AIDS—‘Na ke Mathomo a Boitshwaro bjo Bofsa’?

KA MORAGO ga go bolela gore ngaka ya tša kalafo e be e ile ya bolela gore “go ba le tswalano le molekane o tee feela” ke tsela e nnoši ya go phema go fetelwa ke AIDS ka botona le botshadi, mongwadi wa dikuranta wa Canada o botšiša gore: “Na AIDS e boifšago e ka ba mathomo a boitshwaro bjo bo feletšego bjo bofsa lefaseng la rena?” Le gona mongwadi o botšišitše mabapi le ge e ba e le mo go sa “tlwaelegago” gore seo Beibele e se rutilego ka nywaga e mentši, e lego go ba le molekane o tee, “bjale e ka ba tsela ya go phologa ga batho.” A šupa gape go lefase la lehono la “dihlare-tagi, motšoko, dino tše di tagago e bile re sa lebale go laolwa ka kudu ke botona le botshadi,” mongwadi wa dikuranta o re: “Bjale re buna se re se bjetšego ka baka la boitshwaro bjo bo gobogilego, go ba le dikopano tša botona le botshadi le balekane ba bantši mo go šilafatšago lefase mo re go bakilego.”

Lege go lokile go holofela go kaonefala boitshwarong le go phologa, na ke feela go boifa lehu la ka pela goba go fela ga batho mo go tlago go tšweletša “boitshwaro bjo bo feletšego bjo bofsa”? Aowa, ka gobane go sa šetšwe ditemošo tšeo di tšwago go dingaka le banyakišiši, bakgogi le banwi ba bantši ba dino tše di tagago ba tšwela pele ka bošilo ba diriša bophelo bja bona bjo bobotse gampe, ba tliša maphelo a bona bofelong bja ka pela. Le gona basodoma ba bangwe ba boletše gore ba tla tšwela pele le balekane ba bantši-ntši gaešita lege ba lebane le kotsi ya go fetelwa ke AIDS.—Diema 10:21, 23.

Ka gona, ke’ng seo se tlago go thibela phošo ka mo go swanetšego? Ka kgonthe, ke poifo e swanetšego le tlhompho ya go hlompha Jehofa, tše di bonwago ka go kwa melao ya gagwe ya boitshwaro. “Xo boifa Morêna ké xôna xo thôma tsebô.” Le gona tsebo ya mohuta wo e tšweletša bohlale bjo bo tlogago bo “phediša mong wa byôna.”—Diema 1:7; Mmoledi 7:12.

Ka mo go kgahlišago, mongwadi, ka go lemoga gore AIDS e ka fetela le ka tšhelo ya madi, o botšišitše gape gore: “Na ga [se] mo go makatšago gore rena bao re bego re sola Dihlatse [tša] Jehofa ka mo go feletšego ka baka la go gana ditšhelo tša madi . . . mo gongwe bjale re ka ba re dira selo se se swanago ka baka la mabaka a mangwe.”