Na go na le Modimo yo a Hlokomelago?

Ge e ba a le gona—

Ke ka baka la’ng a dumeletše bokgopo?

Na bophelo bo tla ka bja hloka mathata?

1, 2. (a) Na dipotšišo tše di botšišwago serapeng sa pele ke tšeo o di botšišago? (b) Ke maemo afe ao a bakelago batho gore ba botšiše dipotšišo tše di bjalo?

GE E BA Modimo a le gona, ruri ke ka baka la’ng a dumeletše dilo tše di šiišago gakaakaa tše dintši gore di direge bathong historing yohle? Ge e ba ruri a re hlokomela, gona ke ka baka la’ng a dumelela bokgopo le bohloko gore di tšwele pele?

² Batho ba nago le hlaloganyo kae le kae ba botšiša dipotšišo tše. Ba na le lebaka la go botšišo ka gobane lapa la motho ka makgolo a nywaga le kwešitšwe bohloko ke dintwa tše šoro, ditlala, bodiidi, bosenyi le malwetši. Bokgopo le kgateletšo di bakile bohloko bjo bogolo le tšona. Go bile bjalo le ka dikotsi tše di swanago le meetse-fula le ditšhišinyego tša lefase. Gantši, batho ba hlokago molato ba kwešwa bohloko fela ba se ba dira selo se sebe. Na tše ka moka ke bohlatse bja gore Modimo ga a hlokomele seo se diregago go rena? Na go na le kholofelo ya kgonthe ka lefase le le kaone, lefase leo re ka thabelago bophelo e le ka kgonthe go lona re hunologile mathateng a ka moka?

3. Ke ka baka la’ng e le ga hlaloganyo go kgona go hwetša dikarabo tša dipotšišo tše?

³ Dipotšišo tše di bjalo di nyaka dikarabo tša therešo tše di kgotsofatšago. Ga se ga therešo goba mo go kgotsofatšago go botšwa fela gore “Ke thato ya Modimo gore re kwe bohloko,” goba gore “Tše ke dilo tšeo re ka se kego ra di kwešiša.” Ge e ba Modimo a hlodile legohle le le makatšago la lenaneo le le bjalo le le makatšago, gona o swanetše go ba a e-na le labaka le le botse ka go dumelela batho gore ba tsene tuba-tubegong ye. Na Mmopi yo bjalo a ka se ke a hlokomela e le ka kgonthe batho bao e lego ba gagwe, moo a ka re botšago lebaka leo a dumeletšego bokgopo ka lona? Na e ka se ke ya ba ga hlaloganyo go yena go lokiša maemo a a mabe nakong e beilwego, ge a ba a e-na le matla a go dira bjalo? Tate lege e le ofe yo lerato a ka dira bjalo baneng ba gagwe, ge e ba a ka kgona go dira bjalo. Ruri, Mmopi yo matla-ohle, yo bohlale-hlale le yo lerato a ka se ke a dira go gonyenyane baneng bao e lego ba gagwe ba lefase.

KE MANG YO A KA ARABAGO KAONE?

4. Ke mang yo a lego boemong bjo bokaone go re botša lebaka leo Modimo a dumeletšego bokgopo ka lona?

⁴ Ke mang yo a ka arabago kaone dipotšišo tše di botšišwago ka go dumelela ga Modimo bokgopo? Ge e ba o be o bewa molato, na o be o tla rata gore batho ba theetše seo se bolelwago ke batho ka wona? Goba na o be o tla rata go ipolelela wena ka noši, go dira gore taba e kwale mogopolong wa mang le mang yo a ratago go tseba e le ka kgonthe? Ke Modimo yo a bewago molato ka go dumelela bokgopo. Ka ge e le yena yo a tsebago kaone lebaka leo a bo dumeletšego ka lona, gona na e ka se ke ya ba mo gobotse go mo lesa gore a ipolelele? Go lebelela dikarabo bathong le ka mohla go ka se ke gwa kgotsofatša, ka ge gantši ba e-na le dikgopolo tše di ganetšanago ka ditaba tše.

5. Na ke ga hlaloganyo go dumela gore Modimo o ngwadile Beibele? (2 Petro 1:21; Habakuku 2:2)

⁵ Ke kae moo Modimo a neago dikarabo? Go na le mothopo o tee feela woo Mmopi a bolelago gore o na le tshwanelo ya go re botša seo se diregilego le lebaka la sona. Mothopo woo ke Beibele, yeo e rego: “Mangwalô ka moka ké ma-hebetšwa-ke-Modimo.” (2 Timotheo 3:16)a Se ga se sa swanela go makatša, ka gobane ge Modimo a bile le matla a go hlola legohle le le makatšago, gona a ka ba mongwadi wa puku. Batho fela ba ka tšweletša mantšu le dikgopolo gaešita le ka diswantšho tše di tšwago maphotong a moya a sa bonagalego, ba a tšweletša radiong goba thelebišeneng ya gago. Ka gona, e be e ka se ke ya ba selo se thata go Mmopi ya matla-ohle go tšweletša megopolo ya gagwe bangwading ba botegago ba batho, e le gore a bone gore ba e ngwala ka mo go nepagetšego. Ke ka lebaka leo moapostola Paulo a ilego a bolela ka kholofelo gore: “Mola Lè tlêlwa ke Lentšu le le bexo le bolêlwa ke rena, Lè sa ka la le amoxêla bo-ka lentšu la batho, la le amoxêla è le la Modimo, la therešo.”—1 Ba-Thesalonika 2:13.

6. Histori ya Beibele e latiša go fihla kae, gomme ke tsebišo efe yeo e ka re neago yona? (Luka 1:1-4; hlokomela le Luka 3:23-38.)

⁶ Mo gongwe ga se wa ka wa hlahloba Beibele. Fela, o ka thabela go tseba gore e rwele pego e feleletšego e le ka kgonthe ya histori ya kgonthe yeo e lego gona lehono. Ee, ra-dihistori wa lekgolo la nywaga la pele, Luka yo e bego e le ngaka, o kgonne go latelanya lešika la borakgolokhukhu ba Jesu wa Natsaretha le le bilego gona nywageng e dikete tše nne tša histori, a e-ya ka go latelana ga bona le ka maina a bona go fihlela mothong wa pele. Ka ge Beibele e latelanya go fihlela mathomong a go ba gona ga motho, gona e ka re botša yo a swanetšego go belaelwa ka baka la bokgopo, lebaka leo Modimo a bo dumeletšego ka lona le kamoo bo tlago go tlošwa ka gona.

NA MODIMO O SWANETŠE GO BELAELWA?

