Na Modimo ka Mehla ke o Mogolo go Feta Jesu?

JESU le ka mohla ga se a ka a ipolela gore ke Modimo. Dilo tšohle tše a di boletšego ka yena di bontšha gore ga se a ka a ipona a lekana le Modimo ka tsela lege e le efe—e sego ka matla, tsebo le ka nywaga.

Polelo ya gagwe le boitshwaro bja gagwe go sa šetšwe ge a be a le legodimong goba lefaseng, di bontšha go ikokobetša ga gagwe go Modimo ka dinako tšohle. Modimo ka mehla ke o mogolo, gomme Jesu ke o monyenyane yo a bopilwego ke Modimo.

Jesu o Arogile go Modimo

JESU o bontšhitše gantši gore e be e le sebopiwa se se arogilego go Modimo le gore yena Jesu o be a e-na le Modimo yo a mo okametšego, Modimo yo a bego a mo rapela le Modimo yo a bego a mmitša “Tate.” Jesu ge a rapela Modimo, yena Tate o itše ke “Wene Modimo-dimo O le nnoši.” (Johane 17:3) O boditše Maria Magdalena go Johane 20:17 gore: “Ke rotoxêla xo Tate, le xo Tata-weno, xo Modimo wa-ka, le xo Modimo wa lena.” Moapostola Paulo o tiiša tswalano ye go 2 Ba-Korinthe 1:3 ka gore: “A xo rêtwê Modimo, Yêna Tata xo Mong wa rena Jesu Kriste.” Ka ge Jesu a be a e-na le Modimo, yena Tatagwe, gona o be a ka se be yena Modimo yoo ka nako e swanago.

Moapostola Paulo o be a se na pelaelo ka go bolela ka Jesu le Modimo e le bao ba arogilego e le ka kgonthe: “Wa rena Modimo ké o tee fêla, . . . Le mong wa rena ké o tee, Yêna Jesu Kriste.” (1 Ba-Korinthe 8:6) Moapostola o bontšhitše go arogana ga bona ge a be a bolela gore ka “pele xa Modimo le Morêna Jesu Kriste le Barongwa ba bakxêthwa.” (1 Timotheo 5:21) Go etša ge Paulo a bolela ka Jesu le barongwa e le bao ba aroganego legodimong, gona Jesu le Modimo le bona ba arogane.

Mantšu a Jesu go Johane 8:17, 18 le wona ke a bohlokwa. O re: “Molaong wa lena xo ngwadilwe xore bohlatse bya batho ba babedi ké bya therešô. Xe e le Nna ke hlatselwa ke Nna mong, xomme le Tate e a nthomilexo ó a nthlatsela.” Jesu mo o bontšha gore yena le Tate, ke gore Modimo Ra-matla-ohle ba swanetše go ba e le batho ba babedi, ka gobane go be go ka direga bjang gore go be le dihlatse tše pedi e le ka kgonthe?

Jesu o bontšhitše gape gore o be a arogile go Modimo, ka gore: “O re’ng xe O re ‘Yo botse’ Ò e-ra Nna? Xa xo Yo botse xe e se Modimo fêla.” (Mareka 10:18) Jesu o be a bolela gore ga go na motho yo botse go etša ge Modimo a le bjalo, gaešita le yena Jesu ka noši. Modimo ke yo botse ka tsela yeo e mo aroganyago go Jesu.

Mohlanka yo a Ikokobetšago wa Modimo

JESU o boletše dipolelo tše di swanago le tše gantši: “Xa xo se Morwa a kxônaxo xo se dira ka la xaxwe; xobane tše Tat’axwe a di diraxo, ké tšôna tše le Morwa a di diraxo.” (Johane 5:19) “Xe ke foloxile kwa lexodimong, xa k’a tlêla xo dira thatô ya-ka; ke tlile xo dira thatô ya E a nthomilexo.” (Johane 6:38) “Thutô ya-ka xa se ya-ka; ké ya E a nthomilexo.” (Johane 7:16) Na moromi ga se yo mogolo go feta yo a romilwego?

