Dipotšišo tše Tšwago go Babadi

Na Tsakaria, Tatago Johane Mokolobetši o be a Dirilwe Setholo le Semuma, Bjalo ka ge Luka 1:62 e Bonala Eka e Bontšha Bjalo?

Ba bangwe ba phethile ka gore Tsakaria o ile a ba a ba setholo. Re bala pegong ya Beibele gore: “Ba tla xo . . . rêa [ngwana] leina la Tsakaria tat’axwe. Mm’axwe a xana a re: Aowa; ó tlo bitšwa Johane. Bôná ba re: Hleng molokong wa xeno xò se motho wa leina leo! Ba kxwathetša tat’axwe [“ba botšiša tatagwe ka ditšhupo,” NW] ba re, ó rata xe a bitšwa ka leina lefe. Yêna a nyaka lematšana, a ngwala à bolêla a re: Leina la xaxwe ke Johane!”​—Luka 1:​59-63.

Lega go le bjalo, pegong ye ga go seo se bolelago ka lebanya gore Tsakaria o be a tšere lebaka le le itšego a sa kgone go kwa.

Pejana ga moo morongwa Gabariele o be a tsebišitše Tsakaria go belegwa mo go bego go e-tla ga morwa yo a bego a tla bitšwa Johane. Tsakaria yo a tšofetšego o ile a hwetša go le thata go dumela seo. Morongwa o ile a araba ka gore: “Tseba-xê! O tlo ba semuma, xwa tlo bá xwa tla letšatši le di tl’o xo tšwêlêla ka lôna; O tlo šitwa xo bolêla ka xobane Ò sa ka wa dumela tše ke di boletšexo tše di tl’o xo dirêxa ka lebaka la tšôna.” (Luka 1:​13, 18-20) Morongwa o be a boletše gore lentšu la Tsakaria ke lona le bego le tla kgomega, e sego go kwa ga gagwe.

Pego e tšwela pele e re: “Xe a e-tšwa [sekgethwa-kgethweng] a šitwa xo bolêla [le batho bao ba bego ba letile]; ké mo ba lemoxilexo xe a bone pônô mo Ntlong ya Modimo. Yêna a fo ba kxwathetša ka diatla, a dula à le semuma.” (Luka 1:22) Lentšu la Sehebere le le fetoletšwego mo e le “semuma” le nea kgopolo ya go fela ga matla a go bolela, go kwa, goba ka bobedi. (Luka 7:22) Go thwe’ng ka Tsakaria? Ela hloko se se diregilego ge a be a fola. “Ké xe molomo wa xaxwe ò mumoloxa le leleme la xaxwe la hunoloxa, a bolêla a rêta Modimo.” (Luka 1:64) Ka mo go kwalago, seo se iša kgopolong ya gore ke feela bokgoni bja Tsakaria bja go bolela bjo bo ilego bja fokola.

Bjale, ke ka baka la’ng ba bangwe ba botšišitše Tsakaria ‘ka go mo kgwathetša ba re o rata ge [ngwana] a ka bitšwa ka leina lefe’? Bafetoledi ba bangwe ba bile ba fetoletše se e le “go bolela ka go dira dika ka diatla” goba “go diriša polelo ya dika ka diatla.”

Tsakaria, yo a bilego semuma go tloga tsebišong ya morongwa, gantši o be a gapeletšega go bolela ka ditšhupetšo, e le gore a itlhalose, e lego mohuta o mongwe wa go bolela ka go dira dika ka diatla. Ka mohlala, yena ‘a [fela] a kgwathetša ka diatla’ bao ba bego ba le tempeleng. (Luka 1:​21, 22) Ge ka morago a be a kgopela lematšana, o swanetše go ba a dirišitše dika goba go bolela ka diatla. (Luka 1:​63) Ka gona, go a kgonega gore bao ba bego ba dula le yena nakong ya bomuma bja gagwe le bona e be e le ba sekametšego go boleleng ka diatla.

Lega go le bjalo, go bonala go e-na le tlhaloso e oketšegilego ya go bolela ka diatla mo go boletšwego go Luka 1:62. Elisabetha o be a sa tšwa go ntšha sa mafahleng a gagwe mabapi le leina la morwa wa gagwe. Ka gona, ka ntle le go mo ganetša, mo gongwe ba ka be ba ile ba fo gata mogato o latelago le o swanetšego wa go hwetša phetho ya monna wa gagwe. Ba be ba ka dira seo ka go kebiša hlogo goba go dira seka ka go bolela ka diatla. Therešo ya gore ga se ba ngwalela Tsakaria potšišo ya bona gore a e bale mo gongwe e ka ba ya ba bohlatse bja gore o be a kwele mantšu a mosadi wa gagwe. Ka gona, go fo kebiša hlogo goba seka se se swanago le seo go yena go be go ka bolela gore, ‘Aga, rena ka moka (go akaretša le wena, Tsakaria) re kwele seo mosadi a se nyakago, eupja phetho ya gago mabapi le leina la ngwana ke efe?’

Le gona, kapejana ka morago ga moo mohlolo o mongwe o ile wa direga, o bušetša boemo sekeng. “Ké xe molomo wa xaxwe ò mumoloxa le leleme la xaxwe la hunoloxa, a bolêla a rêta Modimo.” (Luka 1:64) Go be go sa nyakege gore go bolelwe ka go kwa ga gagwe ge e ba go be go se gwa kgomega.