Melaetša ya Barongwa Bakeng sa Mehla ya Rena
“Modimo . . . O romile morongwa wa gagwe gomme a o tšweletša ka dipontšho.”—KUTOLLO 1:1, NW.
1. Ke kwešišo efe e fošagetšego e lego gona mabapi le leina Apocalypse, gomme ke’ng seo Kutollo e se utollago ka bokamoso?
APOCALYPSE. Leina leo le ile la kwewa gantši gakaakang lekgolong le la nywaga la bo-20—eupja le kwešišwa ka mo go fošagetšego gakaakang! Ka kgopolo ya Beibele, ga le bolele go fedišwa ga batho ka moka tshenyong ya nuclear. Go e na le moo, lentšu le la Segerika le bolela “go utolla.” Puku ya Beibele ya Apocalypse goba Kutollo, ka diswantšho tša boporofeta e utolla ditiragalo tšeo di fihlago seremong ge go tšwelela mehla ya lethabo la ka mo go sa felego bakeng sa batho. Ka gona, Johane moapostola wa Jesu o thoma Kutollo ka mantšu: “Wa lehlôxônôlô ké e a balaxo le ba ba kwaxo mantšu a a porofetô le ba ba lôtôlaxo tše di ngwadilwexo mo xo yôna; xobane lebaka le kxaufsi.”—Kutollo 1:3.
2, 3. Ke ka baka la’ng lefase le e le le sa thabišego, gomme ke’ng seo Jehofa a rerago go se dira?
2 Lefase lehono ga se la thaba. Lebaka la go se thabe ga lona le boletšwe kopelong yeo Moše a e hlamilego mo e ka bago nywaga e 3 460 e fetilego: “Ba mo dirile tše mpe, ga se bana ba [Modimo], ke ditšhila, ke moloko o kgopamilego le o kgopo.” (Doiteronomio 32:5, Phetolelo ya Kgale) Mantšu ao a swanela gabotse gakaakang moloko wa mehleng yeno wo o nago le botumo bjo bo kgopamego le bjo bobe! Ka mohlala, ketapele ya World Military and Social Expenditures 1987-88 e bolela ka go lebanya gore: “Maphelo a ditšhaba ka moka a senywa ke phenkgišano ya dibetša. United States le Soviet Union ge di kopane di diriša mo e ka bago [dimilione tše 3 750 tša diranta] ka letšatši tšhireletšong ya tša bohlabani. Lega go le bjalo, United States ke ya bolesome-seswai gare ga ditšhaba ka moka ge go tliwa tabeng ya go hwa ga masea, USSR ke ya bomasome-nne-tshela. Dinaga tše di hlabologago di diriša mo e ka bago palo e balwago gane dibetšeng go e na le tlhokomelong ya tša maphelo ya batho bao ba dulago go tšona. Eupja makgolo a dimilione a batho dinageng tšeo ba swerwe ke tlala; 20 lekgolong ya bana ba bona ba hwa pele ba e-ba le nywaga e mehlano.”
3 Mabaka a mangwe a oketša go mokgwa wo wa go senya—go senyega ga boitshwaro le ga botee bja lapa, bokebekwa le poifo tšeo di aparetšago lefase, go hloka lerato le go ba kgopo ga moloko wa mehleng yeno. Re ka thaba gakaakang ka gobane Jehofa o rera “xo senya basenya-lefase”! (Kutollo 11:18) Puku ya Beibele ya Kutollo e hlalosa ka dibopego tše makatšago, lelokelelong la dipono tše 16 kamoo a tlago go phetha se ka gona.
“Barongwa” le “Dipontšho”
