Ditiro tša Baapostola

9  Saulo o be a tloga a ikemišeditše go tlaiša barutiwa ba Morena le go ba bolaya.+ Ka gona o ile a ya go moperisita yo a phagamego 2 gomme a mo kgopela mangwalo a go ya disinagogeng Damaseko e le gore a sware batho ka moka, banna gotee le basadi bao e lego ba Tsela ya Bokriste+ ke moka a ba tliše Jerusalema.

3 Ge a be a le tseleng a batamela Damaseko, kapelapela go ile gwa tšwelela seetša se se tšwago legodimong sa gadima go mo dikologa,+ 4 ke moka a wela fase, a kwa lentšu le re: “Saulo, Saulo, o ntlaišetšang?” 5  Saulo a re: “Mong wa ka, ke wena mang?” Ke moka lentšu leo la re: “Ke nna Jesu+ yo o mo tlaišago.+ 6 Eupša ema o ye motseng gomme go na le motho yo a tlago go go botša seo o swanetšego go se dira.” 7 Bjale banna bao ba bego ba sepela le Saulo ba ile ba makala, ba se kgone le go bolela, ba be ba no kwa modumo wa lentšu eupša ba sa bone gore go bolela mang.+ 8 Ke moka Saulo o ile a emelela, le ge mahlo a gagwe a be a bulegile o be a sa bone selo. Ka gona batho bao ba bego ba sepela le yena ba ile ba mo swara ka letsogo ba mo hlahla ba ya le yena Damaseko. 9 O tšere matšatši a mararo a sa bone selo,+ le gona o be a sa je ebile a sa nwe.

10 Damaseko go be go na le morutiwa yo mongwe yoo leina la gagwe e bego e le Ananiase.+ Morena o ile a bolela le yena ponong a re: “Ananiase!” Yena a re: “Ke nna yo Morena.” 11 Morena a re go yena: “Ema o ye seterateng seo se bitšwago Seterata sa Thwii, gomme o tsene ntlong ya Judase o nyake monna yo a bitšwago Saulo wa Tareso.+ Tseba gore monna yoo gona bjale o a rapela, 12 gomme o bone wena Ananiase ponong o mmea diatla gore a bone gape.”+ 13 Eupša Ananiase a fetola a re: “Morena, ke kwele batho ba bantši ba bolela ka monna yo ba re o ile a tlaiša barutiwa ba gago kudu kua Jerusalema. 14 Gona bjale baperisita ba bagolo ba mo file maatla a gore a sware batho ka moka bao ba dumelago leineng la gago.”*+ 15 Eupša Morena a re go yena: “Sepela, ka gobane monna yoo ke mo kgethile+ gore a botše ditšhaba,+ dikgoši+ le Baisiraele ka leina la ka. 16 Ke tla mmontšha dilo ka moka tše mpe tšeo di tlago go mo diragalela ka ge a botša batho ka leina la ka.”+

17 Ka gona Ananiase a sepela, a tsena ntlong yeo Saulo a bego a le go yona gomme a mmea diatla a re: “Saulo ngwanešo, Morena Jesu yo a iponagaditšego go wena tseleng yeo o tlilego ka yona, o nthomile go wena e le gore o bone gape o be o tlale moya o mokgethwa.”+ 18 Ka yona nako yeo mahlong a gagwe go ile gwa wa dilo tšeo di swanago le dikgapetla ke moka a boela a bona gape. Ka morago ga moo o ile a kolobetšwa, 19 le gona o ile a ja a ba le maatla.

O ile a fetša matšatšinyana a na le barutiwa ba bangwe Damaseko.+ 20 Ka yona nako yeo o ile a thoma go bolela ka Jesu disinagogeng gore ke Morwa wa Modimo. 21 Eupša batho ka moka bao ba bego ba mo theeditše ba ile ba tlabega kudu ba re: “Na yo ga se monna yo a ilego a hlasela bao ba bego ba bitša leina la Jesu kua Jerusalema?+ Le gona, na ga se a tla mo gore a ba sware a ba iše go baperisita ba bagolo?”+ 22  Saulo o ile a tšwela pele a eba le bokgoni bja go ruta. Bajuda bao ba bego ba dula Damaseko ba ile ba makala kudu ge ba be ba ekwa ka mokgwa wo a bego a hlalosa ka mo go kwagalago gore Jesu ke Kriste.+

