Na o a Gopola?

Na o ile wa thabela go bala ditokollo tša morago bjale tša Morokami? Gona, bona ge e ba o ka araba dipotšišo tše di latelago:

◻ Ka ge barongwa ba go se kwe ba notleletšwe Tartarus, se se ile sa bolela’ng go bona? (2 Petro 2:4)

Ga ba sa hlwa ba e-na le sebaka phuthegong e kgethwa ya Jehofa gomme bjale ba tlošitšwe seetšeng sa Modimo. Lega go le bjalo, ba sa dutše ba šoma ba le ka tlase ga tlhahlo ya Sathane gomme ba tšwetše pele ba le kgaufsi kudu le batho, ba leka go laola banna, basadi gaešita le bana. (Kutollo 12:​12, 17)​—4/15, letlakala 14.

◻ Ke ka baka la’ng ‘go hloya bobe’ e le gabohlokwa mahlong a Jehofa? (Psalme 97:10)

Bao ba hloilego bobe ba ka se ke ba nyaka mekgwa ya go nwelela go bjona ka lehlakoreng le lengwe batho bao ba sego ba bo hloya ba ka nyaka go arogana le bjona mola ka dikgopolong ba kganyoga go ba le karolo dilong tše mpe.​—4/15, letlakala 21.

◻ Seswantšhong sa Jesu sa ditalente, go newa tayo efe e matla go bohle bao ba ipolelago gore ke balatedi ba Kriste? (Mateo 25:​14-30)

Ba swanetše go šomela go oketša mahumo a Mong wa bona wa legodimong ka go ba le karolo e tletšego modirong wa boboledi. Ke ka tsela feela yeo ba ka kgonthišetšwago go retwa ke Jesu le go putswa. Ka go rialo ba phema go lahlelwa ka ntle lefsifsing le go fedišwa mafelelong.​—5/1, letlakala 9.

◻ Jesu o be a bolela’ng ge a be a botša barutiwa ba gagwe gore ba rapele ka gore: “O se re išê molekong”? (Mateo 6:13)

Mantšu a ga se a swanela go kwešišwa e le ao a bolelago gore Jehofa o re leka gore re dire sebe. Go e na le moo, ge e le gabotse re ka kgopela Jehofa gore a se re dumelele re ineela ge re lekwa goba ge re gatelelwa gore re se ke ra mo kwa. Re ka kgopela gore Tate wa rena gore a hlahle megato ya rena e le gore go se be le moleko wo o tlago go rena wo e lego o mogolo kudu go rena. (1 Ba-Korinthe 10:​13)​—5/15, letlakala 19.

◻ Na ke mo go swanetšego gore Bakriste ba amogele go hlabelwa ka dikarolwana tša madi tše bjalo ka globulin goba albumin tšeo di lwantšhago malwetši?

Ka baka la go kwa molao wa Modimo, Bakriste ga ba amogele ditšhelo tša madi tša dikarolo tše dikgolo tša madi, e lego plasma, disele tše khwibidu, disele tše tšhweu le di-platelet. Lega go le bjalo ba bangwe ba Dihlatse tša Jehofa ba ile ba ikwa ba ka amogela go hlabelwa ka e nngwe ya dikarolo tše nyenyane tša protheine ya plasma. Ka mo go kgahlišago, tše dingwe tša diprotheine tše ka tlhago di tloga mading a mosadi yo a imilego go ya tshepedišong ya madi e fapanego ya lesea la gagwe leo le sa lego ka mpeng.​—6/1, letlakala 30, 31.

◻ Go hlatswa ga Jesu maoto a balatedi ba gagwe Pasekeng ya mafelelo ya bohlokwa go ile gwa phetha morero ofe?

Jesu o be a ruta barutiwa ba gagwe thuto ka boikokobetšo. Go se be le motho yo a tsomago sebaka sa pele, a nagana gore o bohlokwa. Go e na le moo, bohle ba swanetše go latela mohlala wa Jesu, gomme ba ikemišetše go direlana ka ntle le go beba sefahlego, go sa šetšwe kamoo modiro e lego o nyatšegago goba o sa kgahlišego ka gona. (Johane 13:​12-17)​—6/15, letlakala 9.

◻ Ke ka kgopolo efe ba-Juda kua Berea ba ilego ba ‘hlahloba Mangwalo ka kelohloko’? (Ditiro 17:11)

Ga se gore ba-Berea bao ba be ba gonona Paulo le molaetša wo a bego a o tlišitše go bona, eupja ba ile ba dira dinyakišišo go kgonthišiša gore Jesu e be e le Mesia. Taba ya gore ba bangwe ba bona ba ile ba fetoga badumedi, e bontšha gore tutuetšo ya bona e be e le ya kgonthe. (Ditiro 17:​12)​—6/15, letlakala 18.

◻ ‘Puku ya dintwa tša Jehofa’ e be e le eng? (Numeri 21:​14, Phetolelo ya Kgale)

Ye e be e le histori e botegago ya dintwa tša Modimo bakeng sa batho ba gagwe. Mo gongwe e ile ya thoma go fenyeng ga Aborahama bahlasedi bao ba bego ba itlhamile ba Naga ya Kholofetšo go etša ge go begilwe go Genesi kgaolo 14. Seremo se segolo sa puku se tla ba “ntweng ya mohla-moxolo wa Modimo ra-matla-ohle,” Haramagedone. (Kutollo 16:​14, 16)​—7/1, matlakala 20, 22.

◻ Ke bjang Lentšu la Modimo, e lego Beibele, le ka re thušago go kgotlelela bohloko?

Beibele e re botša lebaka leo ka lona Jehofa a dumeletšego bohloko, gomme le gona le re tiišetša gore go se go ye kae bo tla fela. (Ba-Roma 5:​12; Kutollo 21:​1-5)​—7/15, matlakala 4, 5.

◻ Batho ba Modimo lehono ba ka ‘tšweletša bjang letago la Jehofa go etša diipone’? (2 Ba-Korinthe 3:18)

Letago la Modimo le phadimišwa ka “lebone la Ebangedi ya letago la Kriste, Yena seswantšho sa Modimo.” Dihlatse tša Jehofa di phadimiša letago le ka go botša ba bangwe ka letago la Jehofa le letago la Mmušo wa gagwe ka Morwa wa gagwe. (2 Ba-Korinthe 4:​4-6)​—7/15, matlakala 15, 16.

◻ Motho o swanetše go kolobetšwa neng?

Kolobetšo ke mogato wo o ka tšewago ge motho a dirile boineelo bjo bo feletšego, bjo bo sa šadišego selo le bjo bo sego bja ithekga ka maemo, go Jehofa ka Kriste Jesu bakeng sa go dira thato ya Modimo.​—8/1, letlakala 14.