4. Barongwa ba akaretšwa bjang go Kutollo, gomme dipono di swantšha bjang morongwa yo a tumilego?
4 Kutollo e hlalosa boporofeta bja mathomo bja Beibele go Genesi 3:15, go bontšha kamoo bonaba magareng ga Sathane le phuthego ya Modimo ye e lego mosadi le magareng ga ‘dipeu’ tša bona tše pedi bo rarollwago ka gona. E utolla kahlolo ya Jehofa go manaba a gagwe le go bao ba mo ratago le go thekga bogoši bja gagwe. Kutollo e fetišetšwa go Johane ‘ka dipontšho’ ke morongwa. Barongwa ba bangwe goba batseta ba ba le karolo go tsebišeng le go phethagatšeng dipontšho tšeo. Morongwa yo a phagamego kudu o tsebišwa go Kutollo 1:5 e le “Jesu Kriste Yêna Hlatse ye e bôtêxaxo, Yêna Tháka-letswalô ya bahu, Yêna Mmuši wa dikxoši tša lefase.” ‘Dipontšho’ goba dipono di mmontšha gape e le “Tau,” e le “Kwana,” e le “Mikaele,” gomme ka makga a mantšinyana e le morongwa yo matla.—Kutollo 5:5, 13; 9:1, 11; 10:1; 12:7; 18:1.
5. Ke’ng seo se tšweletšwago ponong ya pele ya Kutollo, gomme e re kgoma bjang?
5 Pono ya pele go Kutollo 1:10–3:22 e tšweletša melaetša e tutuetšago ya gore Jesu yo a tagafaditšwego o fetišetša go “barongwa,” goba balebeledi ba diphuthego tše šupago tša Asia tšeo di swantšhetšago diphuthego tša lefase ka moka tša Dihlatse tša Jehofa “letšatšing la Morena.” Ka gona melaetša ke ya rena lehono! Ka gona re swanetše go ba mafolofolo gore re “Kwê se Môya o se botšaxo diphuthêxô,” ka gobane ditemošo tše ke tša go re kgothatša, gore re botege—re amogelege ka baka la mediro ya rena le ‘lerato la rena le tumelo le bodiredi le kgotlelelo.’—Kutollo 1:10; 2:7;, 10:, 19.
6. Re ka holwa bjang ke o mongwe le o mongwe wa melaetša yeo e rometšwego go diphuthego tše šupago tša Asia?
6 Ka go swana le phuthego ya Efeso, mo gongwe re ka ba re ile ra šoma ka potego le go hloya mediro ya go ikarola dihlotswana ya bohlanogi, eupja ge e ba lerato la rena le ile la fokotšega ka tsela lege e le efe, gona anke re sokologeleng leratong la rena la pele, gotee le phišego ya lona ka moka! Ka go swana le Bakriste ba humilego moyeng ba Simirina, anke re lweleng moputso ka sebete, re ipontšhe re “bôtêxa xo fihla lehung,” ge e ba seo se ka nyakega. Ka go swana le bao ba ilego ba lekwa ke Sathane kua Peregamo, re swanetše go sokologa borapeding lege e le bofe bja medimo ya diswantšho bja nakong e fetilego, boitshwarong bjo bo gobogilego, goba go ipopeng dihlotswana. Ba-Thiathira ba ile ba botšwa gore ba itiše malebana le dikgoketšo tše bjalo, kudu-kudu ditutuetšo tša go swana le tša Isebele. Le rena re swanetše go itiša! Mang le mang yo a hwilego moyeng, ka go swana le Bakriste ba Sarede, o swanetše go tsoga pele ga ge nako e feta. Mojako o bulegilego wa tirelo o beilwe pele ga rena, bjalo ka ge o be o le pele ga ba-Filadelfia; eka re ka ba le matla a go fenya nakong ya moleko go swana lege ba dirile! Ge e ba ba bangwe ba rena ba thomile go ba bololo ka go swana le ba-Laoditsea, gona re swanetše go boela boemong bja rena bja moya gomme re sokologe. Jesu o dula a kokota mojako. Eka ka moka ga rena re ka mo amogela gomme ra thabela dijo tša moya tše di sa felego le yena diphuthegong tša rena tše 55 000 go dikologa lefase!—Kutollo 1:11; 2:7, 10, 11, 17, 29; 3:6, 13, 22.
Sedulo sa Bogoši sa Modimo, Lengwalo le Potšišo
7. Ke ditumišo dife tšeo di opelwago ponong ya bobedi, gomme o arabela bjang?
7 Ponang ya bobedi Johane o bona sedulo sa bogoši sa Jehofa sa letago sa legodimong. Modimo wa rena wa letago o bonala gare ga letago le le sa lekanywego ka selo, a direlwa ke bakerubi ba bane, madira a barongwa le Bakriste ba tsošitšwego ba bafenyi. Kopelo ya bona ya theto ke e tutuetšago gakaakang: “E a swanetšwexo ke letaxô le thêtô le matla ke Wene Morêna Modimo wa rena, xobane ke Wene o hlodilexo dilô tšè; xe di tšwêlêla di hlolexile, ké ka xobane o ratile fao”! Jehofa o nea Yo a swanelegago lengwalo gore a le bule—Tau ya moloko wa Juda, Kwana e bolailwego yeo e bago Molopolodi wa rena. Dibopja ka moka di reta Jehofa le Kwana.—Kutollo 4:11; 5:2-5, 11-14.
