Kgaolo 1

Khutšo ya Kgonthe le Polokego di Batametše!

1. Ke maemo afe ao a dirago gore khutšo ya kgonthe le polokego e be tšeo di kganyogwago gakaakaa?

RURI wena go swana le batho ba bantši, o rata khutšo le polokego. Batho kae le kae ba lapišitšwe ke bokebekwa, bošoro, ntwa le go dula ba boifa nuclear. Le gona, batho ba bantši ga ba na mediro e kgotsofatšago, dintlo tše lekanego goba dijo tše lekanego. A lethabo le lekaakang leo e tlago go ba lona ge e ba mathata a bjalo a ka rarollwa gomme lefase le la ba legae le le kgahlišago le le le šireletšegilego go baagi ba lona!

2, 3. (a) Ge e ba khutšo ya kgonthe le polokego e le tšeo di lego kgaufsi e le ka kgonthe, gona ke dipotšišo dife tšeo di swanetšego go botšišwa? (b) Mogato wo o gatilwego ke Ditšhaba tše Kopanego o bonala bjang e le wo o sepedišanago le go kganyoga khutšo le polokego?

² Ka mo go makatšago, ruri go na le lebaka le le kwalago la go dumela gore kimollo ye e lego kgale e lebeletšwe e kgaufsi kudu, gore khutšo le polokego lefaseng ka bophara ke tšeo di lego kgaufsi le go ba tša kgonthe! Eupja ke mang yo a tlago go tliša tše? Na ditšhaba tša lefase le di tla beela ka thoko go se kwane ga tšona e le gore di fihlelele se?

³ Boporofeta bjo bo kgahlišago bja Beibele bo boletše gore go tla tla nako yeo ka yona baetapele ba lefase ba tlago go bolela e le ka kgonthe gore “xo khutšô! Xo iketlilwe!”a Ge e le gabotse, ge Ditšhaba tše Kopanego di be di bolela 1986 e le “Ngwaga wa Khutšo wa Ditšhaba ka Moka,” di ile tša kgopela gore mekgatlo kae le kae e dire boiteko bjo bo kgethegilego go tloga ka ngwaga woo go ya pele gore di tšwetše pele pakane ya “khutšo, polokego ya ditšhaba ka moka le tirišano.”⁠¹

4. Ge e ba go e-na le thulaganyo lege e le efe ya khutšo le polokego yeo e tlago go go hola, gona ke mathata afe ao e swanetšego go a rarolla?

⁴ Eupja na se e be e tla ba ‘khutšo ya kgonthe le polokego’? Na e tla fihla le go baagišani ba gago le legaeng la gago gomme e rarolle mathata ao a kgomago wena ka noši? Na e tla rarolla mathata a bokebekwa bjo bo oketšegago le go lemalela dihlare-tagi, go hlatloga ga theko ya dijo, makgetho a boima, tšhilafatšo e aparelago le go senyega ga lenelo ga ditswalano tša lapa? Ruri ge feela a mangwe a maemo a a tšwela pele, gona a hlasela khutšo ya gago ka noši le polokego.

5, 6. Motheong wa phihlelo yeo e lego ya gago bophelong, ruri na o dumela gore batho ba tla rarolla mathata a?

⁵ Ke therešo gore batho ba holofela gore ba ka fenya mathata a. Ba bolela gore ge ba hunolotšwe merwalong e boima ya ditšhelete tša ntwa, gona ba ka lebiša lehumo leo ka moka, nyakišišo le bahlabani gore ba rarolle mathata ao.

⁶ Na ruri o dumela se? Na go na le bohlatse lege e le bofe bjo bo tiilego bja go bontšha gore batho ba tla kgona go tliša tharollo ya neng le neng? Histori e bontšha’ng? Ge e le gabotse, phihlelo ya gago ka noši bophelong e go botša’ng?

7, 8. (a) Ke kae mo gongwe moo re ka lebelelago gona tharollo? (b) Beibele ke puku e tumilego gakaakang?

⁷ Mo gongwe o ka botšiša gore, ‘Eupja ge e ba batho ba ka se ke ba rarolla se, gona e tla ba’ng?’ Ee, go na le bohlatse bjo bo ka se kego bja ganwa bja gore lefase le dilo tšeo di phelago go lona di nea bohlatse bja thulaganyo e bohlale. (Ba-Hebere 3:4) Na ke mo go kgonegago gore Motho yo a dirilego thulaganyo ye o tsena ditabeng? Na o tla ba le letsogo ditabeng tša batho? Ke Beibele feela yeo e neago dikarabo dipotšišong tše.

⁸ Ka baka la seo go bolelwago ka sona, ruri na go ka se ke gwa go hola go hlahloba seo Beibele e se bolelago ka taba ye? O tla lemoga gore ke yona puku yeo e fetoletšwego ka bophara le go gašwa lefaseng. Dikopi tše dibilione tša yona ka moka goba karolo ya yona, di abilwe ka maleme a fetago 1 800.⁠² Eupja na o be o tseba gore puku ye ya kgale e bolela kudu ka ditaba tšeo di re kgomago kudu lekgolong le la nywaga la bo-20?

9, 10. (a) Beibele e re’ng ka bokamoso le ka mebušo ya batho? (b) Mmušo wa Modimo ke’ng, gomme o tla amoga neng mebušo ka moka ya gona bjale pušo?