7. Ge go dirwa dilo tše dibe, ruri ke mang yo a swanetšego go belaelwa?

⁷ Ge motho o mongwe a be a ka dira molato, ruri o be o tla ikwa bjang ge e ba o be o ka belaelwa ka baka la wona? O be o tla bona se e le se sebe e le ka kgonthe. Go loka go bakela gore motho yo a nago le molato a otlwe gomme yo a se nago molato a se ke a belaelwa. Ge mootledi wa koloi a sa hlokomele pontšho yeo e mmontšhago gore a eme tseleng yeo dikoloi di rarakanego gona gomme a wela kotsing e kgolo, ruri ga se molato wa molao. Ge motho a fetoga seja-gobe gomme a babjišwa ke go ja kudu, ruri ga se molato wa molemi yo a lemilego dijo. Ge lesogana go sa setšwe kamoo le godišitšwego ka gona ka tsela e botse le tlogela legae, le gana keletšo e botse ya tat’ago lona gomme le wela mathateng, ruri ga se tate yo a tlago go belaelwa. Ka gona, ke ka baka la’ng Tate wa legodimo, Modimo, a ka belaelwa ge batho ba dira diphošo? Na pelaelo ga se ya swanela go lebišwa moo e swanetšego gona, e lego mothong yoo a nago le molato?

8. Ke go ganetšana gofe mo go lego gona ge e ba re belaela Modimo ka baka la seo e lego se sebe?

⁸ Le gona, go na le se sengwe seo se swanetšego go hlokomelwa. Ge e ba re belaela Modimo mabapi le dilo tše di bjale ka go felelwa ke matla mo go bakwago ke tlala, gona ke mang yoo re mo retago ka baka la mašemo a budušago mabele le dirapa tšeo di tšweletšago dijo tše dintši mafaseng a mantši? Ge e ba re belaela Modimo ka malwetši, gona ke mang yoo re mo retago ka baka la ditshepedišo tše di makatšago tša go iphodiša ga mmele? Ge e ba re belaela Modimo ka metse ya bodiitšana, gona ke mang yoo re mo retago ka baka la dithaba tše botse, madiba a sekilego, matšoba a kgahlišago le dihlare tše di botse? Ee, ge e ba re belaela Modimo ka mathata a lefase gomme re bile re mo reta ka baka la dilo tše di botse tša lefase, gona seo ke go ganetšana. Modimo yo lerato a ka se ke a tšweletša botse gotee le bobe ka nako e swanago.

9. Na ke hlaloganyo go bolela gore Modimo ga a gona fela ka gobane batho ba dira dilo tše mpe? (Jesaya 45:18)

⁹ Go bolela gore Modimo ga a gona, ruri go dira gore bothata e be bjo bogolo kudu. Go dumela gore lefase le gotee le dibopego tša lona tše di makatšago tša bophelo, di itšweleditše, ruri ke go gana dinnete. Therešo ke ya gore lefase le hlamilwe e le ka kgonthe gore le thuše bophelo go phala ntlo lege e le efe, fela ntlo e nngwe le e nngwe e-na le moagi wa yona yo bohlale le mothei wa yona. Go ka thwe’ng ge ka kgokolo ye, yeo e nago le ditshepedišo tšeo di holago kudu tše di thušago bophelo, e lego moya, lefase le meetse? Beibele e bolela ka hlaloganyo gore: “Xobane malapa ka moka a na le baaxi ba ôna; xomme Mo-axa-tšohle ké Modimo.” (Ba-Hebere 3:4) Ke therešo, batho ba bangwe ba phetha ka go bolela gore ka gobane batho ba dira dilo tše dibe, gona go bolela gore Modimo ga a gona. Ee, se se swana le go bolela gore ka gobane batho ba ba dulago dintlong ba dira dilo tše mpe, gona dintlo ga di na bao ba di agilego. Le gona, go tla swana le go bolela gore ka gobane motho a dira selo se sengwe se sebe, gona ga se a ka a ba le tat’agwe.

10. Ke kae moo re ka beago pelaelo e kgolo mabapi le bokgopo?

¹⁰ Ka gona, ke mang yo a swanetšego go belaelwa ka baka la dilo tše šoro tšeo di diregetšego lapa la motho? Pelaelo e kgolo e swanetše go lahlelwa bathong. Go se botege ga batho le tshelekego di baka bosenyi. Boikgogomošo bja motho le boithati bja gagwe di baka manyalo a senyegilego le lehloyo le go nyatšana ga merafo. Phošo ya motho le go se šetše dilo di baka tšhilafatšo. Go hloka tsebo ga motho le bošilo bja gagwe di baka dintwa; gomme ge ditšhaba tšohle di latela ka go se lemoge baetapele ba bopolitiki dintweng tšeo, gona di swanetše go belaelwa ka baka la tlhokofatšo yeo. Tlala le bodiidi di bakwa kudu ke go se hlokomele ga motho le megabaru ya gagwe. Hlokomela: lefase le diriša tšhelete e fetago dibilione tše 200 tša diranta ngwageng o mongwe le o mongwe dibetšeng. Ge tšhelete ye ka moka e be e ka dirišwa ka tshwanelo tabeng ya tša temo le go abja ga dijo ka go lekana gomme gwa katanelwa go fediša magae a bodiitšana, gona anke o gopole seo se bego se tla dirwa!

11. Ka ge baruti ba rapelela madira a ditšhaba tša gabo bona, na Modimo o swanetše go belaelwa ka baka la dintwa tšeo madira ao a di lwago? (Jesaya 1:15; Diema 28:9)

¹¹ Le gona, Modimo ga se a swanela go belaelwa ka baka la diphošo tše di dirwago leineng la bodumedi. Ka mohlala, baruti ba rapelela tšhegofatšo ya Modimo dintweng tša ditšhaba tša gabo bona. Fela go dutše go le bjalo, ruri bahlabani ba bolayana ka mahlakoreng ohle gaešita lege e le ba bodumedi bjo bo swanago! Modimo a ka se ke a belaelwa ka baka la seo, ka gobane o nyatša seo ba se dirago gomme o bolela gore batho bao ba mo direlago e le ka kgonthe ba swanetše ‘go ratana.’ (Johane 13:34, 35) Ge ba se na lerato le, gona Modimo o bolela gore ba ‘etša Kaine e a tswetšwego ke E-mobe, gomme a bolaya ngwan’abo.’ (1 Johane 3:10-12) Go bolaya batho ka leina la Modimo, lege e ka ba go ka dirwa nakong ya meferefere goba dintwa ruri ke mo go swanago le mokgwa wa kgale wa go direla medimo ya maaka dihlabelo tša bana e lego selo seo Modimo Ra-matla-ohle a bolelago gore ‘ga se a ka a ba botša sona, gomme ga se sa ka sa rotoga pelong ya gagwe.’—Jeremia 7:31.

12. Ke ka baka la’ng baruti ba bodumedi ba bitšwa “baikaketši” ka Beibeleng? (Mateo 15:7-9)

¹² Go itswakanya ga baruti dipolitiking, go thuša ga bona dintwa le dithuto tša maaka tše di swanago le go bolela gore Modimo ke yena yo a bakago mathata a lefase, goba le gore o fiša batho mollong wa dihele wa kgonthe ka mo go sa felego, ruri ke tše di emišago sebete bathong ba nago le hlaloganyo gaešita le go Modimo. Baetapele ba bodumedi bao ba rutago le go dira dilo tše di ganetšanago le Modimo, ba bitšwa “baikaketši” Lentšung la Modimo, leo le bilego le rego go bona: “Le swana le mabitla a a takilwexo ka phêpa, a a boxêxaxo ka ntlê, mola ka xare à tletše marapô a bahu le makxapa fêla. Le lena Le byalo; xe batho ba Le bôna ba re Le baloki, mola ka teng Lè tletše boikaketši le bokxôpô.” (Mateo 23:27, 28) Therešong, Jesu o boletše ka baetapele ba baikaketši ba bodumedi gore: “Tata-weno yo le tšwaxo xo yêna ké Diabolo.”—Johane 8:44.

