“Testamente e Tala” Goba “Mangwalo a Sehebere”—Ke Efe Yeo e Lego Yona?

LEHONO ke mokgwa o tlwaelegilego Bojakaneng go diriša mantšu “Testamente e Tala” le “Testamente e Mpsha” go hlalosa dikarolo tša Beibele tša leleme la Sehebere/se-Arama le Segerika. Eupša na go na le motheo le ge e le ofe wa Beibele bakeng sa go diriša mantšu a? Le gona ke ka baka la mabaka afe Dihlatse tša Jehofa ka kakaretšo di phemago go a diriša dikgatišong tša tšona?

Ke therešo gore 2 Ba-Korinthe 3:14, go ya ka King James Version gotee le diphetolelo tše dingwe tša kgale tše bjalo ka Septembertestament ya Jeremane, e lego phetolelo ya pele ya Martin Luther (1522), di ka bonagala e ka di thekga mokgwa wo. Ka go King James Version, temana ye e balega ka gore: “Eupša megopolo ya bona e be e foufaditšwe: go ba go fihla le letšatšing le go sa šetše sona seširo seo se sa tlošwago mmalong wa testamente e tala; e lego seširo seo se fedišitšwego ka Kriste.”

Lega go le bjalo, na moapostola mo o bolela ka dipuku tše 39 tšeo ka tlwaelo di bitšwago “Testamente e Tala”? Lentšu la Segerika leo mo le fetoletšwego e le “testamente” ke di·a·theʹke. Saeklopedia ye e tsebegago kudu ya Jeremane ya thutatumelo e lego Theologische Realenzyklopädie, ge e bolela ka 2 Ba-Korinthe 3:14 e re ‘go balwa ga di·a·theʹke ya kgale’ temaneng yeo go swana le go ‘bala Moše’ temaneng e latelago. Ka gona e re, ‘di·a·theʹke’ ya kgale e emela Molao wa Moše, goba kudu-kudu Pentateuch. Ruri e tloga e sa emele sehlopha sa pele ga Bokriste sa Mangwalo a buduletšwego.

Moapostola o šupa go karolo feela ya Mangwalo a Sehebere, e lego Kgwerano ya kgale ya Molao woo o ilego wa begwa ke Moše ka go Pentateuch; ga a bolele ka Mangwalo a Sehebere le se-Arama ka moka ga ona. Go feta moo, ga a bolele gore mangwalo a buduletšwego a Bokriste a lekgolong la pele la nywaga C.E. a bopa “kgwerano e mpsha,” ka ge lentšu le go se na moo le tšwelelago gona ka Beibeleng.

Gape go swanetšwe go elwa hloko gore lentšu la Segerika di·a·theʹke leo Paulo a le dirišitšego mo ge e le gabotse le bolela “kgwerano.” (Bakeng sa tsebišo e oketšegilego bona New World Translation of the Holy Scriptures—With References, Appendix 7E, letlakala 1585, yeo e gatišitšwego ke Watchtower Bible and Tract Society of New York, Inc., 1984.) Ka baka leo diphetolelo tše dintši tša mehleng yeno di balega ka mo go nepagetšego ka gore “kgwerano ya kgale,” go e na le gore “testamente e tala.”

Tabeng ye, “National Catholic Reporter” e ile ya bolela gore: “Lentšu ‘Testamente e Tala’ ka mo go sa efogegego le bopa boemo bja go nyatšega le bja go ba e fetilwego ke nako.” Eupša Beibele ruri ke puku e tee, gomme ga go na karolo ya yona yeo e fetilwego ke nako goba yeo e lego ya “kgale.” Molaetša wa yona ke o dumelelanago go tloga pukung ya pele karolong ya Sehebere go fihla pukung ya mafelelo karolong ya Segerika. (Ba-Roma 15:4; 2 Timotheo 3:16, 17) Ka gona re na le mabaka a tiilego a go phema mantšu a ao a theilwego dikgopolong tše di sa nepagalago, gomme re kgetha go diriša mantšu ao a nepagetšego kudu e lego “Mangwalo a Sehebere” le “Mangwalo a Bakriste a Segerika.”