8. Ke’ng seo re se bonago ponong ya boraro ya Kutollo, gomme e tswalana bjang le mehla ya rena?
8 Bjale re ponang ya boraro! Kwana e tšwela pele go kgaola mahuto a šupago a lengwalonyana. Ke’ng seo re se bonago? Sa mathomo Jesu yo a sa tšwago go bewa sedulong sa bogoši o kata magodimong ka pitsi e tšhweu, go bontšha ntwa ya go loka. Se se latelago monamedi wa pitsi e khulong o aparetša lefase ka ntwa. Ka morago go tla pitsi e ntsho ya tlala, gomme e latelwa ke pitsi e tshehla ya dinkhu yeo monamedi wa yona a bitšwago Lehu! Bodula-bahu bo a latela go metša batho ba dimilione. Tše ka moka di thoma ka “ditlalêlô” tšeo di ilego tša hlasela batho ka 1914-18 le tšeo batšofadi ba phelago ba moloko woo ba di gopolago gabotse. (Mateo 24:3-8) Banamedi bao ba dipitsi ba tšwela pele ba kata! Ge go kgaolwa lehuto la bohlano le la botshelela ditiragalo di leba ‘letšatšing le legolo la bogale bja Jehofa le Kwana.’ Potšišo e a botšišwa: “Ké mang e a kaxo êma?”—Kutollo 6:1-17.
Bao ‘ba Kgonago go Ema’
9. Ke kutollo efe e kgahlišago yeo e dirwago ponong ya bone?
9 Pono ya bone e a utologa, e bontšha bao ba tlago go phologa letšatši la bogale bja Modimo le lebaka leo ba tlago go phologa ka lona. Barongwa ba thibela diphefo tše nne tša tshenyo lefaseng e le gore go swawa ga Isiraele wa moya, e lego 144 000 go tle go phethwe. ‘Ka morago ga tšeo,’ pono e a katologa go ba e makatšago: “Ka bôna lešaba le lexolo la batho ba xo sexo motho e a kxônaxo xo ba bala, ba dithšaba ka moka, le meloko ka moka, le merafô ka moka, le maleme ka moka; ka bôna bà eme pele xa sedulô sa boxoši [sa Modimo le pele ga] Kwana, ba apere ‘kobô tše dithšweu, bà swere mahlare a molala ka diatla tša bônâ; Ba hlaboša mantšu xa-xolo ba re: Xo phološa kè xa Modimo wa rena e a dutšexo sedulong sa boxoši, ké xa Kwana.” (Kutollo 7:1-10) Na o a ipona seswantšhong se?
10. (a) Go bapišwa ga dipego tša Segopotšo sa 1935 le sa 1987 go bontšha’ng ge e le ka go phethagala ga pono ya bone? (b) Bjale ke potšišo efe yeo e kgomago o mongwe le o mongwe wa rena, gomme ka baka la’ng?
10 Ka 1935 bao ba bilego gona lefaseng ka bophara monyanyeng wa Segopotšo sa lehu la Jesu e bile ba 32 795. Go ba ke ba 27 006 bao ba ilego ba ja diswantšhetšo e le bao ba šetšego lefaseng ba ba 144 000 bao kholofelo ya bona e lego ya legodimo. Ka morago ngwageng wona woo ba e lego lešaba le legolo ba ile ba bonala gabotse. Batho ba ba bonolo bao ba lebeletšego pele bophelong bjo sa felego lefaseng la paradeise le bona ba bontšha tumelo mading a tšholotšwego a Jesu; ba tla go Jehofa ka boineelo, ba dumela go kolobetšwa gomme ba direla Modimo ka phišego ka kholofelo ya lethabo ya go phologa ‘masetla-pelo a magolo.’ Segopotšong sa 1987, ba bilego gona e bile ba 8 965 221, gwa ja ba 8 808 feela. Se se bontšha gore lehono ba dimilione ke lešaba le legolo goba ke bao ba thabelago go ba karolo ya lona. Na o tla ‘kgona go ema’ o le o mongwe wa ba nakong ya ‘letšatši le legolo la bogale bja Jehofa le Kwana’? Go gata mogato o išago moo go bolela go phologa ga gago.—Kutollo 6:15-17; 7:14-17.