13. (a) Ka gona, na Modimo o swanetše go belaelwa ge batho ešita le ka baetapele ba bodumedi ba dira dilo tše mpe? (b) Fela, ke dipotšišo dife tše di ka botšišwago?

¹³ Aowa, Modimo ga se a swanela go belaelwa ka baka la diphošo tšeo batho ba di dirago ka noši. Le gona, a ka se ke a belaelwa ka baka la diphošo tšeo di šegofatšwago ke baruti bao ba ipolelago gore ba direla Modimo, eupja e le bao ba sa bolelego therešo goba go phela ka yona. Age, na go bile le se sengwe sa phošo ka tsela yeo Modimo a dirilego batho ka yona? Na o ile a nea moloko wa motho mathomo a mabe?

MATHOMO A PHETHAGETŠEGO

14. Hlalosa mathomo ao Modimo a ilego a a nea batswadi ba rena ba pele. (Genesi 1:26-31; 2:7-9, 15)

¹⁴ Ge motho a bala dikgaolo tša pele tše pedi tša puku ya Genesi 1-2, ruri o bona gabotse gore ge Modimo a be a bopa monna le mosadi o ile a ba nea mathomo a phethagetšego. O ba bopile ka mebele e phethagetšego, le megopolo e phethagetšego, moo bolwetši le lehu di bego di ka se ke tša ba hlasela. Legae la bona e be e le tšhemo e kgahlišago e swanago le serapana sa matšoba a kgahlišago, merogo e bose le dihlare tša dienywa. Go be go sa hlokwe selo. Ee, dijo di be di le ka bontši. Le gona, Modimo o ile a bea pele ga batswadi ba rena ba pele modiro o thabišago le dipakane tše di kgahlišago. O ile a ba laela gore ba katološe maemo a swanago le serapa a paradeise yeo, e le gore a aparele lefase ka moka. Ge nako e tšwela pele ba be ba tla thušwa go se ke bana ba bantši ba ba phethagetšego bao ba bego ba tla ba belega. Ka gona, lapa la motho le be le tla ba moloko o phethagetšego wa batho ba dulago paradeiseng ya lefase, ba thabelago bophelo ka go sa felego ešita le go buša diphoofolo ka lerato.

15. Phethego ya botho e bolela’ng gomme ga e bolele’ng?

¹⁵ Eupja, ke ka baka la’ng dilo di ile tša fetoga gakaakaa? Na ke ka gobane Modimo a be a se a bopa batho ba phethagetše? Aowa, ye ga se yona taba, ka gobane Doiteronomio 32:4 e bolela Modimo e le “yo tirô-phethexi.” Lega go le bjalo, phethego ya motho e be e sa bolele gore batho ba pele ba babedi ba be ba tseba dilo ka moka goba gore ba be ba ka dira dilo tšohle, goba le gore ba be ba ka se ke ba phoša. Ešita le ka dibopiwa tše di phethagetšego di a hlaelelwa. Ka mohlala, go be go e-na le go hlaelelwa ga mmele. Ge ba be ba ka se ke ba ja dijo, ba nwa meetse le go hema moya, gona ba be ba tla hwa. Le gona, ba be ba ka se ke ba dira dilo tše di swanago le go roba molao wa matlakgogedi ka go taboga ba le lefelong le le phagamego gomme ba seke ba lebelela go gobala. Ba be ba bile ba e-na le go hlaelelwa ga kelello. Ee, Adama le Efa ba ile ba swanelwa ke go ithuta dilo tše dintši ka ge ba be ba se na tsebo. Fela, go sa hlokomelwe tšeo ba bego ba ithutile tšona, ruri ba be ba ka se ke ba tseba go swana le Mmopi wa bona. Ka gona, ešita lege ba be ba phethagetše, feela ba be ba hlaelelwa ka ge e be e le batho. Phethego e bolela gore ba be ba dirilwe ka go felelela le gore go be go se na sa phošo mebeleng ya bona le dikelellong tša bona.

16. Khunologo ya motho e be e dumeletšwe go dirišwa mellwaneng efe? (1 Petro 2:16)

¹⁶ Le gona, Modimo o bopile batho e le ba ba hunologilego gomme e se bao ba tlago go sepedišwa ke boikutlo go swana lege diphoofolo di le bjalo. Ruri, o leboga khunologo e bjalo. O ka se ke wa rata gore motho o mongwe a go botše ka motsotswana o mongwe le o mongwe wa bophelo seo o swanetšego go se dira. Lega go le bjalo, khunologo yeo e be e se e feleletšego, ke gore e hlokago mellwane, eupja e be e swanetše go ba e lekanyeditšwego. E be e swanetše go dirišwa ka gare ga mellwane ya melao ya Modimo. Melao yeo e botse e be e tla ba e sego kae le e bonolo, e dirilwego go gopolwa ka lethabo le legolo la lapa la motho. Lerato la Modimo bathong le ile la bontšhwa ke ge a be a nyaka gore ba kwe melao ya gagwe, ka ge a be a tseba gore go hlompha melao yeo go tla ba tlišetša mehola ya ka mo go sa felego. Go se hlomphe Modimo le melao ya gagwe go be go tla tshwenyana le lethabo la bona. Go be go ka se ke gwa ba tlišetša botse lege e le bofe. Therešong, go be go tla tliša kotsi ka gobane Modimo o be a lemošitše Adama le Efa gore ge ba ka mo lahla ba “tlo hwa lehu.” (Genesi 2:17) Ka gona gore ba tšwele pele ba phela, ruri ba be ba se ba swanela gore ba je feela dijo, ba nwe feela meetse le go hema feela moya, eupja ba be ba swanetše go sepedišwa ke Modimo le melao ya gagwe.

17. Lebaka le lengwe la bohlokwa ke lefe la lebaka leo batho ba swanetšego go ithekga ka Modimo? (Psalme 146:3; Jeremia 17:5-9)

¹⁷ Go na le lebaka le legolo leo batswadi ba rena ba pele ba bego ba swanetše go tšwela pele ba ithekgile ka Modimo. Lebaka leo ke la gore, batho ba be ba se ba bopelwa gore ba buše ditaba tša bona ka katlego ka ntle le go ithekga ka Modimo. Modimo o be a se a ba nea tshwanelo goba matla a go dira bjalo. Bjale ka ge Beibele e bolela: “Motho tsela y’axwe xa’ e buše; le monna mo a yaxo xa’ ikiše, le xe a xata a tiiša.” (Jeremia 10:23) Ke ka lebaka leo Beibele e rego: “Moipoti ké setlatla.”—Diema 28:26.