Tswalano ye e bonagala gabotse seswantšhong sa Jesu sa tšhemo ya merara. O ile a swantšha Modimo Tatagwe le mong wa tšhemo ya merara yo a ilego a tšea leeto la go ya kgole gomme a tlogela tšhemo diatleng tša balemi bao ba bego ba swantšhetša baruti ba ba-Juda. Ge mong wa tšhemo ka morago a romela mohlanka go ya go tšea dienywa tša tšhemo yeo, balemi ba ile ba betha mohlanka gomme ba mo gomiša a se a swara selo. Mong wa tšhemo bjale o ile a roma mohlanka wa bobedi, gomme ka morago a roma wa boraro bao bobedi bja bona ba ilego ba swarwa ka tsela e swanago. Mafelelong, mong wa tšhemo a re: “Ke tlo roma morwa-moratwa [Jesu] wa-ka; mohlomong ba tlo re xo bôna yêna ba mo šia.” Eupja balemi ba babe ba re: “Yó ké yêna moji wa bohwa. Tlang, re mmolaeng; bohwa bo tlê bo lewê ke rena. Xomme ba mo kxoromeletša ntlê xa thšemo, ba mmolaya.” (Luka 20:9-16) Jesu ka gona o be a swantšha boemo bja gagwe e le motho yo a romilwego ke Modimo go tla go dira thato ya Modimo, go etša ge tate a roma morwa yo a ikokobetšago.

Balatedi ba Jesu ka mehla ba mo lebeletše e le mohlanka yo a ikokobetšago wa Modimo, e sego bjalo ka yo a lekanago le Modimo. Ba rapetše Modimo mabapi le “Jesu mohlanka wa’xo e mokxêthwa, e O mmeilexo; . . . xo bônalê diká tša bohlatse le mehlôlô ka ’ina la Jesu Mohlanka e mokxêthwa w’axo.”—Ditiro 4:23, 27, 30.

Modimo ke o Mogolo ka Dinako Tšohle

GONA mathomong a bodiredi bja Jesu ge a be a e-tšwa meetseng a kolobetšo, lentšu la Modimo le le tšwago legodimong le itše: “Yêna-yó ké Yêna Morwa-moratwa wa-ka, yo ke kxahlwaxo ke Yêna.” (Mateo 3:16, 17) Na Modimo o be a bolela gore e be e le yena morwa wa gagwe ka noši, gore o be a ikgahliša le gore o be a ithomile? Aowa, Modimo Mmopi o be a bolela gore yena ka ge e le o mogolo o be a dumelela yo monyenyane, e lego Morwa wa gagwe Jesu modiro wo o lego ka pele.

Jesu o bontšhitše bogolo bja tatagwe ge a be a re: ‘Moya wa Jehofa o na le nna, ka gobane o ntloleditše go begela babotlana ’taba tše di botse.’ (Luka 4:18) Go tlotša ke go nea matla goba go nea taelo ga motho o mogolo go motho o mongwe yo a sešogo a ba le matla. Modimo mo ke yo e lego yo mogolo, ka gobane ke yena yo a tloditšego Jesu gomme a mo nea matla ao a bego a se na ona pele.

Jesu o boletše ka mo go kwalago bogolo bja Tatagwe nakong ya ge mmago barutiwa ba babedi a be a kgopela gore o mongwe wa barwa ba gagwe a dule ka letsogong le letona la Jesu gomme o mongwe a dule ka go le letshadi ge a tsena Mmušong wa gagwe. Jesu o ile a araba ka gore: “Xe e le xo dula ka mo letsoxong la-ka le letona le xo la ntsôxôšô, xa se mo motho a kaxo newa ke Nna; xo tlo newa bao ba xo lokišeditšwexo ke Tate.” (Mateo 20:23) Ge nkabe Jesu e be e le Modimo Ra-matla-ohle, gona maemo ao e be e tla ba a gagwe gore a a nee. Eupja Jesu o be a ka se ke a a nea, ka gobane e be e le a go newa ke Modimo, gomme Jesu e be e se Modimo.

