “Hlokomelang gore le se ke la dira dilo tša go loka pele ga batho feela e le gore ba le bone.+ Ka gobane ge le ka dira bjalo, Tatago lena yo a lego magodimong a ka se le šegofatše. 2 Ka gona, ge o nea badiidi dimpho,* o se ke wa letša phalafala go etša ge baikaketši ba dira bjalo disinagogeng le diterateng, e le gore batho ba ba tumiše. Ka go dira bjalo, ruri ke le botša gore ba hwetša moputso wa bona wo o feletšego. 3 Eupša wena ge o nea badiidi dimpho, anke seatla sa gago sa le letshadi se se ke sa tseba seo se dirwago ke sa le letona, 4 e le gore go se ke gwa ba le motho yo a tsebago gore o file badiidi dimpho. Ke moka Tatago yo a bonago dilo tšeo di dirwago ka sephiring o tla go putsa.+

5 “Le gona, ge le rapela, le se ke la swana le baikaketši,+ ka gobane ba rata go rapela ba eme disinagogeng le dikhoneng tša diterata tše dikgolo e le gore ba bonwe ke batho.+ Ruri ke le botša gore ba hwetša moputso wa bona wo o feletšego. 6 Eupša wena ge o rapela, tsena ka phapošing ya gago o tswalele lebati gomme o rapele Tatago yo a lego ka sephiring.+ Ke moka Tatago yo a bonago dilo ka moka o tla go putsa. 7 Ge o rapela o se ke wa bušeletša mantšu ao a swanago gantšintši go etša ge batho ba ditšhaba ba dira bjalo, ka gobane ba nagana gore Modimo o tlo ba kwa ge ba mo rapela nako e telele. 8 Ka gona le se ke la swana le bona, ka gobane Tatago lena o tseba dilo tšeo le di hlokago+ le pele le ka mo kgopela tšona.

9 “Ka gona, le swanetše go rapela ka tsela ye:+

“‘Tatago rena wa magodimong, leina la gago+ a le kgethagatšwe.*+ 10 Mmušo wa gago+ a o tle. Thato ya gago+ a e direge mo lefaseng bjalo ka ge e direga legodimong.+ 11 Re nee dijo tšeo re di hlokago tša letšatši le,+ 12 o re lebalele diphošo tša rena, bjalo ka ge le rena re lebaletše bao ba re fošeditšego.+ 13 Re thuše gore re se ke ra wela sebeng,+ eupša o re phološe go Sathane.’*+

14 “Ka gobane ge e ba le lebalela batho bao ba le senyeditšego, Tatago lena wa legodimong le yena o tla le lebalela,+ 15 eupša ge le sa lebalele batho bao ba le senyeditšego, Tatago lena le yena a ka se le lebalele.+

16 “Ge le ikona dijo,+ le se ke la itira eka le nyamile la swana le baikaketši, ka gobane ba dira bjalo gore batho ba ba bone gore ba ikona dijo.+ Ruri ke re go lena: Ba hwetša moputso wa bona wo o feletšego. 17 Eupša wena ge o ikona dijo, o hlape sefahlego gomme o tlotše hlogo ya gago makhura, 18 e le gore batho ba se ke ba go bona gore o ikona dijo, eupša o bonwe ke Tatago yo a lego ka sephiring. Ke moka Tatago yo a bonago dilo ka moka o tla go putsa.

19 “Tlogelang go ipolokela mahumo lefaseng,+ moo mohlwa* le ruse di jago, le moo mahodu a thubago gomme a utswa. 20 Go e na le moo, ipolokeleng mahumo legodimong,+ moo mohlwa le ruse di sa jego,+ le moo mahodu a sa thubego a utswa. 21 Ka gobane moo mahumo a lena a lego gona, ke moo dipelo tša lena le tšona di tlago go ba gona.

22 “Leihlo le swana le lebone la mmele.+ Ge e ba leihlo la gago le bona gabotse,* gona mmele wa gago ka moka o tla phadima. 23 Eupša ge e ba leihlo la gago le na le mona,*+ mmele wa gago ka moka o tla swifala. Ge e ba leihlo leo le swanetšego go bonegela mmele le sa bone gabotse gomme le swifetše, gona mmele ka moka o ba leswiswing le legolo.

24 “Ga go na motho yo a ka hlankelago marena a mabedi, ka gobane o tla hloya yo mongwe gomme a rata yo mongwe,+ goba o tla hlompha* yo mongwe gomme a nyatša yo mongwe. Le ka se hlankele Modimo le Mahumo.+

25 “Ka lebaka le, ke re go lena: Tlogelang go tshwenyega+ ka maphelo a* lena gore le tla ja eng goba le tla nwa eng goba la tshwenyega ka gore le tla apara eng.+ Na bophelo ga bo bohlokwa go feta dijo, goba na mmele ga o bohlokwa go feta diaparo?+ 26 Lebeledišišang dinonyana.+ Ga di bjale peu goba go buna goba go kgobokeletša dijo lefelong leo di bewago go lona. Eupša Tatago lena wa legodimong o a di fepa. Na lena ga le bohlokwa go di feta? 27 Ke mang mo go lena a ka oketšago bophelo bja gagwe ganyenyane* ka baka la go tshwenyega?+ 28 Le gona, ke ka baka la eng le tshwenyega ka gore le tlo apara eng? Ithuteng kamoo matšoba ao a bitšwago dilili a golago ka gona nageng. Ga a šome ebile ga a roke.* 29 Eupša ke le botša gore gaešita le Kgoši Solomone+ le ge a be a apara gabotse kudu nakong ya ge a buša, ga se a ka a tšhepha go swana le le lengwe la ona. 30 Bjale ge e ba Modimo a botsefatša dimela tša naga ka mokgwa woo tšeo di lego gona lehono gomme gosasa tša lahlelwa mollong, gona na a ka se kgonthišetše gore le hwetša diaparo lena ba tumelo e nyenyane? 31 Bjale le se ke la tshwenyega+ ka gore: ‘Re tla ja eng’ goba, ‘re tla nwa eng’ goba ‘re tla apara eng?’+ 32 Ka gobane dilo tše ka moka ke tšeo batho ba ditšhaba ba di tsomago ka mahlo a makhwibidu. Tatago lena wa legodimong o a tseba gore dilo tše ka moka le a di hloka.

33 “Ka gona, tšwelang pele le tsoma Mmušo wa Modimo pele le dilo tšeo Modimo a di lebelelago di lokile gomme dilo tše tše dingwe ka moka le tla di okeletšwa.+ 34 Ka gona le se ke la tshwenyega ka letšatši le le latelago,+ ka gobane letšatši le le latelago le tla ba le matshwenyego a lona. Letšatši le lengwe le le lengwe le na le mathata a lona.