BOKGOPO BO THOMILE BJANG?

18. Ke’ng yeo e ilego ya ba phošo ka batswadi ba rena ba pele? (Jakobo 1:14, 15; Psalme 36:9)

¹⁸ Ka mathomo a bjalo a mabotse, ruri ke’ng yeo e ilego ya senyega? Se: batswadi ba rena ba pele, Adama le Efa, ba ile ba diriša khunologo ya bona ka phošo. Ba rata go sepela ka tsela yeo e lego ya bona go e na le go ikokobetša molaong wa Modimo. Therešong, mosadi o ile a gopola gore o tla ‘ba bjalo ka Modimo, a tsebe botse le bobe.’ (Genesi 3:5) Ba ile ba rata gore ba itsebele seo e lego se se lokilego le seo e lego sa phošo ka go ithekga ka kgopolo ya bona. Ga se ba ka ba bona tshenyo e kgolo yeo e bego e tla bakwa ke kgopolo e bjalo. Eupja se ke seo se ilego sa direga ka ge ‘Modimo a sa aketše.’ (Tito 1:2) Ge ba intšha pušong ya Modimo ruri seo se ilego sa tšwelela ke seo ge e le gabotse se swanago le seo se diregago ge re ntšha polaka ya segapa-moya sa motlakase. Ge se ntšhwa mothopong wa sona moo se hwetšago matla, segapa-moya se felelwa ke matla gomme se phetha ka go se sa sepela. Ka mokgwa o swanago, nakong ya ge batho ba pele ba babedi ba intšha Mothopong wa bophelo, Jehofa Modimo, ba ile ba gwahlafala gatee-tee gomme ba hwa go etša ge Modimo a be a ba lemošitše gore ba tla ba bjalo.

19. Ke ka baka la’ng moloko ka moka wa motho o tswetšwe o se wa phethega? (Ba-Roma 5:12)

¹⁹ Ka ge batswadi ba rena ba pele ba ile ba rabela go Modimo pele ga ge ba ka ba le bana, gona go se phethege go ile gwa tšwelela pele ga ge ngwana wa bona wa pele a ka belegwa. Adama le Efa ba ile ba swana le mohlala o solegago. Dilo tšohle tše di ilego tša tšwa go bona, di be di solega. Ba be ba tla fetišetša baneng ba bona feela seo bona ka noši ba bego ba e-na le sona, ke gore mebele e se ya phethegago le megopolo e se ya phethegago. Ba be ba se sa phethagetše, ka gobane ba be ba tlogile Mothopong woo o thušago phethego le bophelo, Jehofa Modimo. Ka gona, ka go dumelelana le seo Beibele e se bolelago go Ba-Roma 5:12, batho ka moka ba ilego ba tswalwa ga e sa le go tloga moo ba tswetšwe ba se ba phethega gomme ba hlaselwa ke malwetši, botšofadi le lehu. Eupja Modimo a ka se ke a belaelwa ka se. Doiteronomio 32:5 e re: “Ba e sexo bana b’axwe ka dithšila ba a mmêka, ké thakà ya mereba le ya lonya.” Mmoledi 7:29 e re: “Se ke se hweditšexo ké setee, se se: Batho, Modimo ó ba dirile baloki; ké bôná ba ba nyakaxo mahlale a mantši.”

20. Diphošo tša batho ba sego nene di ka feleletša bjang ka kotsi bathong ba bantši?

²⁰ Eupja na ke hlaloganyo gore go se kwe ga batho ba babedi fela go swanetše go baka mafelelo a bjalo a šoro bathong ka moka? Ee, re tseba gore go se hlokomele mo go dirwago ke motho o tee fela tabeng ya go hlokomela selo se senyenyane seo se lego moagong, go ka feleletša ka kotsi yeo e ka jago maphelo a batho ba bantši. Go palelwa ke go hlokomela sebopego se se swanago letamong, go ka feleletša ka go palega ga lona gotee le meetsefula ao a ka bakago tshenyego e šiišago. Tiro fela ka e tee ya tshenyo yeo e ka dirwago ke mmuši, e ka bula tsela ya lelokelelo la diphošo mmušong gomme gwa feleletša ka kotsi bathong ba dimilione. Lapeng moo tate le mma ba dirago kgetho ya phošo, ruri bana ba bona ba ka welwa ke mafelelo a sehlogo. Batswadi ba rena ba pele ba dirile kgetho ya phošo. Ka baka leo, lapa ka moka la motho le ile la lahlelwa maemong a go se phethege le a kotsi.

21. Ke ka baka la’ng Modimo a ile a kgomarela kotlo ya lehu, gomme kgaugelo ya gagwe e ile ya bontšhwa bjang?

²¹ Ka ge molao wa Modimo o be o akaretšwa gomme go akaretšwa le ka potego ya gagwe, gona o be a ka se ke a lesa go robja ga wona go tima-timela ka ntle le go diriša molao woo. Batho ba be ba ka mo hlompha bjang goba go hlompha molao wa gagwe, ge e ba go be go se na seo a se dirago ka seo? Na re hlompha babuši lehono bao ba sa kwego melao yeo e lego ya bona, goba bao ba dumelelago batho ba bangwe go e roba ka boomo ka ntle le go otlwa? Ka gona, Modimo o ile a phetha kotlo ya gagwe e bego e boletšwe mabapi le go se kwe, yeo e bego e le lehu. Eupja o ile a dumelela ka kgaugelo batho ba pele ba babedi gore ba be le bana, e lego selo seo re swanetšego go se leboga ka ge nkabe re se ra tswalwa. Ešita lege re se ra phethega ka baka la go palelwa ga Adama le Efa, fela na ga re thabele go phela go e na le go hwa?

22. Ke mang gape yo a nago le boikarabelo bjo bogolo mabapi le bokgopo? (Mateo 4:1-11; Ba-Efeso 6:12)

²² Na se ke go bolela gore bokgopo bo thomilwe e le ka kgonthe ke batho? Aowa, go na le mothomi o mogolo go feta bona. Go tšweletša ga Modimo dibopiwa tše di hlalefilego go be go se gwa lekanyetšwa bathong feela. O be a šetše a bopile barwa ba gagwe ba hlokago palo ba hlalefilego magodimong, e lego dibopiwa tša moya. Ešita lege bona e be e le ba hunologilego, fela le bona ba be ba swanetše go ikokobeletša kgaugelong ya Modimo le melaong e nago le hlaloganyo ya gagwe e le gore ba tšwele pele ba phela. Lega go le bjalo, o mongwe wa dibopiwa tše tša moya o ile a nagana ka dikgopolo tše mpe. Ge motho a nagana ka seo e lego se sebe, seo se ka ikaga go fihlela moo a ka dirago selo se sebe seo a gopolago ka sona. Go bile bjalo ka sebopiwa se sa moya. O ile a mediša boithati ka go yena go fihlela moo bo ilego bja mo dirago gore a ganetšane le ditiro tša Modimo. O ile a botša mosadi wa Adama, Efa, gore ba ka tlogela go kwa Modimo gomme a bolela le gore, “Le ka se kê la hwa lehu.” (Genesi 3:4) O belaetše go swanelwa ga bona ke go ithekga ka Mmopi e le gore ba tšwele pele ba phela gomme ba thabile. Ee, o ba boditše gore go se kwe go be go tla dira gore ditaba di be kaone go bona, gomme go ba dire gore ba swane le Modimo. Ka gona, o ile a belaela go ba le therešo ga Modimo. Ka go belaela melao ya Modimo, ruri o belaetše gaešita le ka tsela ya go buša, gomme a belaela e le ka kgonthe tshwanelo ya Modimo ya go buša. Ka baka le, o ile a bitšwa Sathane, leo le bolelago moganetši, le Diabolo, leo le bolelago mosebi.