Dithapelo tša Jesu ke mohlala o matla wa boemo bja gagwe bja ka tlase. Nakong ya ge Jesu a be a le kgaufsi le go hwa, o ile a bontšha yo a bego a mo feta ka bogolo ge a rapela ka gore: “Tata! Xe O ka rata, šuthiša senwêlô sé se mphetê. Fêla, xo se dirwê thatô ya-ka, xo dirwê ya xaxo.” (Luka 22:42) O be a rapela mang? Na o be a rapela karolo ya gagwe? Aowa, o be a rapela motho o mongwe yo a bego a arogile go yena, e lego Tatagwe, Modimo yo thato ya gagwe e bego e le ka godimo ga ya gagwe gomme e bego e ka ba yeo e fapanego le ya gagwe, yena Motho a nnoši yo a bego a ka kgona go “šuthiša senwêlô sé.”

Jesu ge a le kgaufsi le go hwa o ile a goeletša ka gore: “Modimo wa-ka! Modimo wa-ka! O ntloxeletše’ng?” (Mareka 15:34) Jesu o be a goeletša go mang? Na e be e le go yena ka noši goba go karolo ya gagwe? Ruri mokgoši woo wa gore “Modimo wa-ka!,” o be o sa tšwe go motho yo a bego a ipona e le Modimo. Ge e ba Jesu e be e le Modimo, gona o be a tlogetšwe ke mang? Na ke yena ka noši? Seo se be se tla hloka tlhaloganyo. Jesu le gona o itše: “Tata! Môya wa-ka ke o xafêla diatleng tša xaxo!” (Luka 23:46) Ge e ba Jesu e be e le Modimo, gona ke ka lebaka lefe a bego a tla gafela moya wa gagwe go Tate?

Jesu ka morago ga ge a hwile o ile a ba lebitleng ka dikarolo tša matšatši a mararo. Ge e ba e be e le Modimo, gona Habakuku 1:12, (NW) e fošitše ge e re: “Wene Modimo wa-ka, Mokgethwa wa-ka, ga o hwe.” Eupja Beibele e bolela gore Jesu o ile a hwa gomme a ba yo a sa phelego ka lebitleng. Ke mang yo a ilego a tsoša Jesu bahung? Ge e ba a be a hwile e le ka kgonthe, gona o be a ka se ke a itsoša. Ka lehlakoreng le lengwe, ge e ba a be a se a hwa e le ka kgonthe, gona lehu la gagwe la go ikgakantšha le be le ka se ke la lefa theko ya topollo bakeng sa sebe sa Adama. Eupja o lefile tefo yeo ka botlalo ka lehu la gagwe la kgonthe. Ka gona e bile “Modimo [yo] a tsošitšego [Jesu] ka go mo hunolla mahlokong a lehu.” (Ditiro 2:24, NW) Motho o mogolo, Modimo Ra-matla-ohle o tsošitše motho o monyenyane, Jesu mohlanka wa gagwe bahung.

Na go kgona ga Jesu go dira mehlolo e bjalo ka go tsoša batho, go bontšha gore e be e le Modimo? Baapostola le baporofeta Eliya le Elisa le bona ba be ba e-na le matla ao, eupja ao ga se a ka a ba dira bao ba fetago batho ba bangwe. Modimo o ile a nea baporofeta, Jesu le baapostola matla a go dira mehlolo go bontšha gore O be a ba thekga. Eupja ga se a ka a dira le o tee wa bona karolo ya Modimo wa bontši.

Jesu o be a E-na le Tsebo e Lekanyeditšwego

NAKONG ya ge Jesu a be a nea boporofeta bja gagwe mabapi le bofelo bja tshepedišo ya dilo, o itše: “Xe e le letšatši leo le nakô ya tšôna, xa xo e a di tsebaxo. Le Barongwa ba lexodimong, le Yêna Morwa, xa ba di tsebe. Xo tseba Tate a nnoši.” (Mareka 13:32) Ge nkabe Jesu e be e le Morwa yo e lego karolo e lekanago ya Modimo, gona o be a tla tseba seo Tate a se tsebago. Eupja Jesu o be a sa tsebe, ka gobane o be a sa lekane le Modimo.

Ka mo go swanago, re bala go Ba-Hebere 5:8 gore Jesu “ó ithutile xo kwa ka xôna xo tlaišêxa.” Na re ka nagana gore Modimo o swanetše go ithuta selo se sengwe? Aowa, eupja Jesu o ile a swanelwa ke go dira bjalo, ka gobane o be a sa tsebe dilo ka moka tšeo Modimo a bego a di tseba. Le gona o ile a swanelwa ke go ithuta selo se sengwe seo Modimo le ka mohla a se a kago a swanelwa ke go ithuta sona—go kwa. Modimo le ka mohla ga se a swanelwa ke go kwa motho o mongwe.