Go Kwatša Dikahlolo tša Modimo
11. Ke dikahlolo dife tšeo di kwatšwago ponong ya bohlano, gomme tše di tswalana bjang le mehla ya rena?
11 Lehuto la bošupa le a kgaolwa! Go tšwelela pono ya bohlano ya Kutollo. Barongwa ba šupago ba eme pele ga Modimo. Ba newa diphalafala tše šupago, gomme ka tšona ba hlaba mekgoši yeo e ilego ya kwewa lefaseng ka bophara ke batho ba Jehofa ga e sa le go tloga ka 1922. Ba bane ba pele ba tsebatša dikahlolo godimo ga “karolô ya boraro” ya batho, bao go lego molaleng gore ba Bojakaneng. “Diphalafala” tše di bontšha gore karolo ya Bojakane ya “lefase” (tshepedišo ya dilo ya Sathane yeo go bonalago e le ya ka mo go sa felego) le ya “lewatlê” (mašaba a batho ao a se nago khutšo), gotee le ‘dinoka le didiba tša meetse’ (dithuto le difilosofi tša Bojakane) le dietša tša tšona tše fsifetšego (baruti bao ba hlokago seetša sa moya), ka moka ke bao ba tlago go galefelwa ke Modimo. “Lenong” le fofago leo le swantšhetšago morongwa ka morago le bonala bogareng bja legodimo le tsebiša gore mekgoši e meraro ya diphalafala yeo e sa tlilego go tla e tla bolela “Joo! Joo [go] lena baaxi ba lefase.”—Kutollo 8:1-13.
12. Ke mang yo a bulago sekoti, gomme ke bjang mehleng yeno motšhitšhi wa “ditšie” o ilego wa hlaba baruti?
12 Morongwa wa bohlano o letša phalafala ya gagwe. Bona! “Naledi” e lego Morena Jesu o bula sekoti se se fsifaditšwego ke muši gomme go tšwa motšhitšhi wa ditšie. Ka mo go makatšago, se se swantšhetša go lokolla ga Jesu dihlatse tše tloditšwego tša Modimo boemong bja go se dire selo ka 1919. Ka taelo ya Modimo ba ba senya mafulo a baruti ka go utolla dithuto tša bona tša maaka le tša boikaketši “kxwedi tše tlhano” e lego nako e tlwaelegilego ya go phela ga tšie. Se se kgonthišetša gore moloko wa ditšie tša mehleng yeno ‘o ka se ke wa feta’ go fihlela ge Jehofa le Kriste ba tla ba ba feditše go ahlola ditšhaba. Motšhitšhi wa ditšie o setše o tlogeletše batho dikete tše dimilione tša dipuku tše di theilwego Beibeleng tše di nago le melaetša ya dikahlolo tše šoro ye e hlabago bjalo ka mesela ya diphepheng. Johane o a hlalosa: “Ba ‘Joo’ ya pele di fedile; tsebang xore xo s’e tla tša ‘Joo’ tše dingwê tše pedi.”—Kutollo 9:1-12; Mateo 24:34; 25:31-33.
13. (a) Ke bomang bao ba swantšhetšwago ke barongwa ba bane bao ba lokolotšwego tikologong ya Noka ya Eforate, gomme ba na le modiro ofe? (b) Dira tše dimiriate ke bomang, gomme ke bjang taolo ya bona e lego “maxanong a bôna le meseleng ya bona”?
