E-Bang Gona Dibokeng “Xa-Xolo”
1 Go kopana gotee e bile gabohlokwa ka mehla bakeng sa batho ba Jehofa. Ba-Isiraele ba be ba e-na le tempele le disinagoge tša bona e le mafelo a bona a borapedi bja therešo, thuto ya Modimo le bakeng sa bogwera bja lethabo. Ka mo go swanago Bakriste ba pele ga se ba tlogela go bokana gotee. Ka ge dikgateletšo le diteko di oketšega mehleng ye e hlobaetšago ya bofelo, le rena re nyaka go matlafatšwa moyeng moo diboka tša rena tša phuthego di go neago—e bile re go nyaka “xa-xolo.” (Ba-Heb. 10:25) Ela hloko mabaka a mararo ao ka ona re bago gona dibokeng.
2 Bakeng sa Bogwera: Mangwalo a re kgothaletša gore ‘re eletšane, e mongwe a agiše e mongwe.’ (1 Ba-Thes. 5:11) Bogwera bja go boifa Modimo bo tlatša megopolo ya rena ka dikgopolo tše dibotse gomme bo re tutueletša go dira mediro e mebotse. Eupša ge re ipea lekatana, re tla nagana ka dikgopolo tša bošilo, tša boithati goba gaešita le tše di gobogilego.—Die. 18:1.
3 Bakeng sa Thuto: Diboka tša Bokriste di nea lenaneo le le tšwelago pele la thuto ya Beibele leo le rulaganyeditšwego go boloka lerato la go rata Modimo le phela ka dipelong tša rena. Di nea tlhahlo e šomago mabapi le go diriša “tšohle tše Modimo a di rataxo.” (Dit. 20:27) Diboka di re tlwaetša bokgoning bja go bolela le bja go ruta ditaba tše di lokilego, e lego bokgoni bjo bo nyakegago kudu le go feta mo nakong ye gore re be le lethabo leo le sa hlalosegego la go hwetša le go thuša bao ba tlago go amogela therešo ya Beibele.
4 Bakeng sa Tšhireletšo: Lefaseng le le kgopo, phuthego ke botšhabelo bja kgonthe bja moya—botšhabelo bja khutšo le lerato. Ge re le gona dibokeng tša phuthego, moya o mokgethwa wa Modimo o na le tutuetšo e matla go rena, o tšweletša dienywa tša “leratô, le lethabô, le moláô, . . . xo se fêle pelo, le botho, le bonôlô, le pôtêxô le bolêta, le boithswarô.” (Ba-Gal. 5:22, 23) Diboka di re matlafaletša gore re eme re tiile tumelong. Di re hlamela gore re itokišeletše diteko tše di lego ka pele.
5 Ka go ba gona ka mehla dibokeng, re thabela seo mopsalme a se hlalositšego, go etša ge se ngwadilwe go Psalme 133:1, 3 yeo e rego: “A botse le thatêxô! xe bana ba motho bà dula bà kwana!” Kae le kae moo batho ba Modimo ba hlankelago gona le go kopana gotee lehono, “xôna-mó Morêna ó laetše thšexofatšô, bophelô neng le neng.”