Bophelo le Bodiredi bja Jesu

Morutiwa yo a sa Kgodišego

A PONO e tšhošago gakaakang ge Jesu a fologa lebopong! Banna ba babedi ba šoro kudu ba tšwa mabitleng a kgaufsi gomme ba a mo kitimela. Ke bao ba nago le meoya e mebe. Ka ge o mongwe wa bona mo gongwe a le šoro kudu go feta o mongwe le gona a bile tlase ga taolo ya batemona ka nako e telele kudu, ruri o hlokomelwa kudu.

Monna yo yo a hlomolago pelo o phetše mabitleng ka nako e telele a se a apara. Ka mehla bošego le mosegare, o a goeletša gomme o ikgatla ka mafsika. Ke o šoro kudu mo e lego gore ga go motho yo a nago le sebete sa go feta tseleng yeo. Go dirilwe maiteko a go mo tlema, eupja a kgaola diketane le go robaganya ditshipi maotong a gagwe. Ga go motho yo a nago le matla a go mo fenya.

Ge monna yo a batamela Jesu gomme a wela fase maotong a gagwe, batemona bao ba mo laolago ba mo dira gore a goeletše ka gore: “Ke na le taba-mang le Wêna Jesu Morwa wa Modimo yo xodimo-dimo? Ke Xo phêxêlêla ka Modimo ke re O se kê wa ntlaiša.”

Jesu o tšwela pele a re: “Tšwa xo motho eo, wene môya wa dithšila.” Eupja bjale Jesu o a botšiša: “Leina la xaxo O mang?”

Karabo ke e rego: “Ké nna Madirá, xobane re ba bantši.” Batemona ba thabela go bona ditlaišego tša bao ba lego go bona, gomme ge e le gabotse ba thabela go ba hlasela ka moya o tšhošago wa sehlopha. Eupja ge ba lebeletšane le Jesu, ba kgopela gore ba se ke ba išwa sekoting. Re bona gape matla a magolo ao Jesu a bego a e-na le ona a go fenya le ka batemona ba šoro. Se le gona se utolla gore batemona ba lemoga gore go lahlelwa sekoting gotee le moetapele wa bona Sathane Diabolo, ke kahlolo ya Modimo ya mafelelo go bona.

Mohlape wa dikolobe tše ka bago 2 000 o fula kgaufsi le thaba. Ka gona batemona ba re: “Re romêlêdikolobeng tšeo, re y’o tsêna xo tšôna.” Go molaleng gore batemona ba hwetša lethabo le itšego leo e sego la tlhago, la go thabela bošoro ka go hlasela mebele ya dibopiwa tša nama. Ge Jesu a ba dumelela go tsena dikolobeng, dikolobe tše 2 000 ka moka di kitima ka lebelo di fologa legageng gomme tša nwelela lewatleng.

Badiši ba dikolobe ge ba bona se, ba kitima ba yo bega ditaba motseng le mašemong. Lebakeng lona leo, batho ba tla go bona seo se diregilego. Ge ba fihla, bona, go na le monna yo batemona ba tšwilego go yena, o apere gomme o na le tlhaloganyo, o dutše maotong a Jesu!

Dihlatse tšeo di bonego ka mahlo di begela batho kamoo monna yo a fodišitšwego ka gona. Ba ba bolela le ka lehu leo le makatšago la dikolobe. Ge ba e-kwa se, batho ba swarwa ke poifo e kgolo, gomme ba kgopela Jesu ka go hlonama gore a tloge nageng ya bona. Ka gona o a dumela gomme o tsena ka seketswaneng. Monna yo a bego a e-na le batemona o kgopela Jesu gore a mo dumelele go sepela le yena. Eupja Jesu o mmotša gore: “Boêla xaê xo ba xeno, O ba botše tše kxolo tše Morêna a Xo dirilexo tšôna, ka mo a Xo xauxetšexo.”

Ka mehla Jesu o laela bao a ba fodišago gore ba se ke ba botša motho lege e le mang, ka ge a sa nyake gore batho ba fihlelele diphetho motheong wa dipego tše huduago maikwelo. Eupja boemo bjo bjo bo fapanego ke bjo bo swanetšego ka gobane monna yo a bego a dirišwa ke batemona o tla nea bohlatse go batho bao bjale Jesu mo gongwe a ka se bego le sebaka sa go ba fihlelela. Le gona, go ba gona ga monna yo go tla nea bohlatse mabapi le matla a Jesu a go dira go loka, gomme gwa fenya pego lege e le efe e sa kgahlišego yeo mo gongwe e ka bago e phatlaladitšwe ka baka la go lahlegelwa ke dikolobe.

Ka go latela taelo ya Jesu, monna yo a bego a dirišwa ke batemona o a sepela. O thoma go bolela Dekapoli ka moka, dilo ka moka tšeo Jesu a mo diretšego tšona gomme batho ba tlabega e le ruri. Mateo 8:28-34; Mareka 5:1-20; Luka 8:26-39; Kutollo 20:1-3.

◆ Ke ka baka la’ng, mo gongwe tlhokomelo e lebišwa go monna o tee yo a nago le batemona mola e le ba babedi?

◆ Ke eng seo se bontšhago gore batemona ba tseba ka go lahlelwa sekoting ga nako e tlago?

◆ Ge e le gabotse, ke ka baka la’ng batemona ba rata go diriša batho le diphoofolo?

◆ Ke ka baka la’ng Jesu a dira ka mo go fapanego ka monna yo a bego a dirišwa ke batemona, a mo laela gore a yo botša ba bangwe ka seo A mo diretšego sona?