Bophelo le Bodiredi bja Jesu

Ba Palelwa ke go mo Swara

GE MONYANYA wa Mešaša o sa dutše o tšwela pele, baetapele ba bodumedi ba roma bahlankedi ba maphodisa go ya go swarwa Jesu. Ga a leke go khuta. Jesu o tšwela pele a ruta phatlalatša, a re: “Ke sa na le lebakanyana fêla kè na le lena, ka tlo tseb’o boêla xo E a nthomilexo. Le tlo nnyaka Le se nkhwetše; Le ka se kê la fihla mo ke lexo xôna.”

Ba-Juda ga ba kwešiše, ka gona ba a botšišana: “O tlo ya kae, xe a re re ka se kê ra mo hwetša? A ô tlo ya mo xo faletšexo Ba-Gerika, a ruta bôná Ba-Gerika? Ba re: Lentšu leo a le boletšexo le re’ng xe a re: Le tlo nnyaka Le se nkhwetše, xe a re: Le ka se kê la fihla mo ke lexo xôna?” Ge e le gabotse, Jesu o bolela ka lehu la gagwe leo le batamelago le go tsogela ga gagwe legodimong, moo manaba a gagwe a ka se kego a mo latela.

Letšatši la bošupa leo e bilego e le la mafelelo la monyanya le a fihla. Mesong e mengwe le e mengwe ya monyanya, moperisita o be a tšholla meetse ao a a kgelego sedibeng sa Siloa, e le gore a ka elelela botlaseng bja aletare. Mo gongwe a gopotša batho ka tirelo ye ya letšatši le letšatši, Jesu o goa ka gore: “Xe motho a nyôrwa, a tlê xo Nna a nwê. E a ntumêlaxo ka mo mangwalô a boletšexo, mmeleng wa xaxwe xo tlo tšwa dinoka tša meetse a phelaxo, tša êla.”

Ge e le gabotse, mo Jesu o bolela ka mafelelo a mabotse ge moya o mokgethwa o tla ba o tšhollwa. Ngwageng o latelago go tšhollwa mo ga moya o mokgethwa go direga ka Pentekoste. Moo meela ya meetse a phelago e a ela ge barutiwa ba 120 ba thoma go ruta batho. Eupja go fihla nakong yeo ga go na moya ka kgopolo ya gore ga go le o tee wa barutiwa ba Jesu yo a tloditšwego ka moya o mokgwethwa gomme a biletšwa bophelong bja legodimong.

Ba arabela thutong ya Jesu, ba bangwe ba thoma go bolela ba re: “Ka kxonthe, motho yó ké Yêna Moporofeta,” ka ntle le pelaelo ba bolela ka moporofeta yo a fetago Moše yo go holofeditšwego gore o tla tla. Ba bangwe ba re: “Ké Yêna Kriste.” Eupja ba bangwe ba ganetša ka gore: “A Kriste a ka tšwa Galilea? Ba re: A mangwalô xa a re Kriste ó tlo tšwa lelokong la Dafida, ó tlo tšwa Betlehema motseng wo Dafida a tšwelexo xo wôna?”

Ka gona go tšwelela karogano gare ga lešaba. Ba bangwe ba nyaka gore Jesu a swarwe, eupja ga go na yo a mo išago seatla. Ge bahlankedi ba maphodisa ba boa ba se na Jesu, baperisita ba bagolo le bafarisei ba botšiša: “Le re’ng Lè sa mo tliše?”

Bahlankedi ba a araba, “Xa xo ešo xwa ba le motho e a bolêlaxo byalo ka motho eo.”

Ka ge ba befetšwe, baetapele ba bodumedi ba retologela go go kwera, go bolela tlhaloso ya maaka e le gore ba fetoše ditaba le go diriša maina a maroga. Ba a kwera: “E se bê le lena Le arošitšwe? A xo na le e mongwê wa baxolo xoba mofarisei e a mo dumetšexo? Ké sethšaba sé sa xo se tsebe Molaô; sôna ké dihlôbôxwa.”

Bjale, Nikodemo, Mofarisei yo e bilego e le mmuši wa ba-Juda (ke gore, setho sa Lekgotla), o leka go emela Jesu. Mo gongwe o tla gopola gore nywaga e mebedi le seripa pele, Nikodemo o ile a tla go Jesu bošego gomme a bontšha go dumela go yena. Mo nakong ye Nikodemo o re: “A xomme ka Molaô wa rena re ka bea motho molato à sešo a sekišwa, xwa tsebya se a se diraxo?”

Bafarisei ba befelwa le go feta ge o mongwe wa bona a emela Jesu. Ba bolela ka bogale ka gore: “Anthe le wêna O Mo-Galilea? Tsomeša O bônê xe xo se moporofeta wa xo thwe ó tlo tsoxa Galilea.”

Gaešita lege Mangwalo a sa bolele ka go lebanya gore moporofeta o be a tla tšwa Galilea, a tloga a šupa go Kriste e le yo a tšwago moo, a bolela gore “seetša se sexolo” se be se tla bonwa lefelong leo. Le gona ka go fapana le kgopolo e fošagetšego, Jesu o belegetšwe Betlehema, gomme e be e le wa leloko la Dafida. Lege Bafarisei mo gongwe ba lemoga se, go bonala e le bona ba ikarabelelago ka go phatlalatšwa ga kgopolo e fošagetšego yeo batho ba nago le yona ka Jesu. Johane 7:32-52; Jesaya 9:1, 2; Mateo 4:13-17.

◆ Ke eng se se diregago mesong e mengwe le e mengwe ya monyanya, gomme Jesu a ka ba a lebiša tlhokomelo bjang go se?

◆ Ke ka baka la’ng bahlankedi ba palelwa ke go swara Jesu, gomme baetapele ba bodumedi ba itshwara bjang?

◆ Nikodemo ke mang, kgopolo ya gagwe ke efe ka Jesu, gomme Bafarisei-gotee le yena ba mo swara bjang?

◆ Ke bohlatse bofe bjo bo lego gona bja gore Kriste o be a tla tšwa Galilea?