Bagoeledi Ba Mmušo Ba A Bega
“Lepatlelong . . . ka Mehla”
MOAPOSTOLA PAULO o be a diriša sebaka se sengwe le se sengwe go phatlalatša molaetša wa Mmušo. E le gore a tsome bao ba swanelegago, o ile a bolela “phuthexong . . . le Ba-Juda . . . Lepatlelong a bolêla ka mehla le bao a tianaxo le bôná.”—Ditiro 17:17.
Phišego e bjalo e sa le e e-ba leswao le le hlaolago la barapedi ba therešo ba Jehofa ga e sa le go tloga lekgolong la pele la nywaga C.E. (Mateo 28:19, 20) Lehono Dihlatse tša Jehofa ka mo go swanago di diriša mekgwa e fapa-fapanego ge di thuša batho ba dipelo tše di botegago ka phišego gore di fihlele tsebo e nepagetšego ya therešo. (1 Timotheo 2:3, 4) Phihlelo e latelago e tšwago Australia e bontšha se.
Matšatši a mahlano bekeng e nngwe le e nngwe, Sid le Harold ba šiedišana ka go hlokomela rakana ya go bontšha dipuku tša Beibele kgaufsi le seteišene sa ditimela kua Sydney. Ba be ba dutše ba abelana ditaba tše di lokilego tša Mmušo wa Modimo ka tsela ye mo e ka bago nywaga e mehlano bjale. Sid yo a nago le nywaga e 95 o hlalosa gore: “Ge ke be ke swara nywaga e 87, ke be ke se sa hlwa ke kgona go otlela. Seo se ile sa nnyamiša ka baka la gore ke be ke thabela modiro wa go nea bohlatse phatlalatša. Letšatši le lengwe ge ke be ke le kgaufsi le lefelo leo le ratwago ke basepedi ba go boga naga leo le bitšwago Echo Point kua Katoomba, ke ile ka bona mothadi wa diswantšho a rekiša diswantšho tša dinaga. Ke ile ka tsitsinkela diswantšho gomme ka nagana gore, ‘Ke na le diswantšho tše botse go feta tšela ka mokotlaneng wa-ka wa dipuku—le gona tše di bitšago tšhelete e nyenyane kudu go feta mo!’ Ka gona ke ile ka dira phetho ya go dira rakana ya go bontšha, ka e emiša felwana mo go rategago gomme ka nea bafeti ba tsela dipuku tša Beibele tše di nago le diswantšho tše botse tšeo di abjago ke Dihlatse tša Jehofa.
“Nywaga e mene e fetilego, ke ile ka hudušetša rakana Sydney gomme Harold o ile a ntlatša. Re šiedišana ka go hlokomela rakana le go šoma le diphuthego tša lefelong labo rena.” Harold yo bjale a nago le nywaga e 83 o re: “Go tloga ka Mošupologo go fihla ka Labohlano ke batho ba sego nene bao ba lego gona gae. Ka gona go abelana molaetša wa Mmušo ka tsela ye go re bea moo batho ba lego gona. Go ba gona, re hwetša mafelelo a makaone. Go sepediša ga rena dipuku nageng ye ke mo gogolo kudu.”
Sid o re: “Gaešita le ge re ile ra ipea mafelong a mane goba a mahlano a fapa-fapanego ge nywaga e dutše e feta, batho ga ba tšee nako go re tseba. Batho ba bangwe ba tla go rena bakeng sa dipuku. Ba bangwe ba na le dipotšišo tšeo ba nyakago di arabja. Ba bangwe ba fo nyaka go bolela ka metsotswana e sego kae. Ye ke nako e nnoši yeo dipoelo tša-ka di tlago go nna,” a rialo a sega.
Harold o oketša ka gore: “Ka kgonthe batho ba bantši ba kgahlišwa ke Beibele. Ka kgwedi e tee, batho ba bane ba ile ba thoma go ithuta Beibele le Dihlatse ka baka la dipuku tšeo ba di amogetšego go rena le ka baka la dipotšišo tšeo re bego re kgona go di arabela go tšwa Beibeleng. Diphihlelo tše bjalo di re kgothatša kudu.”
Go swana le Sid le Harold—le go swana le moapostola Paulo—Dihlatse tša Jehofa kae le kae di diriša mekgwa ka moka e kgonegago go phatlalatša molaetša wa tšona o bohlokwa. Ka gona, “ebangedi” e tšwela pele e bolelwa “lefaseng ka moka.”—Mateo 24:14.