Bošego bjo bo Swanetšego go Gopolwa

ETŠATŠING le le gopolegago nywageng e fetago 3 500 e fetilego, Jehofa Modimo o ile a laela ba-Isiraele bao ba lego Egipita gore ba bolaye kwana gomme ba tlotše madi a yona dijakwaneng tša nywako le dikoseneng tša dintlo tša bona. Bošegong bjona bjoo, morongwa wa Modimo o ile a feta dintlo tšeo di bego di swailwe ka tsela ye eupja a bolaya bana ba maitšibulo magaeng a ba-Egipita ka moka. Ba-Isiraele ka go rialo ba be ba lokolotšwe. Ga e sa le go tloga nakong yeo, letšatši la tiragalo yeo ngwageng o mongwe le o mongwe, ba-Juda ba ile ba bina Paseka.

Gatee-tee ka morago ga gore Jesu Kriste a fetše go bina Paseka ya gagwe ya mafelelo le baapostola ba gagwe, o ile a hloma monyanya wo e bego e tla ba segopotšo sa lehu la gagwe la sehlabelo. O ile a nea baapostola ba gagwe ba botegago senkgwa gomme a re: “Tšeang Le jê, ké mmele wa-ka.” Ka morago o ile a ba nea senwelo sa beine gomme a re: “Nwang sôna bohle. Ké madi a-ka a Kxwêranô e mphsa, a thšollwaxo ka ’baka la ba bantši, e bê xo lebalêlwa dibe.” Le gona Jesu o itše: “Dirang byalo xore e bê xo nkxopola.” (Mateo 26:26-28; Luka 22:19, 20) Ka gona Jesu o ile a laela balatedi ba gagwe go bina monyanya wo wa lehu la gagwe.

Dihlatse tša Jehofa di go laletša ka borutho go ba le tšona go bineng Segopotšo se sa lehu la Jesu. O ka ya Holong ya Mmušo yeo e lego kgaufsi le legae la gago. Botšiša Dihlatse tša lefelong la geno mabapi le nako le lefelo tše di nepagetšego. Letšatši la monyanya wo ka 1994 ke Mokibelo, March 26, moo senkgwa le beine di tlago go sepetšwa ka morago ga ge letšatši le sobetše.