KE KA BAKA LA’NG BO DUMELETŠWE KA NAKO E TELELE GAKAAKAA?

23, 24. Ke ka baka la’ng dikgang di tla tšea nako gore di lokišwe?

²³ Ka gobane Modimo e le o matla gakaakaa, ruri o be a ka tloša gabonolo batho ba gotee le marabele a moya mathomong. Eupja seo se be se ka se ke sa lokiša ditaba ka mokgwa o kgotsofatšago. Ke ka baka la’ng go se bjalo? Ka gobane e be e se matla a Modimo a bego a ganeditšwe. Dikgang tše di ngangilwego e be e le tša boitshwaro. Kgang e bohlokwa gare ga tšona e be e le ye: Na tsela ya borabele e be e tla ipontšha e atlega? Na pušo yeo e ganago Modimo e be e tla tliša mehola ya ka mo go sa felego lapeng la motho ka moka ga lona? Na pušo ya Modimo ya go buša batho e be e tla ba e kaone go bona, goba na pušo ya motho e be e tla ba kaone? Modimo bohlaleng bja gagwe o tsebile gore ye gotee le dikgang tše dingwe tšeo di ilego tša ngangwa, di be di tla tšea nako go lokišwa. Ka gona, o ile a dumelela nako ya kgonthe yeo e bego e tla nea batho sebaka se se swanetšego gore ba fihlele tlhoreng ya mebušo ya bona ya bopolitiki, ya tša boiphedišo, tša mediro le tša thutamahlale.

²⁴ Nako yeo e be e ka se ke ya ba fela matšatši a se makae goba nywaga e se mekae. E be e tla tšea meloko e mentši gore karabo e bontšhwe ka ntle le pelaelo e itšego. Melato ya kgoro e ka tšea dibeke goba dikgwedi gaešita lege e le yeo go akaretšwago batho ba babedi go yona. Dikgang tše dikgolo tšeo di bapilego le pušo ya Modimo di nyaka karabo e tletšego, e sego go lokišwa ga seripa. Ka tsela ye, go lokišwa ga dikgang tše go be go ka se sa boeletšwa le ka mohla nakong lege e le efe e tlago. Modimo yo lerato ga go na seo a bego a ka se amogela, go feta go lokiša ditaba ka mo go feleletšego. Le gona re ka thaba ge se se le bjalo, ka ge go lokišwa mo go bjalo go tla bulela khutšo le polokego ya ka mo go sa felego tsela bakeng sa dibopiwa ka moka tša lapa la Modimo la legohle, tše di lego legodimong le lefaseng.

25. Ga sa hlokomelwe tšwelopele ya mahumo a dilo tše di bonagalago, ruri na go ipuša ga motho ka ntle le Modimo go tlišitše khutšo ya kgonthe le lethabo?

²⁵ Go šetše go fetile nywaga e 6 000 ga e sa le dikgang di thoma go ngangwa. Go intšha pušong ya Modimo go feleleditše ka’ng? Ka mebušo ya mehuta yohle, mehuta ka moka ya mananeo a tša boiphedišo, mehuta yohle ya ditshepedišo tša tša leago le mehuta yohle ya bodumedi bja dihlotswana tšeo di lekilwego. Fela, ga go na seo se tlišitšego khutšo ya kgonthe, polokego ya kgonthe, boiketlo bjo bo sa felego le thabo e sa felego. Na go na le motho yo a ka ikgantšhago ka tšwelopele ya dilo tše di bonagalago, ge Ntwa ya II ya Lefase e nnoši e bolaile batho ba ka fetago dimilione tše masome a mahlano? Na ke tšwelopele go romela batho kgweding, ge dirokete tšona tšeo tše di nago le dibetša tša nuclear di ka fediša batho, ge batho ba makgolo a dimilione lefaseng ba bolawa ke tlala le bodiidi, gomme ka nako e swanago go bolelwa gore batho ba sepetše kgweding? Go hola’ng go ba le ntlo yeo e tletšego mabai-bai a mantši ge malapa a kgaoganywa ke dingangišano, ge palo ya ditlhalo e gola e le ka kgonthe, ge go boifa bosenyi tulong go atile gakaakaa, ge tšhilafatšo le metse ya bodiitšana e atile, ge mathata a tša ditšhelete a bakela batho ba dimilione gore ba hloke mediro, ge meferefere, dintwa tša segae le go phekgolwa ga mebušo e le dilo tše di lego gona ngwageng o mongwe le o mongwe gomme e le tšeo di tšhošago legae la motho le tsela ya gagwe ya bophelo?

26. Nako e dumeletšwego e utollotše’ng ka go ipuša ga motho ka ntle le Modimo? (Psalme 127:1)

²⁶ Therešo ke yona yela ya go bolelwa ke Mongwaledi-Kakaretšo wa Ditšhaba tše di Kopanego, Kurt Waldheim: “Go sa hlokomelwe tšwelopele ya mahumo a dilo tše di bonagalago, ruri bophelo bja motho ga se bja ka bja ba bjo bo se bja bolokegago go swana le kamoo bo lego ka gona lehono.”b Puku ya Environmental Ethics le yona e re: “Motho yo a bopetšwego go hema moya o hlwekilego, go nwa meetse a sekilego le go a thabela gotee le go thabela tikologo ya gagwe ya tlhago, o fetotše tikologo ya gagwe gomme o hwetša gore a ka se ke a kgona go e tsošološa. O lokišeletša polao yeo e lego ya gagwe e kgolo.”c Ruri, go dumelelwa ga bokgopo ka nako e telele go swanetše go bontšha bathong ka moka ba hlaloganyago gore batho ba be ba se ba bopja ba e-na le matla a go sepediša ditaba tša bona ka katlego, ka ntle le go sepedišwa ke Modimo. Ka nywaga e dikete tše tshelelago ya go palelwa ga motho e le bjale ka bohlatse, ruri ga go na motho yo a ka beago Modimo molato ka tshwanelo wa gore ga se a dumelela nako e lekanego bathong gore ba itokišetše dilo. Nako e beilwego e bile e lekanego go bontšha gore tsela ya borabele malebana le Modimo, ruri e bile e kotsi kudu.