⁹ Batho ba bantši ba tseba gore Beibele e boletše e sa le pele ka ‘bofelo bja lefase.’ Eupja ke ba sego kae feela bao ba tsebago seo e se bolelago ka nako yeo se se tlago go direga ka yona goba seo bophelo lefaseng bo tlago go ba sona ka morago. (Mateo 24:21, 22; 2 Petro 3:11-13) Mo gongwe ba ka ba ba rapela Thapelo ya Morena, moo ba kgopelago gore ‘mmušo wa Modimo o tle.’ (Mateo 6:9, 10) Eupja ke ba sego kae feela bao ba lemogago gore Mmušo wa Modimo ke pušo ya kgonthe yeo e tlago go tšea sebaka sa ditshepedišo ka moka tša gona bjale tša bopolitiki. Go bjalo ka ge moporofeta Daniele a boletše gore: “Mehleng ya dikxoši tšeo, ké mo Modimo a tl’o xo tsoša mmušô wo o ka se kexo wa šwalalanywa neng le neng, . . . O tlo phšatla mebušô e mengwê ka moka wa e fediša; xe e le wôna, o tlo êma xo ya xo ile.”—Daniele 2:44.

¹⁰ Ka mo go kgahlišago, boporofeta bja Beibele bjo bo lego mabapi le “xo khutšô! Xo iketlilwe!” bjo bo boletšwego mathomong bo akaretša dibopego tše: “Xe xo tlo thwe: Xo khutšô! Xo iketlilwe! ké mo ba tl’o xo wêlwa xodimo ke thsenyêxô.” (1 Ba-Thesalonika 5:3) Ka gona, khutšo lege e le efe le polokego tše baetapele ba batho ba di bolelago ruri e tla ba tša nako e nyenyane kudu. Seo se bjalo ka gobane boporofeta bo bontšha gore kapejana ka morago ga moo mebušo ka moka ya batho e tla pšhatlaganywa gore e se ke ya hlwa e e-ba gona, gomme e tšeelwe sebaka ke pušo e tee ya lefase ka moka, e lego Mmušo wa Modimo.

11, 12. Go se swane mo gongwe mo go lego gona magareng ga seo Beibele e se bolelago gore Mmušo wa Modimo o tla se dira le seo baetapele ba batho ba lekago go se dira ke gofe?

¹¹ Go oketša mo, Beibele e utolla go se swane mo gontši magareng ga khutšo le polokego tšeo di tlago go tlišwa ke Mmušo wa Modimo le tšeo di holofetšwago ke baetapele ba lefase. Lehono batho ba bolela ka go fokotša dibetša ka dikgwerano. Beibele ka go se swane le bona, e bolela gore Modimo kapejana o tla fediša ka mo go feletšego dibetša ka moka gomme o tla tloša dilo tša kgonthe tšeo di bakago ntwa. (Psalme 46:9; Jesaya 2:2-4) Polokego yeo Modimo a e holofetšago ga se feela ya go bolokega dintweng tšeo di lego magareng ga ditšhaba. Ke ya go bolokega manabeng a mehuta yohle, e le gore go se hlwe go e-ba le motho yo a boifago mosegare goba bošego. (Mika 4:3, 4) Le gona, batho mo nakong ye ba katanela go laola bokebekwa, eupja morero o boletšwego wa Modimo ke wa go tumola gaešita le mekgwa le maemo tšeo di bakago bokebekwa.—Psalme 37:8-11; Ba-Galatia 5:19-21.

¹² Ditšhaba le gona di ikgodiša ka go tšwela pele ka dinyakišišo tša tša kalafo le go hlokomela bao ba babjago le bao ba tšofetšego ka tsela e kaone. Eupja Beibele e hlalosa kamoo pušo ya Modimo e tlago go tliša ka gona bophelo bjo bobotse le bja neng le neng gaešita le go fediša botšofadi le lehu! (Kutollo 21:3, 4) Go oketša se, ruri tlase ga Mmušo wa Modimo modiro wa motho e tla ba wo o nago le morero e le ka kgonthe, e lego wo o mo tlišetšago kgotsofalo ya kgonthe. Ruri o ka thaba bjang ge e ba modiro wa gago e le wo o sa thabišego goba o go dira gore o ikwe o tloga o se na seo o se dirilego?—Jesaya 65:21-23; Ba-Roma 8:19-21.

13. Ke dipotšišo dife tšeo e ka bago mo go holago go rena gore re di hlahlobe?

¹³ Ke’ng seo o dumelago gore se ka nea khutšo le polokego tšeo di tlago go kaonefatša karolo e nngwe le e nngwe ya bophelo bja gago, na ekaba dikholofetšo tša batho goba dikholofetšo tša Modimo tšeo di tlago go tlišwa ke pušo ya gagwe ya Mmušo? Ka go sepedišana le seo lefase ka kakaretšo le se neago, na ruri o hweditše seo o se nyakago bophelong? Go thwe’ng ge e ba o itesa gore o gogolwe ke seo mo nakong ye e ka bago e le seo se tumilego, gomme ka morago wa lemoga gore o forilwe ke dikholofetšo tša bofora tšeo di go tlogetšego o se na khutšo ya kgonthe le polokego? Ka lehlakoreng le lengwe, na o ka kgonthišega gore seo Beibele e se holofetšago ke selo seo se ka dumelwago, se se holago le sa kgonthe? Ruri, dikarabo tša dipotšišo tše di nyaka go hlahlobja ka kelohloko.

[Mongwalo wa tlase]

[Full-page picture on page 4]

[Seswantšho go letlakala 9]

Go ka se hlwe go e-ba le motho yo a boifago mosegare goba bošego