Modimo o na le Leina

SELO sa pele seo gantši o se botšišago motho ge o kopana le yena la mathomo ke eng?— Ee, o botšiša gore leina la gagwe ke mang. Ka moka ga rena re na le maina. Modimo o ile a nea motho wa mathomo lefaseng leina. O ile a mo rea leina la Adama. Mosadi wa Adama o ile a rewa leina la Efa.

Lega go le bjalo, ga se batho feela bao ba nago le maina. Nagana gape ka dilo tše dingwe tšeo le tšona di nago le maina. Ge motho yo mongwe a go nea popi, o e nea leina, na ga go bjalo?— Ee, go ba le leina go bohlokwa.

Lebelela godimo dinaleding tše dintši-ntši bošego. Na o nagana gore di na le maina?— Ee, Modimo o neile naledi e nngwe le e nngwe ya sebakeng leina. Beibele e re botša gore: ‘O beile palo ya dinaledi, ka moka ga tšona o di bitša ka maina.’—Psalme 147:4.

Ke mang yo o bego o ka re ke motho wa bohlokwa kudu legohleng ka moka?— Ee, ke Modimo. Na o nagana gore o na le leina?— Jesu o boletše gore O na le lona. Ka nako e nngwe Jesu o ile a botša Modimo thapelong gore, ‘Ke tsebaditše leina la gago go balatedi ba-ka.’ (Johane 17:26) Na o tseba leina la Modimo?— Modimo ka noši o re botša lona. O re: ‘Ke nna Jehofa, ke lona leina la-ka.’ Ka gona, leina la Modimo ke JEHOFA.—Jesaya 42:8.

O ikwa bjang ge ba bangwe ba gopola leina la gago?— O a thaba, na ga go bjalo?— Jehofa le yena o nyaka gore batho ba tsebe leina la gagwe. Ka gona, re swanetše go diriša leina Jehofa ge re bolela ka Modimo. Morutiši yo Mogolo o be a diriša leina la Modimo, Jehofa, ge a be a bolela le batho. Ka nako e nngwe Jesu o ile a re: ‘Jehofa Modimo wa gago o mo rate ka pelo ya gago ka moka.’—Mareka 12:30.

Jesu o be a tseba gore leina “Jehofa” ke la bohlokwa kudu. Ka gona o ile a ruta balatedi ba gagwe go diriša leina la Modimo. O ile a ba a ba ruta go bolela ka leina la Modimo dithapelong tša bona. Jesu o be a tseba gore Modimo o nyaka gore batho ka moka ba tsebe leina la Gagwe la Jehofa.

Kgale-kgale Modimo o ile a bontšha bohlokwa bja leina la gagwe go monna yo a bitšwago Moše yo e bego e le mo-Isiraele. Ba-Isiraele ba be ba dula nageng ya Egipita. Batho ba naga yeo ba be ba tsebja e le ba-Egipita. Ba be ba dirile ba-Isiraele makgoba gomme ba be ba ba swere ka sehlogo. Ge Moše a be a godile, o ile a leka go thuša yo mongwe wa batho ba gabo. Se se ile sa dira gore Farao yo e lego kgoši ya Egipita a tuke bogale. O be a nyaka go bolaya Moše! Ka gona, Moše o ile a tšhaba Egipita.

Moše o ile a tšhabela nageng e nngwe. E be e le naga ya Midiane. Gona moo Moše o ile a nyala mosadi gomme a ba le lapa. Le gona, o ile a šoma e le modiši, a hlokomela dinku. Ka letšatši le lengwe Moše o be a swaregile ka go hlokomela dinku tša gagwe kgaufsi le thaba ge a tla bona selo se se makatšago kudu. Sehlare sa meetlwa se be se tuka mollo eupša se sa fse! Moše o ile a batamela gore a tle a bone gabotse.

Na o tseba gore go ile gwa direga’ng?— Moše o ile a kwa lentšu le bitša go tšwa ka gare-gare ga sehlare sa meetlwa seo se bego se tuka mollo. Lentšu le be le re, ‘Moše! Moše!’ Ke mang a bego a bolela mantšu ao?— Ke Modimo yo a bego a bolela! Modimo o be a e-na le modiro o mogolo wo a bego a nyaka gore Moše a o dire. Modimo o itše: ‘Bjale tlaa ke go rome o ye go Farao, gomme o ntšhe setšhaba sa-ka sa ba-Isiraele mo nageng ya Egipita.’ Modimo o ile a holofetša gore o tla thuša Moše go dira se.

Eupša Moše o ile a re go Modimo: ‘Bjale ge ke fihla go ba-Isiraele Egipita ke re ke romilwe ke Modimo gomme bona ba botšiša gore leina la gagwe ke mang, ke tla re’ng?’ Modimo o ile a botša Moše gore a botše ba-Isiraele gore: ‘Jehofa o nthomile go lena. Jehofa ke lona leina la-ka la neng le neng.’ (Ekisodo 3:1-15) Se se bontšha gore Modimo o be a tla tšwela pele a diriša leina Jehofa. O be a ka se tsoge a le fetošitše. Modimo o be a nyaka gore a tsebje ka leina la gagwe la Jehofa ka mo go sa felego.