BOKGOPO BO KGAUFSI LE GO FELA

27. Phetogo yeo Modimo a e rerilego ke e kgolo gakaakang? (Diema 2:21, 22; Ba-Roma 6:20)

²⁷ Lapa la motho le nyaka e le ka kgonthe phetogo e kaone. Ee, re nyaka tshepedišo e feleletšego e mpsha. Bjale ka ge ra-tša-leago Erich Fromm a boletše, ruri bobe bjo bo lego lekokong bo ka lokišwa “feela ge e ba tshepedišo yohle bjale ka ge e bile gona nakong ya nywaga e fetilego e 6 000 ya histori, e ka tšeelwa sebaka ke e nngwe yeo e fapanego le yona ka mahlakoreng ohle.”d Se ke sona seo Modimo a se gopotšego! Nakong ya ge nako ya gagwe e beilwego e fihla, Modimo o tiišitše gore o tla senyetša ruri tshepedišo ya mehleng yeno e mpe ya dilo gotee le batho bao ba e ratago. “Ba babe bônà ó tlo ba fediša.”—Psalme 145:20.

28. Nako ye re phelago go yona Beibele e e bitša’ng, gomme ka baka la’ng? (2 Timotheo 3:1-5, 12, 13; Mateo 24:3-14)

²⁸ Se se tla direga neng? Kgaufsinyane ka gobane Lentšu la Modimo le bontšha gore mathata a beleganego ao a wetšego lapa la motho ga e sa le go tloga ge ntwa ya pele ya lefase e thoma ka 1914, a dira pontšho e bontšhago gore seo se bitšwago Beibeleng e le ‘mehla ya bofelo.’ Beibele e boletše e sa le pele gore ‘mehleng ye ya bofelo’ go tla ba le dintwa, bosenyi bjo bogolo, ditlala, malwetši a dikgogodi, go nyakwa ga maipshino a nyakwa ke batho ba bantši, go furalela tumelo go Modimo, boikaketši bja bodumedi le go senyega ga bjona gotee le ditiragalo tše dingwe tše dintši. Tše di be di tla swana le methalo ya menwana, go bontšha e le ka kgonthe moloko wa rena e le wona moloko wa mafelelo wo go wona Modimo a tlago go kgotlelela maemo a bjalo a mabe. Jesu o porofetile gore nako ya rena ruri ke yona e tlago go bona bofelo bja tshepedišo ya dilo yeo e bušago lefase mo nakong ye.

29. Re tseba bjang gore bofelo bja tshepedišo ye bo kgaufsi?

²⁹ Jesu le gona o boletše mabapi le moloko wa batho woo o bonego mathomo a ‘mehla ya bofelo’ ka 1914, gore: “Ruri, ke a Le botša, di tlo tšwêlêla moloko wó ò sešo wa fêla.” (Mateo 24:34) Se se bolela gore ba bangwe ba batho bao ba bego ba phela nakong ya ge Ntwa ya I ya Lefase e thoma ka 1914, ba tla ba ba sa phela gore ba hlatsele bofelo bja tshepedišo ye ya mehleng yeno ya dilo. Moloko woo wa Ntwa ya I ya Lefase o a tšofala mo nakong ye, gomme se ke bohlatse bjo matla bja gore bofelo bja bokgopo bo batamela ka lebelo.

30. Go tla direga’ng go ditshepedišo ka moka tša pušo ya motho tšeo mo nakong ye di bušago lefase? (Tsefanya 3:8; Jesaya 1:28)

³⁰ Nakong ya ge bofelo bo fihla, ruri Modimo o tla bontšha matla a gagwe a magolo gomme o tla šwahlela e le ka kgonthe ditabeng tša motho. Ditshepedišo tšohle tša batho tšeo di ganetšanago le yena, di tla pšhatlwa. Boporofeta bja Daniele kgaolo 2, temana ya 44 Dan 2:44, bo bolela ka se: “Mehleng ya dikxoši tšeo, ké mo Modimo [wa legodimo] a tl’o xo tsoša mmušô wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê. O tlo phšatla mebušô e mengwê ka moka wa e fediša; xe e le wôna o tlo êma xo ya xo ile.” Ge ditshepedišo ka moka tše di gobatšago tša batho di fedišitšwe, gona pušo ya Modimo godimo ga lefase e tla laola ka gohle.

31. Ke mmušo ofe wo Modimo a tlago go o nea batho ka moka? (Mateo 6:9, 10)

³¹ Ka gona, pušo ya Modimo e tla tšweletšwa ka mmušo o mofsa, e lego mmušo wa legodimo, Mmušo wa Modimo. Wo ke mmušo woo Jesu Kriste a ilego a o dira taba e kgolo thutong ya gagwe. O boletše gore, ke wona o nnoši woo o tlago go laola lefase ka moka nakong e swanetšego. Ka ge Mmušo o tla buša o e-tšwa legodimong, o laolwa ke Modimo, gona ga go na kamoo o ka senywago ke batho ba boithati. Ee, matla a go buša a tla ba moo a bego a le gona mathomong, e lego legodimong go Modimo. Ka pušo ya Modimo e tlago go buša lefase, ruri kholofetšo ya gagwe ke ya gore: “ba ba axilexo xo lôna [lefase] ba ka rutwa tokô.” (Jesaya 26:9) Le gona, ga go na motho yo a tlago go forwa ke bodumedi bja maaka, ka ge bo tla ba bo se gona. Batho ka moka ba tlago go ba ba phela ba tla rutwa therešo ka Modimo le merero ya gagwe, e le gore ka polelo e kwalago, ‘go tseba Jehofa go tlale lefase lohle bo-ka meetse ge a nabile lewatleng.’—Jesaya 11:9.

TOKIŠO E MPSHA YA GO LOKA

32. Tlase ga pušo ya Mmušo wax Modimo, ruri khutšo e tla aparetša gakaakang? (Jesaya 2:2-4)

³² Tlase ga pušo ya Mmušo wa Modimo, go tla thomega lekoko le le feleletšego le lefsa la batho, e lego lekoko le le dirilwego ka batho ba ba boifago Modimo. Kamoo Modimo a re hlokomelago ka gona go tla bontšhwa tokišong ye e mpsha ka seo a se dirago. Taba e thabišago ke ya ge dintwa di ka se sa senya khutšo le lethabo la batho le ka mohla. Ka baka la’ng go ka se be bjalo? Ka gobane batho ka moka bao ba tlago go phologa bofelo bja lefase le la mehleng yeno le lebe, ba tla ba ba šetše ba rutetšwe ditseleng tša khutšo, e le gore leloko le lefsa la batho le be le mathomo a khutšo. Ka gona, batho ka moka bao ba tlago go phela tokišong yeo e mpsha ba tla tšwela pele ba amogela thuto e swanago, ge ba dutše ba dira thato ya Modimo. Ke ka lebaka leo kholofetšo ya Beibele, e tlago go phethega e le ka kgonthe ya gore Modimo o “fediša-dintwa xo fihla mafelong a lefase.” (Psalme 46:8, 9) Khutšo yeo e tla ba e tletšego bjang? Lentšu la boporofeta la Modimo, le re: “Ba bolêta e tlo ba bôná beng ba naxa; ba tlo thaba ka botlalô bya moláô.”—Psalme 37:11.

