Na Boraro Botee ke Thuto ya Beibele?

▪ Gaešita le ge go ena le ditlhaloso tše dintši, Boraro Botee bo hlaloswa ka tsela ye: “Batho ba bararo bao e lego boModimo (Tate, Morwa le Moya o Mokgethwa), bao yo mongwe le yo mongwe a bolelwago gore ke wa ka mo go sa felego, gomme yo mongwe le yo mongwe o bolelwa e le Ramatlaohle, bao go se nago yo mogolo goba yo monyenyane go feta ba bangwe, le gona ba bolelwa gore yo mongwe le yo mongwe ke Modimo, fela ka moka ga bona e le Modimo o tee.” Na ye ke thuto ya Beibele?

Gantši go thwe thuto ye e theilwe go Mateo 28:19. Temana ye ka go King James Version e tsopola Jesu a re: “Ka gona eyang, gomme le rute ditšhaba ka moka, le di kolobetša leineng la Tate, le la Morwa, le la Moya o Mokgethwa.” Ke therešo gore go bolelwa ka Tate, Morwa le moya o mokgethwa temaneng ye. Lega go le bjalo, ga go bolelwe selo ka go ba batee ga bona. Jesu o be a laela balatedi ba gagwe ba Bajuda gore ba rute batho le go ba kolobetša leineng la Tate, la Morwa le la moya o mokgethwa. Bjalo ka setšhaba, Bajuda ba be ba dumela eng?

Ge setšhaba sa Isiraele se be se amogela kgwerano ya Molao, yeo e bopago karolo ya Beibele, se ile sa laelwa gore: “Le ka mohla o se ke wa ba le medimo e mengwe ka ntle le nna.” (Doiteronomio 5:7) Go be go bolela batho ba bakae mo? Doiteronomio 6:4 e balega ka mo go kwagalago gore: “Theetša wena Isiraele: Jehofa Modimo wa rena ke yena Jehofa a nnoši”—e sego ba bararo go o tee. Isiraele e be e sa tšwa go lokollwa Egipita, yeo go yona go bego go rapelwa Osiris, Isis le Horus (ka ge go bontšhitšwe ka go le letshadi)—o mongwe wa medimo e mentši ya boraro botee. Ka baka leo, Isiraele e be e laelwa gore e rapele Modimo o tee feela. Go be go le bohlokwa gakaaka’ng gore batho ba kwešiše taelo ye? Go ya ka Ngaka J. H. Hertz, yo e lego rabi: “Tsebišo ye e kgahlišago kudu ya borapedi bja Modimo o tee feela e be e le boipolelo bja go lwantšhana le bohle bao ba rapelago medimo e mentši . . . Ka tsela e swanago, Shema e kgetholla boraro botee bja tumelo ya Bokriste e le go senywa ga Botee bja Modimo.”a

Ka ge Jesu e be e le Mojuda, o be a laetšwe gore a latele taelo yona ye. Ka morago ga kolobetšo ya gagwe, ge a be a lekwa ke Diabolo, o itše: “Tloga, Sathane! Gobane go ngwadilwe gwa thwe: ‘Ke Jehofa Modimo wa gago yo o swanetšego go mo rapela, e bile ke yena a nnoši yo o swanetšego go mo direla tirelo e kgethwa.’” (Mateo 4:10; Doiteronomio 6:13) Re ka ithuta bonyenyane dilo tše pedi tiragalong ye. Sa pele, Sathane o be a leka go goketša Jesu gore a rapele motho yo mongwe go ena le go rapela Jehofa, e lego teko yeo e bego e ka se kwagale ge nkabe Jesu e be e le karolo ya Modimo o tee. Sa bobedi, Jesu o boletše ka mo go kwagalago gore go na le Modimo o tee feela yo a swanetšego go rapelwa ge a be a re “yena a nnoši,” e sego “rena,” e lego seo a bego a tla se bolela ge nkabe e be e le karolo ya Boraro Botee.

Ge batho ba hwetša tsebo e nepagetšego ka Modimo gomme ba nyaka go mo hlankela, ba kolobetšwa “leineng la Tate le la Morwa le la moya o mokgethwa.” (Mateo 28:19) Ba a kwešiša e bile ba amogela bolaodi bja Jehofa le tema yeo e kgathwago ke Jesu Kriste go phethagatšweng ga morero wa Jehofa. (Psalme 83:18; Mateo 28:18) E bile ba kwešiša seo moya o mokgethwa wa Modimo goba matla a šomago a se dirago.—Genesi 1:2; Bagalatia 5:22, 23; 2 Petro 1:21.

Thuto ya Boraro Botee e be e dutše e gakantšha batho ka nywagakgolo. Ka lehlakoreng le lengwe, Jesu o ile a sedimoša balatedi ba gagwe gomme a ba lebiša go Modimo a nnoši wa therešo—Jehofa.—Johane 17:3.

[Mongwalo wa tlase]

[Mothopo wa Seswantšho go letlakala 23]

Musée du Louvre, Paris