Bagoeledi ba Mmušo ba a Bega
Go Nea Bohlatse go Enywa Dienywa ka Gae le Sekolong
BOPHELO bja Mokriste bo akaretša go dira botse go ba bangwe, kudu-kudu ka go abelana le bona ditaba tše di lokilego tša Mmušo wa Modimo. Diema 3:27 e re: “Yo a swanetšwexo ke tše botse O se mo hlokišê tšôna, xe ’atla sa xaxo sè kxôna xo di dira.” Kua Argentina Hlatse ya mofsa ye e lego ngwageng wa yona wa boraro sekolong se phagamego e be e rata go abelana ditaba tše di lokilego tša Mmušo le mogwera wa sekolong. Go dira ga yona bjalo go ile gwa ba le mafelelo a magolo kudu.
Ka letšatši le lengwe Hlatse ya mofsa e ile ya botša mogwera wa yona gore ga se madumedi ka moka ao a lokilego. Ge lesogana le be le araba ka gore ga se la dira selo se sebe, Hlatse e ile ya re: “Lega go le bjalo ga o direle Modimo selo.” Se se ile sa dira mofsa gore a nagane. Ka morago Hlatse e ile ya hlalosa gore ye ke mehla ya bofelo le gore e le gore motho a amogelwe ke Modimo, o swanetše go hwetša tsebo e nepagetšego ya Beibele gomme a e diriše. Mogwera wa gagwe wa sekolong o ile a dumela. Eupša na lapa labo le be le tla mo dumelela go ba le thuto ya Beibele? Go nea mogwera wa yona seo e ka naganago ka sona, Hlatse e ile ya mo kgopela gore a bale puku ya O ka Phela ka mo go sa Felego Paradeiseng mo Lefaseng.
Nako e ile ya feta gomme mogwera a tlogela sekolo. Ga go a ka gwa kwewa selo ka yena ka nako e fetago ngwaga. Ka gona ka letšatši le lengwe Hlatse ya mofsa e ile ya makatšwa ke go amogela mogala o tšwago go mogwera wa yona yo a ilego a bolela gore o be a kgona go bona gore diporofeto tša Beibele di phethagala e le ka kgonthe. Hlatse e ile ya rulaganyetša gatee-tee go ithuta Beibele le yena.
Ge a be a e-ya lapeng la gabo yo e kilego ya ba mogwera wa gagwe wa sekolong, o ile a lemoga gore batswadi ba mogwera wa gagwe ba be ba tshwenyegile kudu ka seo morwa wa bona a bego a itsenya go sona. Gaešita le moratho wa mogwera wa gagwe o be a nagana gore o a gafa. Ka go rialo batswadi ba ile ba dira gore moratho a be gona thutong e latelago. Ka morago ga moo, lesogana le le ile la begela batswadi le sekišitše megokgo gore mogolo wa lona o be a sa gafe, e lego seo se ilego sa dira gore mma a re, “Go e na le go ba le bothata bjo tee, bjale ke na le a mabedi!”
Ka gona, thutong e latetšego yena ka noši o ile a ba gona gomme a swanelwa ke go dumela gore bašemane ba be ba sa gafe. Ka morago yena le monna wa gagwe ba ile ba rulaganyetšwa thuto ya Beibele. Go se go ye kae lapa ka moka le ile la thoma go ba gona dibokeng tša phuthego Holong ya Mmušo. Mafelelong, makgolo le rakgolo le bona ba ile ba thoma go ithuta Beibele gomme ba thoma go ya dibokeng. Go tloga ka nako yeo, lesogana la mathomo le ile la kolobetšwa. Le ile la nyala gomme lona le mosadi wa lona ke bagoeledi ba mafolofolo.
Go feta moo, ka bohlatse bjo bo sa rulaganyetšwago sekolong Hlatse ya mofsa e thušitše bagwera ba bangwe ba babedi bao e tsenago le bona sekolo gotee le mma le kgaetšedi ya yo mongwe wa bona gore ba thome go ithuta Beibele. Ka kakaretšo, batho ba 11 ba ithutile therešo ya Beibele ka baka la gore Hlatse ya mofsa ga se ya ka ya lesa go dira botse go bao e tsenago le bona sekolo. A mafelelo a thabišago gakaakang! Ka kgonthe, “Go šego setšhaba seo Jehofa e lego Modimo wa sona.”—Psalme 144:15, PK.