33. Lefase le tla feta phetogong efe?

³³ Go oketša, ruri batho bao ba tlago go phela tokišong yeo e mpsha ba tla fetolela lefase paradeiseng yeo Modimo a bego a le reretše yona mathomong. Wo e tla ba modiro o kgotsofatšago gakaakang bathong! Ge paradeise e tsošološitšwe, gona batho ba tla kgona go thabela e le ka kgonthe madiba, dinoka le mawatle; meboto, dithaba, melala le meedi; matšoba a kgahlišago, dimela le dihlare; gotee le diphoofolo tše di kgahlišago. Le gona, go ka se sa ba le ditlala ka gobane ‘lefase le tla ntšha dikenyo tša lona, gomme re tla segofatšwa ke Modimo, Modimo wa rena.’ Ee, “xo tlo ba le mohora wa mabêlê mo naxeng; ’phoxong tša thaba meré ya dienywa e tlo xwaša.”—Psalme 67:6; 72:16.

34. Ke phodišo efe ya mmele yeo e tlago go direga?

³⁴ Gotee le khutšo ya ka mo go sa felego le dijo tše dintši, ruri go tla ba le boiketlo bjo bo thabišago. Ka ge Modimo e le yena yo a bopilego motho, ruri o tseba kaone go phala ngaka lege e le efe seo a ka se dirago gore a fodiše digole, a dire gore difofu di bone gomme difowa di kwe, le kamoo a ka fedišago malwetši ka moka, botšofadi gotee le lehu. Matla a Modimo a go dira se a ile a bontšhwa ke Jesu Kriste ka tekanyo e nyenyane nakong ya ge a be a le lefaseng. Beibele e a re botša: “Mašaba a mantši a batho a tla xo Yêna; ba tla bà na le dihlotša, le difofu, le dimuma, le dixôlê, le ba bangwê ba bantši; ba ba bea fase maotong a xaxwe, Yêna a ba fodiša. Mašaba a tlabêxa xe a bôna dimuma di bolêla, dixôlê di fodile, dihlotša di sepela, difofu di bôna.”—Mateo 15:30, 31.

35, 36. Bahu ba tla newa bjang sebaka sa go phela tokišong e mpsha ya Modimo? (Johane 5:28, 29; Luka 7:11-15)

³⁵ Jesu o be a bolela Paradeise ye ya lefase nakong ya ge a be a botša motho yo a bego a fegilwe ka lehlakoreng la gagwe, a re: “O tlo ba le Nna Paradeiseng.” (Luka 23:43) Motho yoo o hwile. Ka gona, ke bjang a tlago go ba Paradeiseng? Ka tsela ye nngwe ya tokišetšo e makatšago yeo e bontšhago kamoo Modimo a hlokomelago ka gona, e lego ka tsogo ya go tsoga bahung. Beibele e bolela go Ditiro 24:15 gore: “Bahu ba tlo tsoxa, bohle, baloki le ba s’a lokaxo.” Nakong ya ge a be a le lefaseng Jesu o ile a tsoša bahu, e le go bontšha matla a Modimo a go dira se tlase ga Mmušo wa gagwe.

³⁶ Na o hwetša kgopolo ya tsogo e le e thata go dumelwa? Ee, gaešita le mo nakong ye o kgona go bona mananeo a thelebišene ao a nago le batho bao e lego kgale ba hwile. O kwa mantšu a bona, o hlokomela ditiro tša bona gomme o lemoga mekgwa ya bona. Ge motho feela a kgona go boloka dilo tše di bjalo thelebišeneng, gona go ka se ke gwa ba thata go Modimo yo Bohlale-hlale gore a gopole kagego le mekgwa ya motho o mongwe le o mongwe yoo a ka ratago go mmopa gape. O dirile se gomme o tla tsošetša batho ba ba bjalo bophelong gape. Ka tsela ye le bona ba tla ba le sebaka sa go thabela bophelo tokišong e mphsa ya Modimo. Ka go ahlamiša mabitla, ka go fodiša batho malwetši ao ba a abetšego, botšofadi le lehu, ruri Modimo ‘o tlo tloša lehu ka mo go sa felego.’ (Jesaya 25:8) Ka gona, batho ba tla kgona go phela ka mo go sa felego!

37. Ke ka baka la’ng go ka bolelwa gore Modimo o tla lokiša go gobatšwa lege e le gofe moo batho ba go dirilwego ka phošo?

³⁷ Modimo ka Mmušo wa gagwe ruri o tla fetola boemo bjo bobe bjoo bo apareditšego ka nako e telele kudu! Go phuleletša bosafelego bjohle, o tla bontšha tlhokomelo ya gagwe e kgolo go rena ka go neša ditšhegofatšo tšeo e tlago go ba tše dikgolo kudu go phala go gobatšwa ka moka moo re go dirilwego nakong e fetilego. Mathata a nakong e fetilego ao re bilego le wona tshepedišong ye ya mehleng yeno, a tla hwelela megopolong ya rena ka nako yeo ge e ba re ka leka gore re a gopole. Kholofetšo ya Modimo ke ye: “Ke tlo hlôla maxodimo a mafsa [mmušo o mofsa wa legodimo godimo ga batho ka moka] le lefase le lefsa [lekoko la go loka la batho]; tša kxalê di ka se hlwe di tsebywa, le mo pelong ya motho di ka se hlwe di rotoxa. ’Me lena hlalalang Le fêlê Lè thabêla tše Nna ke tl’o xo di hlôla.” (Jesaya 65:17, 18) Ka ditšhegofatšo tše dikgolo tšeo di lego ka pele ga gago, gona o ka bona lebaka leo Beibele e bolelago gore Modimo “o tlo phumola mexôkxô ka moka mahlong a bôná.” Ka baka la’ng? Ka gobane “lehu le ka se hlwe le e-ba xôna; le xe e le manyami le dillô le bohloko, di ka se hlwe di e-ba xôna; xobane tša pele di fetile.”—Kutollo 21:4.

MODIMO O A HLOKOMELA NA RURI LE RENA RE A HLOKOMELA?

38. Modimo o nyaka batho ba mohuta ofe tokišong e mpsha ya ga gagwe? (Psalme 37:37, 38)

³⁸ Therešo ya gore Modimo o kgaufsi le go fediša bokgopo gomme a tliše tokišo e mpsha e kgahlišago, e bontšha gore o re hlokomela e le ka kgonthe. Eupja, na re a mo hlokomela? Ge e ba re mo hlokomela, gona re swanetše go go bontšha. Re swanetše go dira’ng? Beibele e re: “Lefase le a feta le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.” (1 Johane 2:17) Batho bao Modimo a ba nyakago tokišong ya gagwe e mpsha, ke bao ba dirago thato ya gagwe gomme ba ikokobetša pušong ya gagwe ya go loka. Ba ke batho bao ba tlago go kwa melao ya gagwe gomme ba thuše tabeng ya go dira “lefase le lefsa,” e le gore e-be lefelo le lebotse leo go ka phelwago go lona. Batho bao ba ganetšago pušo ya Modimo e tla ba feela batshwenyi, ka gona ba ka se ke ba dumelelwa go phela moo.