13 Phalafala ya botshelela e a lla, gomme e tsebiša “joo” ya bobedi. Barongwa ba bane ba lokollwa tikologong ya Noka ya Eforate, e lego bao ba swantšhetšago gabotse go lokollwa ga dihlatse tše tloditšwego tša Modimo bohlankeng bja Babele ka 1919. Ba ile ba hlangwa gore “ba bolayê karolô ya boraro ya batho,” ba tsebiša gore baruti ba Bojakane ba hwile go ya ka pono ya Jehofa. Eupja go nyakega thušo go katološa modiro wo wa go nea bohlatse, gomme Jehofa o lokišetša se ka go tliša lešaba le legolo la badiri-gotee. Dihlatse tše tloditšwego le bathuši ba ba tšwelela e le dira tše sa balegego, “dimiriate tša dimiriate tše pedi.” Taolo ya tšona e “maxanong a tšôna” ka baka la gore di bolela melaetša ya dikahlolo tša Jehofa magaeng a batho gomme e “meseleng ya tšona” ka gobane di tlogela dipuku tša Beibele tšeo di kwatšago letšatši la gagwe la tefetšo leo le tlago ka lebelo.—Kutollo 9:13-21; Ditiro 20:20, 21.
14. (a) ‘Morongwa yo matla’ yo a lego ponong ya botshelela ke mang, gomme ke’ng seo a se dirago le go se bolela? (b) Ke’ng seo se bolelwago ke lengwalonyana ‘leo le tsefago wa dinose’ eupja e le le ‘le babago ka mpeng’?
14 Bjale pono ya botshelela e a utologa. Re bona “morongwa yo matla,” yoo go lego molaleng gore ke Morena Jesu karolong e kgethegilego. O swere lengwalonyana ka seatleng sa gagwe. Medumo le mekgoši e a kwala gomme morongwa o ena ka Mmopi wa rena o Mogolo: “Lebaka le ka se hlwê le e-ba xôna! Se se tl’o xo ba xôna mehleng ya xe xo kwala lentšu la Morongwa wa xo šupa xe a tlo letša phalafala, kè xo phêthêxa xa thopa ya Modimo.” Johane o boditšwe gore a tšee lengwalonyana gomme a le metse. Ka ganong ga gagwe ‘ke le tsefago wa dinose,’ bjalo ka ge molaetša wa Mmušo gotee le ditšhegofatšo tša wona tše di holofeditšwego tša “lexodimo le lefsa le lefase le lefsa,” e le tše thabišago gakaalo go sehlopha se tloditšwego sa Johane le bagwera ba sona lehono. Eupja ka mo go fapanego, taelo ya go bolela letšatši la Modimo la tefetšo ‘go ‘merafo le ditšhaba le maleme le dikgoši tše ntši’ go thata go ba bangwe go ka e kgotlelela. Lega go le bjalo, betang dipelo! Tiang tumelong ya gore Jehofa o tla nea matla a nyakegago ge le dutše le kwatša letšatši la gagwe la tefetšo.—Kutollo 10:1-11; 21:1, 4; 1 Johane 5:4; Jesaya 40:29-31; 61:1, 2.
Phalafala ya Bošupa le Joo ya Boraro
15. (a) Go direga’ng ge joo ya boraro e tsebišwa gomme morongwa wa bošupa a letša phalafala ya gagwe? (b) Ke ka tsela efe Mmušo e lego kgoeletšo ya joo?
15 Ka morago ga go bolela e sa le pele ka go leka ga lenaba ka 1918 go “bolaya” dihlatse tša Modimo le ka morago ga go hlalosa kamoo “môya wa bophelô o tšwaxo xo Modimo” o ilego wa ba tsošološa ka 1919 gare ba nee bohlatse lefaseng ka moka, Johane o a ngwala: “Ké xôna xe xo fetile ‘Joo’ ya bobedi; ya boraro ‘Joo’ seo, e tla ka byakô.” Ka tsela efe? Pego e tšwela pele: “Morongwa wa xo šupa a letša phalafala.” Ka gona joo ya boraro e tswalanywa le modumo wa phalafala yela ya mafelelo. Theetša! “Maxodimong xwa kwala mantšu a maxolo, a re: Mebušô ya lefase e tlile ya ba Mmušô wa Mong wa rena [Jehofa] le wa Motlotšwa wa xaxwe. Xomme ó tlo buša xo iša mehleng ya neng le neng!” Wo ke Mmušo wa Modimo ka Kriste Jesu, yoo yena le majabohwa gotee le yena a 144 000 ba phethago thopa e kgethwa ya Modimo, ba phagamišago bogoši bja ka mo go sa felego bja Jehofa Modimo Ra-matla-ohle. Na kgoeletšo ye ya mmušo ke joo? Go ba babe go bjalo! Ka gobane e bontšha kamoo Modimo a tlago “xo senya basenya-lefase.”—Kutollo 11:1-19.