Phapano magareng ga seo Modimo a se tsebago le seo Kriste a se tsebago le gona e be e le gona nakong ya ge Jesu a be a tsošeditšwe legodimong go ya go ba le Modimo. Ela hloko mantšu a puku ya mafelelo ya Beibele: “Kutollô ya Jesu Kriste ye Modimo a Mo filexo yôna.” (Kutollo 1:1) Ge e ba Jesu ka noši e be e le karolo ya Modimo, na o be a ka swanelwa ke go newa kutollo ke karolo e nngwe ya Modimo? Ruri, o be a tla ba a tsebile tšohle ka yona, ka gobane Modimo o be a tseba. Eupja Jesu o be a sa tsebe, ka gobane e be e se Modimo.

Jesu o Tšwela Pele go Ikokobetša

JESU pele ga ge e ka ba motho gaešita le nakong ya ge a be a le lefaseng, o be a ikokobeletša Modimo. Ka morago ga tsogo ya gagwe, o tšwetše pele go ba boemong bja go ikokobetša, bjo e lego bja ka tlase.

Petro le bao ba bego ba e na le yena ge ba be ba bolela ka tsogo ya Jesu, ba ile ba botša Lekgotla la ba-Juda gore: “Modimo o godišeditše yena [Jesu] yo. . . ka letsogong la gagwe le letona.” (Ditiro 5:31, NW) Paulo o itše: ‘Modimo o mo godišitše gagolo.’ (Ba-Filipi 2:9) Ge e ba Jesu e be e le Modimo, o be a ka godišetšwa bjang boemong bjo bo phagamego go feta bjo a bego a le go bjona pele? O be a tla ba a šetše a le karolo e godišitšwego ya Boraro botee. Ge e ba Jesu pele ga go godišwa ga gagwe a be a lekana le Modimo, gona go mo godiša gape go be go tla mo dira gore a fete Modimo ka bogolo.

Paulo le gona o boletše gore Kriste o tsene “xôna-kwa maxodimong, ’me byale ó bônala pele xa sefahloxô sa Modimo ka ’baka la rena.” (Ba-Hebere 9:24) Ge e ba o tšwelela pele ga motho o mongwe, o ka ba bjang motho yoo? O ka se ke wa ba yena. O swanetše go ba yo a sa swanego le yena le yo a arogilego go yena.

Ka mo go swanago, mmolaelwa-tumelo Stefano pele ga ge a ka kgatlwa ka mafsika go fihlela a e-hwa, o ile a “lelalêla lexodimong, a bôna letaxô la Modimo; a bôna Jesu à eme ka letsoxong le letona la Modimo.” (Ditiro 7:55) Ge e le gabotse, o bone batho ba babedi bao ba aroganego.—eupja moya o mokgethwa o be o se gona gomme go be go se na Modimo wa Boraro botee.

Pegong e lego go Kutollo 4:8 go ya go 5:7, Modimo o bontšhwa a dutše sedulong sa gagwe sa bogoši sa legodimo, eupja Jesu ga a go sona. O swanetšwe ke go batamela Modimo gore a tšee lengwalo seatleng se setona sa Modimo. Se se bontšha gore Jesu legodimong ga se Modimo, eupja ke yo a arogilego go yena.

Bulletin of the John Rylands Library kua Manchester, Engelane e bolela ka go dumelelana le seo se lego ka mo godimo, ka gore: “Jesu bophelong bja gagwe bja ka morago ga tsogo bja legodimo o swantšhwa e le yo a thekgago ka gohle seo a lego sona gomme e le yo a hlaologilego le go aroga go Modimo, go etša ge a be a le bjalo bophelong bja gagwe bja lefaseng e le Jesu wa lefaseng. Ee, o tšwelela a le hleng ga Modimo le go bapetšwa le Modimo a sa dutše a le sebopiwa se sengwe sa legodimo seo se lego kgorong ya legodimo ya Modimo, go etša ge barongwa ba le bjalo—gaešita lege yena ka ge e le Morwa wa Modimo a le boemong bjo bo fapanego le bja bona gomme a ba phagametše.”—Bapiša le Ba-Filipi 2:11.