39. Ge e ba o nyaka bophelo bjo bo sa felego, gona o swanetše go dira nyakišišo efe? (Diema 2:1-6)

³⁹ Na o rata go phela tokišong e mpsha ya go loka ya Modimo? Ee, selo sa pele seo o ka se dirago ke go ithuta melao ya Modimo mabapi le bophelo. Na se ke se segolo kudu? Ge e ba o be o ka newa legae le lebotse tikologong e swanago le serapa ka ntle le go le lefelela, ruri na o be o ka se ke wa dula fase gomme wa nagana kamoo o ka le swanelago ka gona? Lentšu la Modimo le nea selo se segolo kudu, e lego bophelo bjo bo sa felego lefaseng la paradeise, ge e ba re ka nyakišiša gore re tsebe seo e lego thato ya gagwe go rena gomme ra e dira. Beibele e re: “Bophelô byo bo sa felexo kè xe ba Xo tseba Wene Modimo-dimo Ò le nnoši [wa therešo]. Ba tsebê le Moromiwa wa xaxo Jesu Kriste.”—Johane 17:3.

40. Beibele e nea mehola efe e mengwe mo nakong ye? (2 Timotheo 3:16, 17)

⁴⁰ Go ithuta Beibele le gona go tla nea wena gotee le lapa la gago tlhahlo e holago yeo e nyakegago kudu bophelong bja letšatši le lengwe le le lengwe mo dinakong tše tše thata. Go oketša, ruri e nea khutšo ya mogopolo ka ge e re botša lebaka leo maemo a lego a mabe ka lona le seo bokamoso bo se huperego. Sa bohlokwa kudu e tla ba go thuša go tšweletša lerato la kgonthe la go rata Modimo, gomme wa bona gore “ba ba Mo nyakago ó a ba putsa.”—Ba-Hebere 11:6.

41. Ke thušo efe yeo Dihlatse tša Jehofa ba tlago go go nea yona ka ntle le go e lefelela?

⁴¹ Dihlatse tša Jehofa ba thabela le go rata go diriša nako ya bona gore ba go thuše go ithuta go gontši ka ditokišetšo tša Modimo tša bophelo tokišong ya gagwe e mpsha. Ee, ruri ka ntle le pelaelo go na le dipotšišo tše dingwe tšeo o nago le tšona mabapi le Modimo le Beibele. Dihlatse tša Jehofa ba tla thabišwa ke go boledišana ka tše le wena legaeng leo e lego la gago, Beibeleng yeo e lego ya gago. Ka gona, go e na le go latela tsela ya go ipuša ya bophelo goba go ithekga ka kgopolo ya batho ba ba se ba phethegago, o tla sepedišwa ke tsebišo yeo e lego e phalago tšohle yeo e hwetšwago lehono. Ka gona, ge fela nako e sa dutše e le gona ruri o kgothaletšwa gore o dire bjale ka ge keletšo e buduletšwego ya Lentšu la Modimo e bolela: “Ikokobetšeng ka tlase ga seatla se matla sa Modimo, . . . xobane ké Yêna a Le belaêlêlaxo.”—1 Petro 5:6, 7.

[Mengwalo ya tlase]

[Tšhate go letlakala]

(For fully formatted text, see publication)

KA MOKA MOLOKONG O TEE

1914

Dintwa tša Lefase

Ditlala tše Dikgolo

Malwetši a Dikgogodi

Bosenyi bjo Bošoro

Tšhilafatšo ya Lefase

Bofelo bja Tshepedišo ye

[Seswantšho go letlakala 6]

Ge e ba bodiidi le lefelo la ditšhila la motho di ka bolelwa gore di tšwa go Modimo . . .

[Seswantšho go letlakala 7]

. . . Ke mang yo a swanetšego go retwa ka baka la botse bja lefase gotee le mašemo a lona a tšweletšago dijo?

[Seswantšho go letlakala 9]

Lefase le hlamilwe kudu gore le swanele bophelo go phala ntlo lege e le efe

[Seswantšho go letlakala 9]

Ka ge ntlo e nngwe le e nngwe e e-na le moagi, gona ke mo go gogolo gakaakang ka lefase!

[Seswantšho go letlakala 13]

Beibele e bontšha gore morero wa Modimo e be e le go dira lefase ka moka serapa se sebotse, e lego paradeise, gore batho ba le thabele ka mo go sa felego

[Seswantšho go letlakala 14]

Ge segapa-moya se kgaotšwe mothopong wa matla a sona, se felelwa ke matla sa ema. Ka mokgwa o swanago, ge batho ba itlošitše go Modimo ruri ba ile ba feleletša ka go gwahlafala

[Seswantšho go letlakala 16]

Ge mokgwa o monyenyane wa polokego o ka hlokomologwa, ruri le ka letamo le legolo le ka senyega. Nakong ya ge batswadi ba rena ba pele ba roba molao wa Modimo, go ile gwa thoma bokgopo le mahloko

[Seswantšho go letlakala 19]

Molato o išitšwego kgorong o ka tšea dibeke, ešita lege e le o akaretšago batho ba babedi fela. Dikgang tše di akareditšego pušo ya Modimo di swanetše go lokišwa ka mo go feleletšego, ka mo go sa felego, gomme se se nyaka nako e lekanego

[Seswantšho go letlakala 24]

Go ka se be le dintwa tokišong e mpsha ya Modimo, ka ge a tla “fediša-dintwa”

[Seswantšho go letlakala 25]

Batho le ka mohla ba ka se sa bolawa ke tlala

[Seswantšho go letlakala 25]

Lefase le tla tšweletša dijo tše dintši ka baka la tšhegofatšo ya Modimo

[Seswantšho go letlakala 26]

Batho ba ba tšofetšego ba tla bušetšwa matla ao a tlišwago ke bofsa le bophelo bjo bo phethagetšego

[Seswantšho go letlakala 27]

Bahu ka moka bao ba gopolwago ke Modimo ba tla bušetšwa bophelong gomme ba be gotee le baratiwa ba bona

[Seswantšho go letlakala 29]

Tlase ga pušo ya Mmušo wa Modimo, bophelo e tla ba bjo bo thabišago kudu moo ba tlago go hloka mahloko ao re kwešwago bohloko ka wona mo nakong ye

[Seswantšho go letlakala 31]

Ge nke bophelo tikologong e kgahlišago bo be bo ka newa, na o be o ka se ke wa rata go tseba kamoo o bego o ka bo swanela ka gona? Tokišo e mpsha ya Modimo e nea se segolo kudu, fela re swanetše go diriša nako gore re ithute kamoo re ka e swanelago ka gona