Ge Moše a be a boela Egipita, ba-Egipita ba ile ba nagana gore Jehofa e be e fo ba modingwana yo a nyatšegago wa ba-Isiraele. Ba be ba sa nagane gore e be e le Modimo wa lefase ka moka. Ka gona, Jehofa o ile a botša kgoši ya Egipita gore: ‘Ke tlo dira gore leina la-ka le tsebje lefaseng ka moka.’ (Ekisodo 9:16) Ka kgonthe Jehofa o ile a dira gore leina la gagwe le tsebje. Na o tseba gore o ile a dira seo bjang?—

O ile a dira gore Moše a etelele pele batho ba Isiraele go tšwa Egipita. Ge ba be ba fihla Lewatleng le Lehwibidu, Jehofa o ile a bula tsela e omilego go phatša ka gare ga lona. Ba-Isiraele ba ile ba tshela ka tšhireletšego nageng e omilego. Eupša ka morago ga ge Farao le madira a gagwe ka moka ba tsene lebatong le le omilego la lewatle, meetse ao a bego a eme ka mahlakoreng a mabedi a ile a khupetša ba-Egipita gomme ba hwa ka moka ga bona.

Kapejana batho ka moka lefaseng ba ile ba thoma go kwa ka seo Jehofa a se dirilego Lewatleng le Lehwibidu. Re tseba bjang gore ba ile ba kwa ka seo?— Ge e le gabotse, mo e ka bago nywaga e 40 ka morago, ba-Isiraele ba ile ba tla Kanana e lego naga yeo Jehofa a bego a holofeditše go ba nea yona. Gona moo banna ba babedi ba ba-Isiraele ba ile ba botšwa ke mosadi yo e sa lego yo mofsa yo a bitšwago Rahaba gore: ‘Re kwele gore Jehofa o gopišitše meetse a Lewatle le Lehwibidu ge le fihla mohla le e-tšwa Egipita.’—Jošua 2:10.

Lehono batho ba bantši ba swana feela le ba-Egipita bao. Ga ba dumele gore Jehofa ke Modimo wa lefase ka moka. Ka gona, Jehofa o nyaka gore batho ba gagwe ba botše ba bangwe ka yena. Se ke seo Jesu a ilego a se dira. Go ya mafelelong a bophelo bja gagwe bja lefaseng, o ile a botša Jehofa thapelong gore: ‘Ke tsebaditše leina la gago go bona.’—Johane 17:26.

Na o nyaka go ba bjalo ka Jesu? Gona botša ba bangwe gore leina la Modimo ke Jehofa. O ka hwetša gore batho ba bantši ga ba le tsebe. Mohlomongwe o ka ba bontšha lengwalo la Psalme 68:4 ka Beibeleng. A re tšeeng Beibele gona bjale gomme re phetle lengwalo leo gotee. Le re: ‘Opelelang Modimo, le tumiše leina la gagwe; le lekelelanye mmila wa yo a phatšago ka mašoka. Leina la gagwe ke Jehofa. Pele ga gagwe le gobe megobo.’

Re ithuta’ng ka go bala se?— Ee, re ithuta gore Jehofa ke leina la bohlokwa kudu leo le lego gona. Ke leina la Modimo yo Matla-ohle, Tatago Jesu le Yo a dirilego dilo ka moka. Le gona, gopola gore Jesu o itše re swanetše go rata Jehofa Modimo ka dipelo tša rena ka moka. Na o rata Jehofa?—

Re ka bontšha bjang gore re rata Jehofa?— Tsela e nngwe ke ka go mo tseba e le Mogwera. Tsela e nngwe ke ka go botša ba bangwe gore leina la gagwe ke mang. Re ka ba bontšha ka go lebanya go tšwa Beibeleng gore leina la gagwe ke Jehofa. E bile re ka ba botša ka dilo tše di kgahlišago tšeo Jehofa a di bopilego le dilo tše dibotse tšeo a di dirilego. Se se thabiša Jehofa kudu ka gobane o nyaka gore batho ba mo tsebe. Re ka tšea karolo go direng seo, na ga go bjalo?—

Ga se batho ka moka bao ba tla ratago go theetša ge re bolela ka Jehofa. Batho ba bantši ba be ba sa theetše le nakong ya ge Jesu, Morutiši yo Mogolo a be a bolela ka Yena. Eupša seo ga se sa ka sa thibela Jesu go bolela ka Jehofa.

Ka gona, anke re beng bjalo ka Jesu. Anke re tšweleng pele re bolela ka Jehofa. Ge e ba re dira bjalo, Jehofa Modimo o tla kgahlwa ke rena ka gobane re bontšha go rata leina la gagwe.