Bulletin le gona e re: “Lega go le bjalo, seo se bolelwago ka bophelo bja gagwe le mediro ya gagwe e le Kriste wa legodimo ga se bolele goba go bontšha gore ka go ba ga gagwe boemong bja go ba modimo, o ema ka go lekana le Modimo ka noši gomme ke Modimo ka mo go feleletšego. Ka mo go fapanego, pegong e lego go Testamente e Mpsha e lego mabapi le bophelo bja gagwe bja legodimo le bodiredi, re bona motho yo a arogilego go Modimo le yo a ikokobeletšago yena.”

Jesu bokamosong bjo bo sa felego legodimong, o tla tšwela pele e le mohlanka yo a arogilego le yo a ikokobetšago wa Modimo. Beibele e bolela se ka tsela ye: “Xwa tlo kxon’o tla bofêlô mohla [Jesu legodimong] a tl’o xo bušetša Modimo Tat’axwe mmušo, . . . ké mo le Yêna Morwa a tl’o xo bewa ka tlase xa E a mmeilexo mmuši wa tšohle, xore Modimo e bê Yêna Mo-ba-tšohle-xo-bohle.”—1 Ba-Korinthe 15:24, 28.

Jesu le ka Mohla ga se a ka a Ipolela Gore ke Modimo

KGOPOLO ya Beibele ke ye e kwalago. Jehofa Modimo Ra-matla-ohle ga se gore ke feela motho yo a arogilego go Jesu, eupja ke Yo ka dinako tšohle e lego o mogolo go mo feta. Jesu ka mehla o bolelwa e le mohlanka wa Modimo yo a arogilego go yena, yo monyenyane le yo a ikokobetšago. Ke ka lebaka leo Beibele e bolelago ka mo go kwalago gore “hlôxô ya Kriste ké Modimo” ka tsela e swanago le ya ge “hlôxô ya monna mang le mang [e le] Kriste.” (1 Ba-Korinthe 11:3) Le ke lebaka leo Jesu a itšego: “Tate ó mpheta ka boxolo.”—Johane 14:28.

Therešo ke gore Jesu ga se Modimo, gomme le ka mohla ga se a ka a ipolela e le yena. Ye e lemogilwe ke baithuti ba bantši. Bjale ka ge Bulletin ya Rylands e re: “Go swanetše go lebanwa le therešo ya gore go nyakišišwa ga Testamente e Mpsha ka nywaga ya mafelelo e masome a mararo goba a mane, go dirile gore baithuti ba bantši ba ba tumilego ba Testamente e Mpsha ba fetše ka go bolela gore Jesu . . . ruri le ka mohla ga se a ka a dumela gore ke yena Modimo.”

Bulletin le gona e bolela ka Bakriste ba lekgolong la pele la nywaga gore: “Neng le neng ge ba be ba nea [Jesu] maina a bjalo a tlhompho a swanago le Kriste, Morwa-motho, Morwa wa Modimo le Morena, a e be e se ditsela tša go mmolela gore ke Modimo, eupja gore o dirile modiro wa Modimo.”

Ka gona, gaešita le baithuti ba bangwe ba bodumedi ba dumela gore kgopolo ya gore Jesu ke Modimo e ganetšana le bohlatse ka moka bja Beibele. Modimo moo ka mehla ke o mogolo, gomme Jesu ke mohlanka yo a ikokobetšago.

[Seswantšho go letlakala 19]

‘Go nyakišišwa ga Testamente e Mpsha go dirile gore baithuti ba bantši ba fetše ka go bolela gore Jesu ruri le ka mohla ga se a ka a dumela gore ke yena Modimo.’—Bulletin of the John Rylands Library

[Seswantšho go letlakala 17]

Jesu o ile a botša ba-Juda gore: “Xe ke foloxile kwa lexodimong, xa k’a tlêla xo dira thatô ya-ka; ke tlile xo dira thatô ya E a nthomilexo.”—Johane 6:38

[Seswantšho go letlakala 18]

Ge Jesu a be a goeletša ka gore: “Modimo wa-ka! Modimo wa-ka! O ntloxeletše’ng?” ruri o be a sa dumele gore yena ka noši ke Modimo