16. Ke dikutollo dife tše makatšago tšeo di dirwago ponong ya bošupa?
16 Pono ya bošupa bjale e a tšwelela! Go bonala phuthego e botegago ya legodimong ya Modimo, e lego “mosadi” wa gagwe. O imile gomme o mahlabeng a go belega ngwana yo e lego kgale a letetšwe. Ka lekga la mathomo eupja e sego la mafelelo go Kutollo noga e khubedu, e lego “noxa e kxolo . . . yôna ye ba rexo ké Diabolo le Sathane, motimetši wa lefase ka moka la batho,” e a tšwelela, gomme e ikemišeditše go metša ngwana yo a belegwago. ‘Bonaba bjo bo boletšwego e sa le pele magareng ga [noga] le mosadi’ bo leba makgaolakganyeng! Mosadi o belega “ngwana wa mošemanyana,” yoo kapejana a išwago sedulong sa bogoši sa Modimo.—Kutollo 12:1-6, 9; Genesi 3:15; Daniele 2:44; 7:13, 14.
17. (a) Mikaele ke mang, gomme o ile a phelela leina la gagwe bjang go tloga ka 1914? (b) Bontšha phapano magareng ga ‘di-joo tše tharo’ le “madimabe a lefase” a Kutollo 12:12.
17 Wo ke Mmušo wa ngwana wa motho wo o hlomilwego magodimong ngwageng wa histori wa 1914. Kgoši ya wona Kriste Jesu gape o bitšwa Mikaele, yeo e bolelago gore “Ke Mang yo a Swanago le Modimo?” o araba potšišo yeo ka ntle go diega ka go lwa le Sathane le go lahlela noga yeo ya kgale le batemona ba yona lefaseng. Ga e sa le go tloga ka 1914 “ba madi-mabe ké lena ba axilexo lefaseng le lewatleng, xobane Diabolo ó theoxetše xo lena ó tuka boxale ka kudu; ó tseba xe a šaletšwe ke lebakanyana fêla.” Ka gona madimabe a a bontšhitšwego boemong bjo bo kwešago bohloko bja batho lehono ga se a swanela go gakatšhwa le ‘di-joo tše tharo’ tšeo Jehofa a di tlišago go ba babe ge a ba ahlola.—Kutollo 12:7-12.
18. (a) Ke madimabe afe ao Sathane Diabolo a ilego a leka go a tlišetša bahlanka ba Jehofa ba botegago pele le nakong ya Ntwa ya II ya Lefase? (b) Ke’ng seo Diabolo a sa dutšego a ikemišeditše go se dira, gomme ke’ng seo dipono tše šetšego di tlago go se dira?
18 Diabolo o lekile go tlišetša le bahlanka ba Jehofa ba botegago ba mo lefaseng madimabe. Pele le nakong ya Ntwa ya II ya Lefase o ile a tliša lefula la tlaišo e le go le ka go khupetša modiro wa “mašaledi” a phuthego ya Modimo ye e lego mosadi—karolo ya ba 144 000 bao ba sa dutšego ba dira gare ga batho. Jehofa o ile a kgonthišetša gore lefase, e lego tshepedišo ya Sathane ya dilo, le metša lefula leo. Lega go le bjalo, Sathane yo a galefilego o sa dutše a ikemišeditše go lwantšha Dihlatse tša Jehofa. (Kutollo 12:13-17) Mafelelo e tla ba afe? Go sa dutše go e-tla dipono tše senyane, gomme tše di tla re botša!—Habakuku 2:3.
DIPOTŠIŠO TŠA TLHAHLOBO
◻ Jehofa o ile a diriša barongwa bjang go ya ka puku ya Kutollo?
◻ Melaetša ya Jesu go diphuthego tše šupago e swanetše go re kgoma bjang?
◻ Ke’ng seo se ilego sa tlišwa ke go letšwa ga diphalafala tše šupago?