23 Bjale ka morago ga matšatši a mantši, Bajuda ba ile ba loga leano la go mmolaya.+ 24 Eupša Saulo o ile a tseba ka maanomabe ao a bona. Bajuda bao ba be ba leta dikeiti bošego le mosegare ba emetše gore ba tle ba mmolaye. 25 Ka gona barutiwa ba gagwe ba ile ba mo tsenya ka mmanking, ba mo theošetša fase bošego ka lešoba leo le lego lebotong.+

26 Ge a fihla Jerusalema+ o ile a dira maiteko a go kopana le barutiwa, eupša ka moka ga bona ba be ba mo tšhaba ka gobane ba be ba sa tshepe gore ka nnete e be e le morutiwa wa Jesu. 27 Eupša Baranaba+ o ile a mo thuša, a mo iša go baapostola gomme a ba botša dilo ka moka tšeo di diragaletšego Saulo tseleng, gore o bone Morena+ ebile o boletše le yena, le gore kua Damaseko o ile a bolela ka leina la Jesu a sa tšhabe selo.+ 28 Ke moka Saulo o ile a tšwela pele a na le barutiwa bao, le gona o be a itshepelela a lokologile Jerusalema ebile a bolela ka leina la Morena a sa tšhabe selo. 29 O be a bolela le Bajuda bao ba bolelago Segerika ebile a ngangišana le bona, eupša bona ba ile ba leka go mmolaya.+ 30 Ge banababo rena ba bangwe ba ekwa ka taba yeo, ba ile ba theogela le yena Kesarea gomme ba mo romela Tareso.+

31 Ka gona diphuthego ka moka Judea, Galelia le Samaria+ di ile tša ba le khutšo ebile di ile tša tia. Le gona ge barutiwa ba be ba tšwela pele ba ekwa Jehofa* ebile ba matlafatšwa ke moya o mokgethwa,+ ba ile ba oketšega.

32 Bjale ge Petro a be a sepela tikologong yeo ka moka o ile a fihla le go barutiwa bao ba bego ba dula Lida.+ 33 Gona moo o ile a hwetša monna yo mongwe yo a bitšwago Aenease, monna yoo o be a na le mengwaga e seswai a robetše mpeteng ka gobane o be a golofetše. 34 Ka gona, Petro a re go yena: “Aenease, Jesu Kriste o a go fodiša.+ Tsoga o alole mpete wa gago.”+ Ke moka monna yoo a tsoga ka yona nako yeo. 35  Batho ka moka bao ba bego ba dula Lida le moeding wa Sharona ba ile ba mmona gomme ba thoma go dumela go Morena.

36 Bjale motseng wa Jopa go be go na le morutiwa yo mongwe yo a bego a bitšwa Thabitha. Leina leo ge le fetolelwa le bolela gore Dorokase.* O be a dira dilo tše dintši tše dibotse ebile a thuša badiidi. 37 Ge Petro a be a sa le Lida, Dorokase o ile a babja gomme a hlokofala. Ka gona, barutiwa ba ile ba hlapiša setopo sa gagwe ba se iša ka phapošing ya ka godimo. 38 Ka ge motse wa Lida o be o le kgauswi le wa Jopa, ge barutiwa ba ekwa gore Petro o motseng wa Lida ba ile ba roma banna ba babedi go yena gore ba mo kgopele ba re: “Re kgopela o tle go rena kapelapela.” 39 Ka gona Petro a emelela a sepela le bona. Ge a fihla ba ile ba mo iša phapošing ya ka godimo, ke moka bahlologadi ka moka ba ile ba tla go yena ba lla gomme ba mmontšha diaparo tše dintši tšeo Dorokase a bego a ba roketše tšona. 40  Petro o ile a re batho ka moka ba tšwele ka ntle,+ ke moka a khunama a rapela. Ge a se na go retologela go mohu, a re: “Thabitha tsoga!” Yena a bula mahlo gomme ge a bona Petro, a tsoga a dula.+ 41  Petro o ile a mo swara ka seatla, a mo emiša gomme a bitša barutiwa ba bangwe le bahlologadi gore ba tle ba bone gore o a phela.+ 42  Batho ba motseng wa Jopa ka moka ba ile ba tseba ka taba ye gomme ba bantši ba ile ba thoma go dumela go Morena.+ 43  Petro o ile a fetša matšatši a sego kae a dula Jopa le Simone yo a bego a šoma go šoga matlalo a diphoofolo.+