Baheberu

6 Ka ge gona bjale re šetše re ithutile dithuto tše bohlokwa ka Kriste, anke re tšweleng pele re gola.+ Re se ke ra no dulela go ithuta dilo ka moka tšeo re ithutilego tšona mathomong,+ e lego dithuto tša go swana le gore re swanetše go itsholela go dira dilo tšeo di se nago mohola, re be le tumelo go Modimo, 2 thuto ya gore re swanetše go kolobetšwa, ya gore go ra goreng go bea motho diatla,+ ya gore bahu ba tlo tsoga+ le ya mabapi le kahlolo ya Modimo ya go ya go ile. 3 Ka gona re tla tšwela pele re gola ka thušo ya Modimo.

4 Ba bangwe ba ganne dithuto tša nnete, ka gona ga go na motho yo a ka kgonago go ba thuša gore ba itshole.+ Bona ba ile ba hlabišetšwa seetša, ba fiwa mpho yeo e tšwago legodimong, ba fiwa le moya o mokgethwa, 5 ba fiwa lentšu la Modimo leo le kgahlišago ba ba ba fiwa le ditšhegofatšo tšeo di lego mabapi le lefase le leswa leo le tlago. 6 Eupša ba wele tumelong.+ Ga go sa kgonega go ba thuša gore ba itshole gape, ka gobane go no swana le ge eka ba kokotetše Morwa wa Modimo koteng gape gomme ba mo hlabiša dihlong pele ga batho.+ 7 Pula yeo e nago gantši ke tšhegofatšo yeo Modimo a e neago mobu. Ka gobane ge mobu o monya meetse a pula yeo, o tšweletša dimela tšeo di holago batho ba go lema. 8 Eupša ge e ba mobu o tšweletša meetlwa le dimela tše di hlabago, tšhemo yeo mobu woo o lego go yona ga e na mohola, ebile Modimo o kgauswi le go e rogaka gomme mafelelong e tla fišwa.

9 Eupša le ge re bolela ka mokgwa wo, re kgodišegile gore lena banababo rena bao ba rategago le kaone go feta batho bao ba se sa nago tumelo, ebile le dira dilo tšeo di tla dirago gore Modimo a le phološe. 10 Ka ge Modimo a lokile, a ka se lebale mošomo wa lena le kamoo le bontšhitšego gore le rata leina la gagwe+ ka go hlankela bakgethwa, ebile le gona bjale le tšwela pele le ba hlankela. 11 Re duma gore yo mongwe le yo mongwe wa lena a tšwele pele a šoma ka thata go swana le ka mokgwa wo a bego a dira mathomong, e le gore le dule le tshepa kholofelo+ yeo le nago le yona go fihla mafelelong.+ 12 Le se ke la tšwafa,+ eupša le ekiše bao ba ilego ba hwetša dilo tšeo Modimo a ba tshepišitšego tšona ka ge ba be ba na le tumelo ebile ba sa fele pelo.

13 Modimo o ile a ena ka leina la gagwe ge a be a tshepiša Aborahama gore o tla mo šegofatša, ka gobane go be go se na yo mongwe yo mogolo go mo feta yo a bego a ka ena ka leina la gagwe.+ 14 O ile a re: “Ke tla go šegofatša gomme ka dira gore bana ba gago e be ba bantši.”+ 15 Aborahama o ile a hwetša seo Modimo a bego a mo tshepišitše sona ka morago ga gore a lete ka go se fele pelo. 16 Ge motho a dira keno o ena ka leina la yo mongwe yo a mo fetago ka bogolo, gomme keno yeo e kgaola tshele ka gobane ke bohlatse bja gore seo a se bolelago ke nnete.+ 17 Ka mo go swanago, ge Modimo a be a kgetha go bontšha gabotse bajabohwa ba tshepišo+ ya gagwe gore morero wa gagwe o ka se fetoge, o ile a kgonthišetša seo ka go dira keno. 18 Dilo tše tše pedi* tšeo Modimo a di dirilego di ka se fetoge ebile Modimo a ka se tsoge a boletše maaka,+ dilo tše di kgothatša rena bao re tšhabetšego go Modimo gore a re šireletše le gore re kgone go dula re kakatletše kholofelo yeo a re tshepišago yona. 19 Go no swana le ge tshetledi e thuša sekepe gore se se ke sa šutha, le kholofelo+ ya rena e re thuša gore re eme re tiile ebile re se ke ra belaela selo. Kholofelo ye e re thuša gore re fetele ka kua ga gareteine yeo e aroganyago dikarolo tša tempele,+ 20 e lego moo Jesu a ilego a tsena pele ga rena,+ a re bulela tsela le go re lokišetša yona. Ke moperisita yo a phagamego go ya go ile go no swana le Melekitsedeke.+