◻ Ke’ng seo se swantšhetšwago ke motšhitšhi wa ditšie le dira tše di sa balegego?
◻ Ke ka baka la’ng go tswalwa ga Mmušo wa Modimo go tswalanywa le “joo ya boraro”?
[Lepokisi go letlakala 14]
DIKGAOLO LE DITEMANA TŠA PONO E NNGWE LE E NNGWE:
◻ PONO YA BO-1 1:10–3:22
◻ PONO YA BO-2 4:1–5:14
◻ PONO YA BO-3 6:1-17
◻ PONO YA BO-4 7:1-17
◻ PONO YA BO-5 8:1–9:21
◻ PONO YA BO-6 10:1–11:19
◻ PONO YA BO-7 12:1-17
◻ PONO YA BO-8 13:1-18
◻ PONO YA BO-9 14:1-20
◻ PONO YA BO-10 15:1–16:21
◻ PONO YA BO-11 17:1-18
◻ PONO YA BO-12 18:1–19:10
◻ PONO YA BO-13 19:11-21
◻ PONO YA BO-14 20:1-10
◻ PONO YA BO-15 20:11–21:8
◻ PONO YA BO-16 21:9–22:5
[Lepokisi go letlakala 15-18]
DINTLHA TŠE KGOLO TŠA DIPONO TŠE 16 TŠA APOCALYPSE
1 Jesu gare ga dihloma-pone tše šupago tša diphuthego o romela melaetša e lerato ka dinaledi tše šupago, e lego balebeledi ba tloditšwego
2 Pele ga sedulo sa bogoši sa Jehofa sa legodimong Kwana ya mofenyi e amogela lengwalo la melaetša ya kahlolo
3 Kriste Jesu o kata a lebile phenyong, ge banamedi ba bangwe ba dipitsi ba tlaiša batho gomme letšatši la bogale bja Modimo le batamela
4 Ge barongwa ba thibela masetla-pelo a magolo go kgoboketšwa ga ba 144 000 le lešaba le legolo go a phethwa
5 Barongwa ba kwatša melaetša ya kahlolo, gomme Dihlatse tša Jehofa di tšwa bjalo ka motšhitšhi wa ditšie ge di utolla bodumedi bja maaka
6 Ge go letšwa phalafala ya bošupa, “dihlatse” tša Modimo di newa matla gape gore di tsebiše Mmušo o tlago wa Jehofa le Kriste wa gagwe
7 Ka morago ga go tswalwa ga Mmušo ka 1914, Kriste o lahlela Sathane le batemona ba gagwe mo lefaseng
8 Go tšwelela dibata tše pedi, gomme sebata sa bobedi sa bopolitiki se budulela bophelo ka go seswantšho sa pele, e lego lekgotla la UN
9 Batho bao ba ‘boifago Modimo le go mo nea letago’ ba a bunwa bakeng sa bophelo bjo bo sa felego, gomme ba bangwe bona ke bakeng sa phedišo
10 Go tšhollwa ga merufsi e šupago ya bogale bja Modimo go fihla seremong se go fedišwa bohle bao ba tutuetšwago ke “moya” o šilafaditšwego ke Sathane
11 Seotswa se segolo e lego bodumedi bja maaka se fološwa godimo ga “sebata” sa bopolitiki seo ka morago se se fedišago
12 Ka morago ga go fedišwa ga Babele o Mogolo go feleletšwa ditokišetšo tša lenyalo la Kwana le Monyadiwa wa gagwe, e lego ba 144 000
13 Ka morago ga go fedišwa ga seotswa se segolo, Jesu o etelela pele madira a legodimong go fedišweng ga tshepedišo ka moka ya lefaseng ya Sathane
14 Go lahlelwa la Sathane sekoting go bula tsela bakeng sa Pušo ya Nywaga e Sekete ya Kriste le monyadiwa wa gagwe, e lego ba 144 000
15 Ka tlase ga “lexodimo le lefsa” la Kriste Jesu le monyadiwa wa gagwe, lekoko la batho la “Iefase le lefsa” le tla thabela ditšhegofatšo tše di sa balegego tše di tšwago go Jehofa
16 Ditokišetšo tša Modimo tša go fodiša le bophelo bakeng sa batho di elela ka Jerusalema o Mofsa wa letago