“O Ile a Kgomarela Jehofa”

NA O kile wa botšwa gore o kgomarele selo se itšego?—a Batswadi le barutiši ba ka botša bana gore ba kgomarele dithuto tša bona. Se se ra gore ba di lebelele e le tše bohlokwa. Re nyaka go bolela ka motho yoo Beibele e rego “o ile a kgomarela Jehofa,” Modimo wa therešo. Leina la motho yoo ke Hesekia. Anke re bone seo re ka ithutago sona mohlaleng wa gagwe.

Hesekia ga se a ka a thabela bjana bja gagwe. Tatagwe e lego Ahasi, kgoši ya Juda, o ile a tlogela go hlankela Jehofa. Ahasi o be a etelela pele borapeding bja medimo ya maaka ge Hesekia e be e sa le mošemanyana. Ahasi o ile a ba a dira gore yo mongwe wa barwa ba gagwe—ngwanabo Hesekia—a bolawe gomme a neelwe bjalo ka sehlabelo go modimo yoo Ahasi a bego a mo rapela!

Gaešita le ge Ahasi a ile a tšwela pele a dira dilo tše mpe, Hesekia o ile a dula a ekwa Jehofa. Na o nagana gore go be go le thata go yena go dira seo?— Go swanetše go ba go be go le thata. Eupša Hesekia ga se a ka a lapa! Anke re ithute kamoo a ilego a kgona go kgomarela Jehofa le kamoo re ka dirago se se swanago ka gona.

Hesekia o ile a ithuta ka ba bangwe bao ba ilego ba kgomarela Jehofa. Dafida e be e le motho yo bjalo. Gaešita le ge Dafida a be a phetše nywaga e makgolo pejana, Hesekia o be a ka ithuta ka yena go tšwa Mangwalong. Dafida o ngwadile gore: “Le ge tate le mma ba ka ntlogela, Jehofa yena o tla nkamogela.”

Na o bona seo se thušitšego Dafida go kwa Jehofa?— E be e le tumelo ya gagwe! Dafida o be a kgodišegile gore ge a be a ekwa, Jehofa o be a tla mo thuša. Dafida o be a sa belaele seo! Go nagana ka Dafida ka ntle le pelaelo go ile gwa thuša Hesekia go kgomarela Jehofa ka go Mo kwa. Le wena o ka kgodišega gore Jehofa o tla go thuša ge e ba o tšwela pele o mo kgomaretše ka go mo kwa.

Lega go le bjalo, go thwe’ng ge e ba tatago goba mmago a sa hlankele Jehofa?— Modimo o re bana ba swanetše go kwa batswadi ba bona. Ka baka leo, o swanetše go theetša batswadi ba gago. Lega go le bjalo, ge e ba batswadi ba gago ba go botša gore o dire selo seo Modimo a rego o se ke wa se dira, o ka hlalosa lebaka la gore o se ke wa se dira. Ga se wa swanela go bolela maaka, go utswa goba go dira selo le ge e le sefe se sebe seo Modimo a rego se fošagetše, go sa šetšwe gore ke mang yo a rego o se dire. O swanetše go kwa Modimo!

Go na le mehlala e mebotse yeo re ka e latelago. Hesekia o be a sa latele mohlala wa Dafida feela eupša o be a latela le wa rakgolo’agwe Jothama. Gaešita le ge Jothama a hwile pele Hesekia a belegwa, Hesekia o be a ka ithuta ka yena, go fo swana le ge re ka ithuta ka yena ka Dibeibeleng tša rena lehono. Na o ka nagana ka mehlala e mengwe e mebotse yeo re ka e latelago?—

Ke therešo gore ka Beibeleng o ka ithuta mabapi le diphošo tše dingwe tšeo di ilego tša dirwa ke Hesekia, Dafida, Jothama le batho ba bangwe ba sa phethagalago. Eupša batho bao ba be ba rata Jehofa, ba ile ba amogela diphošo tša bona gomme ba leka go dira se se nepagetšego. Gopola gore ke Morwa wa Modimo feela, e lego Jesu, yoo a bego a phethagetše. A re ithute go yena kudu gomme re leke go latela mohlala wa gagwe.